الموضوع: انا اتجننت و حانتحر يا رجالة يا تلحقوني يا متلحقونيش !!!

المشاركة الأصلية كتبت بواسطة أحمد جودة

واحدة واحدة وركز شوية وشوف انتا عاوز اية من العربية بمعني عاوز ماركة ولا توافر قطع غيار ولا مصاريف قليلة لو حابب العربيات وبتحب العربية تفضل معاك مترة طويييييييييلة من غير تنطيط وبيع وتغير يبقي فكر فى حاجة يعتمد عليها ........ مش هتكلم كتير ((( البيجو فرنساوي ---- سكودا ألماني ---- او اي عربية ماركة محترمة )))

تحياتي

يا استاذ احمد حضرتك انا عايز عربية :

1- سعرها حدود 90 - 105 بالتقسيط .
2- تكييف و اتوماتيك.
3- سعر اعادة البيع و ماسك نفسه.
4- تبقى سهلة في البيع مش تقيلة ومرغوبه .
5- توكيل محترم .
6- معمرة وقليلة الاعطال والعيوب.
7- قطع الغيار رخيصة ومتوفرة .
8- صالونها كبير ومريح .
9- سيدان مش هاتش باك .

الفرنساوي والالماني غاليين اوي وحيبقى حجمها صغير لو بالسعر دة ده غير قطع الغيار غالية والاعتبارات الاخرى لاعادة البيع انا مش بفكر ابيع بس بردوا الواحد ما يعرفش الظروف اية يمكن تطلع عربية تانية تعجبك او لظروف تبيعها ساعتها بتفكر انك ما تخسرش كتير وفي نفس تتباع بسرعة. ومش معقول اجيب مستعمل لاني ما اضمنش العربية تبقى عاملة زي البطيخة .

المشاركة الأصلية كتبت بواسطة bassem.naguib

تصحيح بسيط .. العربية الأوتوماتيك بالفعل فتيسها ياباني الصنع .. ولكن الموتور متسوبيشي صيني الصنع تحت إشراف شركة متسوبيشي

جميع السيارات التقفيل المصري (مش البي واي دي بس) يوجد بها عيوب في التقفيل ..

نصيحة لوجه الله .. أعمل استخارة قبل أي شيء .. وإن شاء الله ربنا حيوفقك للاختيار الصحيح .. وده كله لما تحدد أنت عاوز أيه بالظبط من العربية .. يعني هات ورقة وقلم وأكتب أنا عاوز من العربية كذا وكذا وكذا .. وشوف أي ماركة حتناسبك في الكلام اللي أنت كاتبه ده .

وفي الأخر برضه حتلاقي أن المادة هي اللي بتحكم في القرار لأنه أكيد أي حد حيكون عاوز أحسن مواصفات بأقل سعر .. وده مش حتلاقيه إلا في العربيات الصيني .

وأفتكر دائماً أن أي عربية ليها عيوب ومميزات واللي بيرجح اختيار الشراء هو المقدرة المادية وهي اللي بتخليك تتغاضى عن عيوبها أو تتعايش معاها .

استاذ باسم انا كنت خلاص ماسك السكينة وحقطع الوريد ... انا من اشد المعجبين بتعليقاتك و شكلك انت الى حتعقلني والله وترجعنى لصوابي مهى المشكلة ان المادة الى بتحكم الواحد بس مهو مبلغ بردوا ومش معقول ترمي فلوسك في اي حاجة والسلام وانا شوفت تعليقات لحضرتك بالنسبة لموضوع الصدا والبرومة والدهان خلتنى افكر كتير جدا وقلقتني وانا كتبت احتياجاتي في العربية يا ريت لو تنصحوني اقدر اجيب اية زيرو بالمبلغ دة ومبقاش ندمان واقول يا ريت واغنى ظلموة

المشاركة الأصلية كتبت بواسطة A.Saad

انا ركبتها تاكسى من كام يوم
كانت عاملة 6400 كم
بس عجبتنى فى تسارعها وعفشتها طرية

مهو ده الي مجنني انا حابب العربية ونفسي فيها ... زي اكنك شوفت عروسة وقالولك ديه شعرها خشن و عرجة ساعتها يا حلو غسلت سنانك بسجنال 2 النهاردة

صديقي المواطن خد.البي واي دي وريح نفسك كل عيوبها طبيعية ومقبولة ومفيش مشاكل في البيبان واﻷفلام دي أما صدا وبرومة فمفيش الكلام ده ولكن القشرة.الخارجية للبوهية خفيفة إلى حد ما وقطعها زي الرز في التوفيقية ودمتم للنضال

