مصرع 18 واصابة 22 كحصيلة أولية فى حادث انهيار كتل صخرية بالدويقة...

**OlaOsman** · 06-09-2008 02:04 PM

المشاركة الأصلية كتبت بواسطة sokasoon

صعب الصخور ديه تتشال لانها كبيره جداا ومافيش فرق انقاذ ولا حاجة الاهالى هما اللى بيحاولو يخرجو الناس ( اهمال فظيع )

أنا أصلا شفت من شوية منظر الناس و همه بيحاولوا يخرجوا الناس من تحت الصخور و فوفيهم صخرتين مايلين على بعض و سانداهم طوبة.. يعني حتى الناس دول كمان معرضين للهلاك في أي لحظة.

**sokasoon** · 06-09-2008 02:10 PM

المشاركة الأصلية كتبت بواسطة OlaOsman

يا ريت بس الموضوع يرسى على الأرقام من فئة العشرات.. الكارثة في اللي لسه تحت الصخور.. لسه سامعة حالا في الجزيرة ان الصخور انهارت فوق حوالي 35 عقار.. يعني العدد بالمئات.

عدد المصابين وصل لـ 29 مصاب

**Ahmed Selim** · 06-09-2008 02:49 PM

محافظة القاهرة أستعانت بالمقاولون العرب عشان عندهم معدات ممكن تكسر الصخر ده بطريقة هندسية معينة بحسث أن ميحصلش أنهيارات تانى و متأثرش على الناس اللى تحت الصخور.

المشكلة بس أن المعدات بتاعت المقاولين العرب مش عرفين يدخلوها لمكان الأنهيار عشان ضخامتها ( والشوارع هناك كلها ضيقة جداً )

ربنا يستر

**wawoo** · 06-09-2008 04:25 PM

المشاركة الأصلية كتبت بواسطة OlaOsman

اللهم تقبل موتاهم شهداء و ارحم من هم تحت الأنقاض و خفف عنهم يا رب.

امين ....
ربنا يرحمهم و يسترها معاهم

**Hossam_Hassan** · 06-09-2008 05:36 PM

غريبة، قناة النيل للأخبار مش جايبة اى حاجة

يمكن علشان مش مجاس الشورى اللى اتهد؟

الله يرحم اللى مات

استريح

**khalid_adel** · 06-09-2008 06:36 PM

انا لسه كنت هناك من شويه مقولكوش المنظر هناك عامل ازاي الاوتوستراد واقف تماما في المنطقه دي وفي كميه عربيات نقل ضخمه واوناش وعربيات جيش بس كلها واقفه بره وطبعا ممنوع الدخول وقافليناه لاي عربيه
بس مكنتش فاهم كان فيه عربيات كتييييره جدا نازله من فوق واتوبيسات ونقل وكله نازل!!! هل دول ناس بتخلى المنطقه ولا ده ماشين عادي
وليه العربيات الضخمه دي مدخلتش الاول وطلعت والعريبات اللي فوق تتصرف من اي طريق تاني ولا اي حاجه !!
فعلا مكنتش فاهم غير اني شايف امم من البشر ووقفه وزحمه

**OlaOsman** · 06-09-2008 06:57 PM

تعالوا يا جماعة ندعي للناس اللي تحت الأنقاض دول قبل الفطار.. كلنا هانقوم نفطر كمان شوية و همه تحت عطشى و جواعى.. يا رب يتولاهم برحمته و يخفف عنهم.

**mokhtar** · 06-09-2008 07:00 PM

المشاركة الأصلية كتبت بواسطة Hossam_Hassan

غريبة، قناة النيل للأخبار مش جايبة اى حاجة

يمكن علشان مش مجاس الشورى اللى اتهد؟

الله يرحم اللى مات

استريح

يا استاذ حسام التلفزيون المصرى بيجيب الخبر قبل وقوعه ب4 ايام ...انت بتقولوا ايه يا جماعه.....
ربنا يرحمهم ماتوا فى ايام فضيله..وينتقم من الظلمه

..mokhtar..