الموضوع: مروحة التكييف

المشاركة الأصلية كتبت بواسطة borio1704

ثرموستات الكوعة هو الوسيلة الوحيدة للوصول والمحافظة على درجة حرارة الموتور ثابتة أثناء التشغيل من غير ما تتأثر بحرارة الجو الخارجي أو سرعة العربية


طيب ليه الناس بتقول نلغي الثرموستات لو العربية فيها مشاكل سخونية؟؟

مشكلة ثرموستات الكوعة إنه ممكن يعطل وما يتحركش، وغالبا بيعطل في الوضع المقفول (أو النص مقفول)، وفي الوضع ده المية مش هتتبرد بما يكفي في الرادياتير



بس أهم ميزة في ثرموستات الكوعة إنه بيساعد كمان على التبريد المنتظم للموتور.... لوشلته الموتور مش حيتبرد كويس، وهتبقى السلندرات الأمامية (القريبة من الثرموستات) باردة والسلندرات البعيدة سخنة زيادة عن اللزوم.



ده غير إنك في الشتا لو سقت على طريق سريع ... الموتور هيبرد، وده هيزود استهلاك البنزين لإن كفاءة الحرق ما بتكونش مثالية، وممكن تخلي العربية تهبب من الشكمان

طيب ليه درجة حرارة التشغيل لازم تبقى ثابتة؟؟


الموتور عبارة عن أجزاء معدنية، والمعادن بتتمدد بالحرارة... وتنكمش بالبرودة
لما الموتور بيبقى بارد.. الأجزاء الداخلية بتبقى منكمشة بطريقة ممكن ما تبقاش محسوبة .. وده بيعمل تآكل ما بين الشمايز والبساتم وعمود الكرنك ده غير إن الزيت ما بيكونش وصل للزوجة الصحيحة للتزييت.


من الآخر... الموتور البارد موتور بيفوت بسرعة.
------------------------------------------------------------------------------








طيب إيه أهم أعطال الثرموستات؟؟

الثرموستات لما يعطل معناه إنه ما بقاش يعمل المطلوب منه.. إنه يفتح ويقفل مع تغير درجة حرارة المية..

فممكن يعطل وهو مقفول... وفي الحالة دي يبقى الشمع اللي جواه اتسرب.. في الحالة دي لازم الثرموستات يتغير فورا.
وغالبا... الحكاية دي بتخلي الموتور يسخن قوي ، ولازم نشيك على ثرموستات الكوعة قبل ما نصلح العطل الأساسي اللي سبب السخونية القوية دي.


أو ممكن يعطل وهو مفتوح (أو نص مفتوح)، وعادة دي بتحصل لما الصدا يكتر في مية الرادياتير ويحصل ترسبات على الثرموستات تخليه يتحجر...
وهنا غالبا العربية مش هتسخن كويس... في الحالة دي لازم نغير الثرموستات وننضف دايرة التبريد كويس ونحط ميه خضرا.





وازاي أعرف إن الثرموستات ده شغال كويس ولا لأ؟؟؟؟

الموضوع سهل وعلى 3 خطوات
بس الأول هنبقى محتاجين نخلع الثرموستات ونعرف درجة حرارة التشغيل اللي مكتوبة عليه

1- لما نخلع الثرموستات ونسيبه في درجة حرارة الغرفة العادية.. المفروض نلاقيه قافل كويس
2- نجيب حوض ميه ونسخنه لحد 15 درجة مئوية قبل درجة حرارة التشغيل... يعني لو ممتوب عليه 90 درجة نسخن لحد 75 بس... ساعتها المفروض يفضل مقفول برضو.
3- نسخن المية لحد درجة حرارة التشغيل... ساعتها المفروض يبقى مفتوح على الآخر.


لو لقيت إن أي خطوة من التلاتة دول مش مظبوطة... يبقى لازم نغير الثرموستات


ملحوظة: فيه بعض أنواع الثرموستات ممكن تتظبط يدوي... وكان عندي منه في الكريسيدا.




أنا عامل الموضوع ده أساسا عشان الأسطورة الشايعة اللي بتقول: " ثرموستات الكوعة للدول الباردة بس"

------------------------------------------------------------------------------

الدول اللي الجو عندهم بارد مشاكلهم في المية ... مش الثرموستات... لإن المية بتجمد في الشتاء، وحتى لو الثرموستات موجود وشغال كويس، المية بتبقى متجمدة في الرادياتير ... وبرضو الموتور بيجيب وش سلندر علشان بيسخن ومفيش ميه دخلت تبرده (ماهي متجمدة في الرادياتير)

المشكلة دي بتتحل عندهم بإنهم يحطو مية خضرا في الرادياتير

إنما ثرموستات الكوعة شغلته إنه يحافظ على درجة حرارة التشغيل ثابتة من غير تأثر بالجو الخارجي، يعني لما تمشي في الزحمة العربية ما تسخنش، ولما تسوق على الصحراوي العربية ما تبردش.

كون إن العربية مش بتسخن بسرعة ده مش ميزة... ده عيب ... زيه زي سخونية العربية.... بس زي ما قلت قبل كده... تأثيره مش بنحسه مباشرة... إنما هتضطر تعمر موتورك قريب



وأكبر إثبات على كلامي... ليه العربيات في الخليج (اللي جوهم أحر جو في العالم) ما بيشيلوش الثرموستات من عربياتهم؟؟؟؟؟

------------------------------------------------------------------------------

لإن ببساطة.... ثرموستات الكوعة مظبوط على درجة حرارة التشغيل... مش درجة حرارة الجو، فمهما اتغيرت درجة حرارة الجو ساقع أو سخن... هيفضل الموتور سخن ويديك أعلى كفاءة تشغيل وعمره يطول.

على فكرة ... الفرق ما بين الدول الباردة والساخنة في دايرة التبريد بيبقى أساسا في الرادياتير... مش في الثرموستات




ملخص الكلام


إلغاء ثرموستات الكوعة ده اختراع من الميكانيكيين المصريين عشان يريحو دماغهم من مشاكل سخونية العربيات، يمكن يبقى له أسبابه لما قطع الغيار ما تبقاش موجودة.

بس لما تشيل الثرموستات.. هتفوت موتورك وتصرف فلوس زيادة على البنزين وكمان مش هـتتمتع بأداء العربية

http://www.nilemotors.net/Nile/328708-a.html

الموضوع دا هيفيدك,
أنا حطيت لك خط تحت الحاجة اللي عايزك تاخد بالك منها,,
------------------------------------------------------------------------------