الموضوع: اللهم اجرني في مصيبتي واخلفني خير منها

المشاركة الأصلية كتبت بواسطة احمد سيف النصر

الحمد لله الذي لا يحمد علي مكروه سواه..يوم الخميس 19-8 كنت مسافر الساحل الشمالي الساعة 9 صباحا بسيارتي نيسان صني 2013 الشكل الجديد.. وانا ماشي في طريق مصر اسكندرية الصحراوي كان معايا زوجتي وطفلي الرضيع ومعايا مبلغ 11 الف جنيه و4 موبايلات خاصة بي وبزوجتي وكمان ملابسي وملابس زوجتي وطفلي اللي عمره سنة واحدة.. المهم كنا سعداء ومبسوطين وعمال اقول لزوجتي ربنا يقدرني واسعدك ولو ربنا شاء ان شاء الله في العيد الكبير نسافر برضه ونغير جو .. واحنا في وسط الطريق وبالتحديد في الملف اللي بيودي علي طريق العلمين مطروح .. طبيعي انك تقف عشان ده ملف لان الطريق المعاكس العربيات جاية علي سرعة كبيرة وكان الملف واقف فيه اكتر من 13 عربية ورا بعض .. المهم فجاة لقيت عربية نص نقل وقف امامي وكسرت عليا ونزل منها 4 ملثمين ومعاهم رشاشات واسلحة الية وضربوا نار في الهوا وقالولي انزلوا من العربية.. روحنا نازلين وسايبين العربية وجيت اخد شنطة كتف صغيرة فيها فلوسي وموبايلي والرخص.. راحوا ضاربين نار بجوار رجلي وقالولي سيب كل حاجة في العربية يا اما نخلص عليكم .. روحت سايب كل حاجة وخدوا العربية ومشيوا طوالي باتجاه اسكندرية.. المهم لولا ستر ربنا كان زماني انا وزوجتي وابني واقفين هناك لغاية دلوقتي لان معناش مليم ولا موبايل ولا اي حاجة .. لولا اختي وجوزها كانوا ورانا في الطريق ب دقيقتين ..المهم ركبونا معاهم وهما كمان معاهم 3 اطفال وطبعا زوجتي لغاية دلوقتي عندها انهيار عصبي وعمالة يغمي عليها .. وطلعنا علي القسم
الداخلية مش فاضية لحماية الناس وترجع حقوقهم فاضية بس لتسريح البلطجية..عربيتي اتسرقت تحت تهديد السلاح الالي والرشاشات من قبل عصابة ملثمة.. طبعا هيطلعلي واحد او واحدة تقولك ده حادث فردي ومش معني ان حصلك كدة يبقي البلد بايظة والامن مقصر.. هرد علي سيادتك واقول الحمد لله انا روحت عملت محضر في القسم فوجئت باكتر من 20 بلاغ وناس عربياتهم اتسرقت برضه تحت تهديد السلاح وده في قسم وادي النطرون .. والاخر قالولي روح قسم النوبارية عشان انت مش تبعنا .. روحت هناك لقيت برضه بشر جاية تقدم بلاغات بسرقة سياراتهم مع العلم ان المسافة بين قسم وادي النطرون والنوبارية مش كبيرة .. عارفين ده معناه ايه ان كل 10 كيلو بتتسرق اكتر من 60 سيارة في اليوم الواحد والمصيبة انك واقف تفضفض مع الناس اللي يقولك اخوه حصله كدة واللي جاره واللي قريبه واللي صاحبه واللي عمه واللي يقولك كان معايا زوجتي واولادي الصغار واللي يقولك كان معايا امي واللي واللي.. انا كنت فاكر ان انا بس لكن طلعت ثلاثة ارباع مصر كدة.. نفسي بقي اعرف يعني ايه بقي مفهوم الامن وتامين الطرق.. يعني ايه قسم الشرطة يقولك اصبر هتلاقي العصابة بيكلموك او هيكلموا احد اقاربك من تليفونك المسروق ويطلبوا منكم فلوس واتفاوض معاهم وادفع واحتمال يرجعولك العربية.. وهيقابلوك لوحدك في حتة نائية تديهم الفلوس واحتمال يدولك العربية او ياخدوا الفلوس وميرجعوش العربية او حتي يخلصوا عليك.. لما حضرتك تسمع الكلام ده من مامور القسم ..عايز ايه تاني .. عايز تقوله لما انتوا عارفين الكلام ده فين تحرككم مع الناس لحمايتها..ليه متعملوش تتبع للمكالمات ..ليه مش شايفين شغلكم وحاطين لجان في الطرق اللي زي دي..بس نقول ايه حسبي الله ونعم الوكيل..ده بلد لا يمكن يتعاش فيها ابدا

ربنا يصبر حضرتك
وان شاء الله يكون شر ابعده الله عنك
او خير ادخره الله لك
اسال الله ان يعوضك خيرا
معذرة - ولكنى نقلت موضوعك لصفحة الفيس بوك عندى -
وربنا يكثر من يدعو لك بالخير