بص يا باشا ومن الآخر .. أنا مقدر جداً الحيرة اللي أنت فيها اللي أساسها نظرية اقتصادية وهي الندرة في المقدرة المادية والاحتياج لأفضل مواصفة (مش عاوز ترمي فلوسك في أي حاجة وترجع تندم عليها بعد كدة) .. من خلال النقاشات اللي دارت اكتشفت أنك عاوز تفضفض معانا في الكلام أو تفكر بصوت عالي معانا .. ودي شيء كويس في حد ذاته لأنه ما خاب من استشار .. ولكن صدقني أصل الاختيار هو أنت مش بناء على نصيحة فلان أو علان .. وأنا عن نفسي مقدرش أشيل ذنب أني أوجهك لماركة معينة وترجع تقول بينك وبين نفسك فلان هو اللي ورطني فيها .. لو حابب ماركة معينة لو فيها العيوب الطين حتكون من جواك متغاضي عنها .. إنما لو اشتريت بناء على نصيحة أحدهم وأنت مش راضي عن العربية وجه كاوتش العربية نام منك في السكة حتقعد تلعن اليوم اللي اشتريتها فيها واللي وجهك ليها .
زي ما قال أحد الأعضاء طبعاً الياباني ياباني حتى لو تقفيل جنوب أفريقي أو تركي .. وكذلك الأوروبي لا غبار عليه .. بس حتعمل أيه العين بصيرة والأيد قصيرة .. والزيرو زيرو برضه وله بريقة .
وزي ما قلت ليك قبل كدة .. جميع العربيات التقفيل المصري عيوبها واحدة .. وهي دقة وجودة التقفيل بالإضافة إلى رداءة المكون المحلي إلى حد ما زي كاوتش الأبواب مثلاً .. وبما أنها عربيات اقتصادية بالتالي مش حتلاقي جودة للخامات .
بالنسبة لنقطة الدهان .. علشان نقطع عرق ونسيح دمه .. برضه جميع السيارات التجميع المصري الدهان بتاعها سيء وفنش الدوكو مش أد كدة .. وده حتلاقيه في البي واي دي واللانوس والفيرنا والأفيو إلخ .. بس مش معنى كدة أن العربية حيحصل ليها بارومة (مشفتهاش في عربية من دول لغاية دلوقتي) .. وزي ما قال أخي المواطن قشرة الدهان ضعيفة بالفعل بس الصاج مش حيفتح بارومة لأنه في الأصل ومن المفروض معالج ضد الصدأ (مش زي العربيات القديمة 128 ، 131) .. ممكن لما البوية تكشف الصاج لونه يغير نتيجة عوامل الجو وغسل العربية .. وعلى فكرة الموضوع ده راجع في الأساس لعدم وجود خط دهان " ألبو " في مصر حتى الآن .. وعلى حد علمي الخط ده كان موجود في المرحومة النصر للسيارات .
أنا شايف أنك ميال من جواك للبي واي دي بس محتاج للي يأكد ليك اختيارك ويأيده .. وده عن نفسي مش حعمله معاك أو مع أي عضو .. وأكيد وللمرة التانية الاستخارة هي استشارة وتوكيل لله سبحانه وتعالى لتوجيهك لما يناسبك فهو الأعلم الخير فين .. أعمل استخارة على البي واي دي والله لو فيها خير ليك حتلاقي الأمور ماشية زي الفل .. لو مفيهاش حتلاقي الموضوع اتعقد وممشيش ..
خالص تحياتي
المفضلات