الموضوع: تقرير: انطباعاتي عن النيسان صني 2013 الشكل الجديد

المشاركة الأصلية كتبت بواسطة melkashef

السلام عليكم ورحمة الله وبركاته

إزيكم يا جماعة ... يارب تكونوا كلكم بخير.

في التقرير اللي فات ليا كان فيه أعضاء طلبوا مني إني أكتب انطباعاتي عن الصني الشكل الجديد وأنا وعدتهم إني أعمل تقرير أكتب فيه انطباعاتي فمن باب " الوفاء بالوعد" بأكتب التقرير ده.

أنا حاليا عامل بالعربية 5500 كم تقريبا ( إن شاء الله اليومين الجايين حأكتب تقارير عن صيانة ال 1000 وال 5000 )
انا اولا بشكرك على التقرير وتعبك فيه
بس انا عندى كام تعليق وتوضح ارجوا انك تستحملنى شويه
انا من مالكى الصنى السوبر صالون وهقول لحضرتك على كام نقطه

أولا: بالنسبة للشكل الخارجي:-

- طبعا هيا مسالة أذواق بس أنا من أشد المعجبين بيه
هى فعلا مسأله اذاوق ولولا اختلاف الاذواق لبارت السلع
- من الناحية الفنية الشكل ده بيستخدم الهواء الخارجي في الحفاظ على اتزان العربية. علشان كده طبيعي انك لما تعدي جنبك مقطورة تحس انها بتزيحك شوية ( علشان كده لازم تثبت الدركسيون بايدك كويس وقتها).
يعنى حضرتك اذاى الشكل الخارجى بيستخدم فى الحفاظ على الاتزان ومع اول تعديه جنب نص نقل مش مقطوره وبسرعه عاليه بنسبه بسيطه بيبقى الاتزان ضعيف
ده مش طبيعى ولو الشكل بيشساعد على كده كان مفروض فى كل الحالات لكن بسبب علو العربيه فاكيد هيكون الاتزان مش كويس
- الكبوت مضغوط كحجم لكنه مرتب جدا من الداخل بشكل يساعدك كمستخدم بسيط للعربية على متابعة السوائل ( الزيت وغيره) بشكل سهل.
متفق معاك ولكن العربيه اطول من الموديل القديم لكن العرض مش كويس
- الشنطة برضه مضغوطة كحجم من الخارج لكنها من جوة واسعة جدا جدا جدا.
الشنطه مضغوطه بالعرض ولكن فى الطول ممتازه
- العربية عالية عن الأرض بشكل ممتاز ( مقارنة بالعربيات السيدان التانية) يسمحلك تعدي كل المطبات تقريبا من غير ما تحك في الأرض.
متفق معاك
ثانيا: بالنسبة للعربية من الداخل:-

- العربية صالونها واسع جدا جدا جدا وديه ميزة ممتازة للوحوش اللي زيي علشان يقعدوا براحتهم سواء قدام أو ورا.
زى ماقلت لحضرتك طول العربيه هو العامل الاساسى لكن فكر تالت اشخاص يركبوا ورا وشوف هل المكان هيسمح بكده
- المساحة قدام السواق ممتازة ومريحة جدا للوحوش اللي زيي (رجع الكرسي على الآخر وارفع الدركسيون على الآخر وحتحس إنك ملك).
متفق معاك برده بسبب طول العربيه
- تقفيل العربية ياخد جيد مرتفع ( أفضل من اللوجان والفيرنا واللانوس لكنه أسوأ من اللانسر و اللي أعلى منها). قصدي بالتقفيل خامات التابلوه والشكل العام ليه.
طيب حضرتك بتقارن بفئه سعريه مختلفه انا راكب عربيه ب 120000 ج مش اقل من كده انا محتاج تقفيل محترم ومعلومه الانسر اول فئه 130000 ج وتقفيل كويس مش وحش
- الكراسي مريحة و إن كانت بتبقى أفضل وأكتر راحة مع الفرش الجلد (خصوصا لو حيبقى فرش مع تنجيد إضافي).
الكراسى صغيره شويه بدليل ان فى ناس كتير بتروح عند جينز كار تعمل فرش جلد وتعرض بتنجيد زياده وحضرتك ممكن تسال فى جينز كار
- الكاسيت والسماعات فوق الممتازين.
متفق معاك
- التكييف ممتاز.
متفق معاك مع توضيح فكره فصل الكومبروسر كل 20 ثانيه بدون وجود حساس لمده درجه التسقيع داخل العربيه
- إضاءة التابلوه مريحة جدا بس كان ينقص زرار التكييف (اللي بيظيط الهوا ييجي من بره ولا يتم تدويره داخليا) انه يتضاف اليه إضاءة.
متفق معاك
ثالثا: الكاوتش:-

الكاوتش أديله جيد جدا لكن يعيبه 3 حاجات من وجهة نظري:-
اذاى ادى للكاوتش جيد جدا وهو فى اكتر من عيب
1- إنه صيني ( وأنا لا أثق في الصيني).
زى ال...........
2- نقسته واسعة وده بيخليه ياخد الزلط ويخبطه في العربية من تحت ( صوت الخبط بس هوا اللي بيدايق لكنه ما بيسببش أي مشكلة فنية).
بيعمل صداع بس
3- ناشف وده بيحسسك بكل حاجة على الأرض وكمان بتسمع صوته على الأرض زي الرحايا اللي بتلف لو الأرض تحتك محببة ( وده مزعج لشخص زيي بيحب الهدوء).

