المأساة المعتادة: اسمنت + سلك مواعين

**MoMaDoW** · 10-09-2013 09:06 AM

زي ما انا كاتب كده في العنوان. وقع على العربية اسمنت من حد بيعمل شغل في بلكونته باين ولا ايه. المهم، رحت لواحد وعملها بسلك مواعين. دلوقتي العربية دهانها باز. موصلش للصاج. بس حتت بقت فاتحة وحتت غامقة واثار السلك مريعة على جسم العربية. طبعا الازاز ملوش حل هاعيش بيه وخصوصا الازاز الفيميه بتاع العربية. اتخربش برده جامد.

دلوقتي اعمل ايه؟ غير ان العربية فيها طبعا شوية خرابيش في اماكن متفرقة. انا رحت لا جاراج اللي في سموحة. قال لي هياخد ٥٥٠ جنيه عشان يشيل الاسمنت اللي لسه باقي. يعني شوية نقط هنا وهنا. ويوحد لون العربية كله. الخربوش اللي واصل للصاج مش هيعرف يداريه بالكامل بس بيقول هيخلي شكله احسن. وهيلمع العربية ويشمعها.

انا مستكتر المبلغ جدا وحاسس اني عايز اروح لحد متخصص بتاع تصليح خرابيش وتصليح دهانات لان لا جاراج اصلا مركز تنضيف مش متخصص يعني.

طبعا انا ساكن في اسكندرية فعايز حد في اسكندرية. بس عايز اللي يقرا ويكون واجه مشكلة مشابهة يديني رايه برده. وشكرا مقدما.

**tutankhamoun** · 10-09-2013 09:55 AM

أنا قبل كدا وقع على عربيتي القديمة أسمنت من بلكونة برضه

سبته ... و مع الغسيل اليومي ..... الأسمنت وقع لوحده بعد حوالي شهر
كان كل يوم شوية يقعوا و هكذا لغاية شهر كدا تقريبا ..... الأسمنت راح لوحده
و لكن لازم تمشي عليه مياه كل يوم من غير ما تدعك الصاج ...مياه بس .

دي تجربتي مع الأسمنت .

**MoMaDoW** · 11-09-2013 07:21 AM

دلوقتي الاسمنت اتشال فعلا بسلك مواعين. اعمل ايه في الدهان؟

**tutankhamoun** · 11-09-2013 07:34 AM

المشاركة الأصلية كتبت بواسطة momadow

دلوقتي الاسمنت اتشال فعلا بسلك مواعين. اعمل ايه في الدهان؟

بصراحة مش عارف ؟؟

**saddam** · 11-09-2013 09:04 AM

صديقي المواطن الموضوع بسيط حتتسحق العربية سحقة.خفيفة جدا وتجيب أغلى نوع ورنيش وتدخلها الفرن تديها وشين ورنيش وكل حاجة.حنرجع زيرو وأحسن من الفبريكة والموضوع ده حيكلفك أقل من 900 جنيه أما لو.عايز إنت تعمل حاجة.أرخص وتعملها إنت فتجيب من كارفور بولش ألوان سوناكس أقرب لون لعربيتك حتغسل العربية وتعملها بالبولش ده واما تخلص تيجي عالنقر دي وتمشي عليها القلم اللي مع العلبة حيملا معاك الحفرة تسيبها تنشف شوية بعديها تبولش الحته حوالين النقرة لغاية متستوي معاك وموضوعك بسيط ولو صعب عليك وديها ﻷي بوهيجي وإشتريله سوناكس ده وأوقف فوق راسه وإديه 80 جنيه و3 ساعات حيخلصهالك وموضوعك بسيط ودمتم للنضال

**NaderNabil** · 11-09-2013 09:32 AM

أثار الأسمنت الملتصقة بدهان السيارة ممكن إزالتها بمحلول خل مخفف

هات بخاخة مياه و إملاها نص خل طعام و نص مياه...و بعد كده تبتدي ترش على المكان اللي فيه الأسمنت الملتصق و سيبه يتوغل...بعد كده تستخدم فوطة ناعمة و تمسح هتلاقيه طلع معاك علطول بدون أي أثار و لو في صعوبة أعد الرش مرة أخرى و ممكن تزود نسبة الخل في المحلول