الموضوع: ربنا كرمني بتيدا 2008

بعد اكتر من 3شهور بحث وفرجة على عدد مهول من العربيات كنت بدور على فيها بالاساس على أوكتافيا ايه5 أوتو أو كورولا2007 1600سيسي ياباني أوتوماتيك أتأكدت اني مش هلاقي عربية حالتها كويسة مناسبة للمبلغ اللي كان معايا وفجأة ظهرت لي نيسان تيدا 2008 أوتوماتيك سيدان عدادها عامل 34000ك فقط كانت بتاعة مدام كل استخادمها للعربية كان عبارة عن توصيل ولادها للمدرسة اللي هي أصلا جنب البيت روحت اتفرج من باب حب الاستطلاع لقيت العربية ماشاء الله كازيرو تماما وراكب فيها طقم كاوتش كومهو جديد رغم ان الاستبن بتاعها مالمسش الارض لكن صاحبها قرر تغيير الكاوتش لمرور 5سنين عليه ولتكبير المقاس علاوة على تركيب فرش وأرضية جلد بيج شكلهم رائع عند علياء ... المهم عملت بحث في المنتدى هنا وسألت كذا واحد عن التيدا اللي ماكنتش بفكر فيها اصلا مفيش حد ماشكرش فيها المهم بعد صلاة استخارة خدت ميكانيكي روحت قابلت زوج صاحبة العربية في بيته لقيته شخص محترم جدا (نسيت اقولكوا ان انا كنت حاطط شرط لنفسي اني ما اشتريش من تاجر او من أي حد مش مريح...ودي نصيحة لأي حد بيشتري مستعمل) واتفقنا في 5دقايق على السعر وخلصت فيها على طول (الحمد لله خدتها بسعر مناسب بصراحة مش حابب أقوله عشان محدش يقوللي كتير أو قليل) وده وصف وبعد استخدام 45يوم عملت فيهم حوالي 3000كيلوا منهم سفرية من القاهرة لشرم حيث شغلي حابب اكتب لكم عن ملاحظاتي عن العربية بما يرضي الله لمساعدة أي حد بيفكر يشتري تيدا.
أولا مواصفات العربية :
تيدا اوتوماتيك 1600سيسي موديل 2008 – فضي ميتاليك – باور وتكييف عادي مش تاتش – ايه بي اس – واحد اير باج – 4زجاج كهرباء – سنتر – انذار
ثانيا المميزات :
فتيس سلس وماتحسش بنقلاته والأوفر درايف بتاعه حكاية – موتور ناعم وتقريبا مالوش صوت – ثبات رائع – تكييف تلاجة – صالون واسع جدا جدا خصوصا للي قاعد في الخلف – شنطة بحر – التابلوه بتاعها شيك (طبعا الشكل اذواق) - استهلاك معقول للبنزين 1لتر لكل 11كيلو بالتكييف – قطع الغيار لما سالت عليها لقيتها متوافرة واسعارها معقولة – الفرامل حلوة
ثالثا العيوب :
العفشة ناشفة مقارنة بالبومة والالنترا – لايوجد مؤشر حرارة مع الاعتماد على لمبة فقط تنور في حالة البرودة وفي حالة السخونة الشدبدة اللي بيتطلب معاها التوقف على الفور وده مايعرفكش وانت ماشي حرارة الموتور بتعلى وللا لأ وكمان انا عندي هسهس بيخلليني اشيك على المية كل يومين خوفا من ان العربية تسخن واللمبة ماتنورش - مفيش كمبيوتر رحلات – الكاسيت صوته حلو ونقي لكن بيشغل سيدي أوديو فقط وبدون يواس بس أو ايه يواكس وصعب تغيره عشان مكانه كبير لكن انا جبت ام بي 3 بتاع الولاعة من راديو شاك ب150ج وبصراحة رائع – الشنطة ما بتفتحش من جوة – رغم امكانية تعديل كرسي السواق استحالة تشوف ابعاد العربية بالظبط عندالركن بس بعد فترة بتقدر تقدرها – في رجرجة خفيفة عند الفرملة القوية ودي أحتمال يكون من الطنابير ولو كده يبقى الطنابير عمرها قصير 37000ك فقط

في المجمل العربية انصح اي حد بيفكر فيها انه يشتريها بدون تردد...اسألكم الدعاء ربنا يحفظها ويكفيني انا وأسرتي شرها

أخوكم محمد أبوالعلا