بسم الله الرحمن الرحيم ..
اطيب التحيات للسادة اعضاء المنتدى الكرام ..
كثر الكلام و الاقاويل بل و الاشاعات عن الامجراند 7 من قبل نزولها الى السوق المصري في شهر 11 العام الماضي .. واستمرالجدل حولها منذ حينها و حتى اللحظة .. نصيحتي لكل السادة الاعضاء الاعتماد في الحصول على المعلومات من الملاك فقط .. لان للاسف الفتي كتير جدا من غير الملاك .. لدرجة ان واحد في مرة سألني هي صحيح فتيسها بلاستيك :) ... كتير من الملاك مبسوط من العربية .. و ناس تانية مش مبسوطة ... انا هنا هتكلم عن تجربتي الشخصية مع العربية من يوم استلامها في 19-12-2012 وحتى اليوم .. بكل امانة و بكل حيادية .. و موضوعية ..

اختياري للعربية السنة اللي فاتت كان طبعا بسبب سعرها و امكانيتها و شكلها و توكيلها .. تفوقت على الجميع في فئتها السعرية .. تفوقت ايضا في الشكل و الكماليات و سعة الشتطة اللي كانت هامة جدا بالنسبالي .. الا انها لم تكن مجربة في مصر .. خصوصا انها تجميع محلي .. بس اللي طمني انها متجربة برا مصر و عملت سمعة جيدة و طبعا عوامل الامان بالمواصفات الاوروبية واجتياز الاختبار با 4 نجوم زيها زي كبار الماركات العالمية .. توكلت على الله و قررت اغامر و اجيبها ... و الحمد لله حتى الان اشعر بانه كان اختيارا موفقا ..

عشان اكون موضوعي انا هقسم التقرير لثلاث اقسام .. -اولوياتي واحتياجاتي في العربية - المميزات - العيوب

* الاولويات في اختيار العربية ..
كتير منا بيهمل ان موضوع الاولويات ده .. رغم انه بيأثر جامد جدا على القرار .. و بيخلي بعض الناس تقارن عربيات متتقارنش ببعض اصلا لانهم مختلفين في حاجات كتير وبس متقاربين في السعر .. زي اللي بيقارن الفرنا و الامجراند لمجرد انهم تقريبا نفس السعر .. بغض النظر عن اي شيئ اخر .. و ده طبعا بتكون مقارنة غير موضوعية ... اولوياتي في العربية واللي كانت هامة جدا وجودها ...
1 - عوامل الامان .. من هيكل صلب .. فرامل مانعة للانزلاق .. و وسادات هوائية.. وطبعا الثبات في السفر بسرعات عالية ..
2- كبيرة و عائلية .. للسفر الاسري المتكرر لمسافات طويلة تصل ل 500 كلم
3- شنطة واسعة عشان الامتعة اثناء السفر... و ديه بالذات الامجراند فيها رقم 1 في فئتها فعلا
4- شكل جيد و عصري .. و صراحة الامجراند متميزة جدا في النقطة ديه .. خصوصا من الخلف
5- الاوبشنز .. سنسور الباركينج كان نفسي فيه بجد :) .. و ايضا التكييف التاتش

طبقا لاحتياجاتي و اولوياتي .. كل العربيات خرجت من المنافسة امام الامجراند .. ولو اي حد بيفكر زيي مش هيلاقي غير الامجراند قدامه ...



*المميزات..
كل ماسبق بالاضافة الى .. الثبات رائع و فرامل متميزة .. باور الدركسيون ناعم جدا .. كاوتش الويست ليك اللي العربية نازلة بيه حلو جدا من ناحية التأكل و الالتصاق بالارض حتى بعد 23,000 كلم و خصوصا بالنيتروجين .. العفشة ممتازة مش ناشفة و لا ناعمة و لكن مرضية جدا .. عزل العربية ممتاز من ناحية الضوضاء الخارجية .. سحبها مرضي جدا بالنسبالي كاستخدام عائلي .. تجميع من 0 الى 100 في 13 ثانية .. و طبعا الكاتينة جنزير مش سير .. يعني مش هيتغير

* العيوب ..
اغلب مشاكل العربية بسيطة و منقدرش نعممها كعيوب .. ولكن يمكن تصنيفها كملحوظات و مش في كل العربيات ..
1- عشان تحس بقوة الموتور لازم تحرق على الغيار .. العربية بتتحول عند 4 rpm .. بس بيكون على حساب استهلاك البنزين بالطبع
2- صوت الشكمان عالي شوية ..
3- لمبة التشيك انجن نورت عند ناس كتير بسبب البنزين و تم تعديل السوفت وير بتاع حساس نقاء البنزين .. انا عمرها ما نورت عندي من يوم ما جبت العربية ..
4- التيل بيعمل هباب اسود على الجنوط بمعدل اعلى من العربيات التانية
5- التكييف كان ممكن يبقى افضل .. رغم انه مرضي جدا بالنسبالي .. بيبردني في 10 دقائق في عز الحر ..
6- الطنابير اعتقد انها مكون محلي .. و للاسف ظهرت عندي رعشة مع الفرامل في السرعات العالية و التوكيل تفهم الموقف و هيغيرها تبع الضمان في صيانة ال 25,000 ان شاء الله...
7- بسبب حجم المبيعات الضخم ..التوكيل حصل ضغط عليه في الصيانة فبقى بيدي الناس مواعيد بعيدة جدا قد تصل الى شهر .. و لكن و بكل امانة بيحاولو يرضو كل العملاء اللي عندهم مشاكل حقيقية ..


انا الحمد لله راضي جدا عن العربية حتى الان .. و حاسس ان اختياري كان صح ..

انا ذكرت كل شيئ بكل امانة و حيادية عشان في ناس كتير بتتهمني اني تبع التوكيل بما اني مؤسس نادي سيارات امجرند مصر على الفيس ... بس انا مليش اي مصلحة مع التوكيل ولا غيره .. و كل الملاك بيقولو رأيهم في العربية بكل حرية طبقا لتجربتهم معاها ...

شكرا جزيلا ..