المشاركة الأصلية كتبت بواسطة eng.mina

انا حارد علي حضرتك في نقطة الفيرنا بكل حيادية موضوع تربيط العفشة ده كلام اول مرة اسمعه مع العلم العربية معايا من الزيرو من 2007 وعاملة دلوقتي 94000 كيلو وعمري ما ربطت العفشة الخلفية باستمرار زي ما الناس بتقولك يعني تربيط كامل للعفشة علي فترات طبيعية جدا زي اي عربية وبالنسبة لموتورها هو ممتاز جدا ومحصلش منه اي مشاكل الحمد لله طالما محافظ علي صيانتها وطبعا اكيد حضرتك عارف موضوع توافر قطع الغيار ودي من احسن مميازتها نيجي للعيوب بأه :
1- الصالون فعلا ضيق زي ما الناس قالت لحضرتك مش مريح لو العربية دايما بيركب فيها ناس علي الكنبة الخلفية وحضرتك من هواة رجوع كرسي السواق للأخر زيي كده .
2- بعض عيوب التقفيل ودي نسبية من عربية للتانية .
3- موضوع الحكات ده عالجوه في الموديلات الجديدة العربية بقت أعلي و صغروا علب الشكمان اللي في النص والاخيرة فمش حتحك غير في مطب غبي وده طبعا لو راكب ناس كتير في العربية و فيها شنط وكده .
4- رعشة علي السرعات العالية من 120 وانت طالع مش لاقيلها حل مع العلم غيرت الجنوط لجنوط سبور تايواني وركبت كاوتش بريدجستون ولسه برده نفس الموضوع يمكن المشكلة دي في عربيتي بس وانا كيفت نفسي عليها .
وده ملخص تقرير عنها بس بالامانة رغم عيوبها بس عربية اصيلة وعمرها ما عملت حركة نقص اهم حاجة المحافظة علي صيانتها من البداية

صديقي المواطن الحبيب
بعد إذن صاحب الموضوع
مفيش حاجة إسمها رجة وتتعايش معاها هناك 3 أسباب لعمل إرتجاج في عربية سحب أمامي
أولا لو مش بترصص في مكان محترم كل شهرين
ثانيا.لما غيرت الجنوط فضلت الرعشة ولا زادت عشان أحيانا بيبقه فيه فراغ في نص الجنط ومحتاج تعمل له حلقة ألمنيوم أو.فلنشة صغيرة تفلون عند الخراط
أما السبب الثالث وهو.اﻷعم الراجح عندك الشفت بتاع الكبالن مش مظبوط وده بيتغير وده رعشته بتكون في السرعات ورعشته بتكون دبدبة لفوق وتحت أما رعشة الترصيص فهي شمال يمين موضوعك بسيط وتبا للمستحيل ودمتم للنضال

Mecha

انا معاك ان الياباني حلو طبعا بس للاسف سعرة حراق ثانيا حاجة زي كورولا مثلا مش ياباني والبي واي دي ماتورها ماتسوبيشي و فتيسها ياباني فاعتقد طلما التقفيل بقى مش ياباني يبقى ما بقتش تفرق .

استاذ jojojojo - shawke hamed

مين يشهد للعروسة هههه الفيرنا حلوة بس العربية صالونها ديق ما تنكرش وده الي مضايقني فيها بغض النظر عن عيوبها التانية زي الشنطة عدم الثبات على السرعات العالية ده غير تقفلها ومفهاش اوبشن زي الحساسات الخلفية مثلا ده غير ان ماركة الفيرنا في مصر بس على حد علمي وهى الاكسنت القديمة موديل 2004 لكن عالميا الموديلات مش معروفه زي الاكسنت - النترا - سوناتا - ايزيرا .

وعلى راي الشاعر الكبير .. سلمني نضيف اسلمك نضيف .

ونرجع ونقول تاني اشتري ااااااااايه يا عفريت الاسفلت ... حد يقولي قبل ما اتجنن ...حادي بادي كرمب زبادي شالوا وحطوا كلوا علادي

متابع

معلش عندى استفساريييين
أولا هو ليييه محدش اقترح الشيفرووووليه؟؟؟؟؟؟
مع إن فيها كل اللى حضرتك طالبه من مواصفات
1- سعرها حدود 90 - 105 بالتقسيط .(اللانوس أقل من كدة والأفيو من غير تقسيط بنفس السعر)
2- تكييف و اتوماتيك.(هاتلاقى)
3- سعر اعادة البيع و ماسك نفسه.(شعبية ومنتشرة)
4- تبقى سهلة في البيع مش تقيلة ومرغوبه .(برضه شعبية ومنتشرة)
5- توكيل محترم .(ما افتيش فيها)
6- معمرة وقليلة الاعطال والعيوب.(معايا زمايلى فى الشغل ما اشتكوش من أعطال كتيرة مع ملاحظة مشوار الشغل رايح جاى من 50 إلى 60 كم يوميا)
7- قطع الغيار رخيصة ومتوفرة . (نسبيا)
8- صالونها كبير ومريح .(أعتقد)
9- سيدان مش هاتش باك . (ما افتكرش فى منهم هاتش باك)
ثاني استفسار
أنا واخد بالى انك بتدور على نوع العربية وناوى تقسط
إذن أعتقد انك عارف هاتقسطها ازاى
أنا بقى عارف العربية بس مش عارف أقسطها ازاى وفين
مستنىرد حضرتك فى الاستفسارييين