السلام عليكم ورحمة الله وبركاته

إزيكم يا جماعة ... يارب تكونوا كلكم بخير.

في التقرير اللي فات ليا كان فيه أعضاء طلبوا مني إني أكتب انطباعاتي عن الصني الشكل الجديد وأنا وعدتهم إني أعمل تقرير أكتب فيه انطباعاتي فمن باب " الوفاء بالوعد" بأكتب التقرير ده.

أنا حاليا عامل بالعربية 5500 كم تقريبا ( إن شاء الله اليومين الجايين حأكتب تقارير عن صيانة ال 1000 وال 5000 )

أولا: بالنسبة للشكل الخارجي:-

- طبعا هيا مسالة أذواق بس أنا من أشد المعجبين بيه
- من الناحية الفنية الشكل ده بيستخدم الهواء الخارجي في الحفاظ على اتزان العربية. علشان كده طبيعي انك لما تعدي جنبك مقطورة تحس انها بتزيحك شوية ( علشان كده لازم تثبت الدركسيون بايدك كويس وقتها).
- الكبوت مضغوط كحجم لكنه مرتب جدا من الداخل بشكل يساعدك كمستخدم بسيط للعربية على متابعة السوائل ( الزيت وغيره) بشكل سهل.
- الشنطة برضه مضغوطة كحجم من الخارج لكنها من جوة واسعة جدا جدا جدا.
- العربية عالية عن الأرض بشكل ممتاز ( مقارنة بالعربيات السيدان التانية) يسمحلك تعدي كل المطبات تقريبا من غير ما تحك في الأرض.

ثانيا: بالنسبة للعربية من الداخل:-

- العربية صالونها واسع جدا جدا جدا وديه ميزة ممتازة للوحوش اللي زيي علشان يقعدوا براحتهم سواء قدام أو ورا.
- المساحة قدام السواق ممتازة ومريحة جدا للوحوش اللي زيي (رجع الكرسي على الآخر وارفع الدركسيون على الآخر وحتحس إنك ملك).
- تقفيل العربية ياخد جيد مرتفع ( أفضل من اللوجان والفيرنا واللانوس لكنه أسوأ من اللانسر و اللي أعلى منها). قصدي بالتقفيل خامات التابلوه والشكل العام ليه.
- الكراسي مريحة و إن كانت بتبقى أفضل وأكتر راحة مع الفرش الجلد (خصوصا لو حيبقى فرش مع تنجيد إضافي).
- الكاسيت والسماعات فوق الممتازين.
- التكييف ممتاز.
- إضاءة التابلوه مريحة جدا بس كان ينقص زرار التكييف (اللي بيظيط الهوا ييجي من بره ولا يتم تدويره داخليا) انه يتضاف اليه إضاءة.

ثالثا: الكاوتش:-

الكاوتش أديله جيد جدا لكن يعيبه 3 حاجات من وجهة نظري:-
1- إنه صيني ( وأنا لا أثق في الصيني).
2- نقسته واسعة وده بيخليه ياخد الزلط ويخبطه في العربية من تحت ( صوت الخبط بس هوا اللي بيدايق لكنه ما بيسببش أي مشكلة فنية).
3- ناشف وده بيحسسك بكل حاجة على الأرض وكمان بتسمع صوته على الأرض زي الرحايا اللي بتلف لو الأرض تحتك محببة ( وده مزعج لشخص زيي بيحب الهدوء).

رابعا: أداء العربية:-

- العربية في بداياتها ( لحد ال4000 ) بتحس انها مكتومة وسحبها مش عالي لكن بعد كده الكتمة ديه بتروح والسحب بيتحسن جدا.
- صوت الموتور هادى ومع طول الاستخدام بيهدى أكتر.
- الفرامل ممتازة جدا ( والحمد لله أنا ماظهرتش أي مشاكل عندي لا الصاجة ولا الطنابير ولا التيل وده من فضل ربنا عليا لاني كنت حأزعل جدا).

خامسا: متفرقات:-

- الجسم الخارجى كمتانة ممتاز مقارنة بالعربيات السيدان اللي في السوق ( أعلى في المتانية من اللانوس والفيرنا والميجان لكنه أقل من اللوجان والسكودا واللانسر)
- زوايا الرؤية والمرايات الجانبية والخلفية ممتازين.
- إضاءة الفوانيس ممتازة تماما للرؤية الليلية.

أخيرا .... ممكن تشتري الصني وتكون مفيهاش عيوب صناعة فاحمد ربنا وانبسط بيها لانها تستحق فعلا كل قرش دفعته فيها.
وممكن تشتريها ويكون فيها عيوب صناعة فبرضه احمد ربنا وبص للمشاكل على انها مهما طول وقتها حتتحل في النهاية والعربية تبقى سليمة وتنبسط بيها.

أما بالنسبة لمشاكل التيل اللي حيبقى يحتاج يتغير بشكل أسرع من بقية العربيات فالحل انك تجهز نفسك ماديا ونفسيا لده وتدعي معايا انهم يغيروه بنوع أحسن يعيش معانا وقت أطول علشان مانفضلش ندفع كتير طول ما احنا مالكين العربية.

يا رب يكون التقرير مفيد ولو حد محتاج يسأل عن أي حاجة إن شاء الله أجاوبه عليها وأوضحها له.