رابعا: أداء العربية:-

- العربية في بداياتها ( لحد ال4000 ) بتحس انها مكتومة وسحبها مش عالي لكن بعد كده الكتمة ديه بتروح والسحب بيتحسن جدا.
متفق معاك
- صوت الموتور هادى ومع طول الاستخدام بيهدى أكتر.
بيهدى بسبب سير الكاتينه جنزير بعد التسخين الصوت بيهدى لكن لو الصبح هتسمع صوت الموتور كويس جدا
- الفرامل ممتازة جدا ( والحمد لله أنا ماظهرتش أي مشاكل عندي لا الصاجة ولا الطنابير ولا التيل وده من فضل ربنا عليا لاني كنت حأزعل جدا).
ربنا يكملهالك على خير وماتشتكيش منها ابدا لكن التيل والطنابير الهندى اسواء ما فى العربيه

خامسا: متفرقات:-

- الجسم الخارجى كمتانة ممتاز مقارنة بالعربيات السيدان اللي في السوق ( أعلى في المتانية من اللانوس والفيرنا والميجان لكنه أقل من اللوجان والسكودا واللانسر)
لا انا مختلف معاك تمام جرب وشوف الكبوت واسمع صوت الرنه فيه وانتا تعرف
- زوايا الرؤية والمرايات الجانبية والخلفية ممتازين.
- إضاءة الفوانيس ممتازة تماما للرؤية الليلية.

أخيرا .... ممكن تشتري الصني وتكون مفيهاش عيوب صناعة فاحمد ربنا وانبسط بيها لانها تستحق فعلا كل قرش دفعته فيها.
وممكن تشتريها ويكون فيها عيوب صناعة فبرضه احمد ربنا وبص للمشاكل على انها مهما طول وقتها حتتحل في النهاية والعربية تبقى سليمة وتنبسط بيها.

أما بالنسبة لمشاكل التيل اللي حيبقى يحتاج يتغير بشكل أسرع من بقية العربيات فالحل انك تجهز نفسك ماديا ونفسيا لده وتدعي معايا انهم يغيروه بنوع أحسن يعيش معانا وقت أطول علشان مانفضلش ندفع كتير طول ما احنا مالكين العربية.

يا رب يكون التقرير مفيد ولو حد محتاج يسأل عن أي حاجة إن شاء الله أجاوبه عليها وأوضحها له.

تحياتى ليك وارجوا عدم الزعل من رايى
ربنا يديلك خيرها ويكفيك شرها

المشاركة الأصلية كتبت بواسطة ehabnour

100 100 كلامك تمام قوي وربنا يكفيك شرها انا ان شاء الله المفروض انى استلمها الاسبوع ده ففي سؤال ايه احلى لون فيها انا اخترت السيلفر والفرش اسود علشان العيال بس الموكا فى الحقيقة غير الصور اكيد الصور احسن

اللون السيلفر جميل جدا فعلا يا باشا ... ربنا يباركلك فيها إن شاء الله

المشاركة الأصلية كتبت بواسطة theislamic

شكرا على التقرير الممتاز ........ و ربنا يباركلك فيها و يرزقك خيرها و يكفيك شرها

اما اللون فانا شايف السيلفر او الفضي شكله جميل جدا على العربية و كمان الرمادي

العفو يا باشا

المشاركة الأصلية كتبت بواسطة motor head

انت ركبت العربيات اللى انت بتقارن الصنى بيها

زى الانوس فيرنا و اللوجن ولا بتقارن على اى اساس

و انا مش فاهم نقطه استخدام ضغط الهواء للحفاظ على الاتزان يا ريت تشرحها

اللى اعرفه ان العربيه الثابته متتهزش اما تعدى جمب المقطورات يعنى مش طبيعى ولا حاجه

أنا فعلا ركبت كل العربيات اللي اتكلمت عليها في التقرير من خلال قرايبي وأصحابي ومقارنتي بناءا على تجربتي معاهم كلهم.

فكرة التصميم الايروديناميكي ان جسم العربية يكون فيه مجموعة من الانحناءات الغرض منها تقليل ضغط الهوا على أماكن معينة في الجسم وتكبيره في أماكن تانية بحيث كل ما زادت سرعة العربية كل ما كان تأثير الهوا في الثبات بتاعها أكتر.
ممكن تلاحظه مثلا في الصني في السقف حتلاقي انحناءات معمولة علشان وانت سايق الهواء يضغط على العربية فتستقر على الأرض.

أخيرا معلومة ان العربية الثابتة متتهزش اما تعدى جمب المقطورات فأنا حدود علمي ان ديه معلومة غلط.

المشاركة الأصلية كتبت بواسطة janagabr

الف مبروك وربنا يباركلك فيها

الله يبارك فيكي