الموضوع: الفرق بين 240 و 244 فولفو :)

المشاركة الأصلية كتبت بواسطة benmatar

الفولفو 240 و 244 عربيات محترمة جدا جدا وممتازة من نواحي كتير زي: متانة المحرك وقوته، الصاج المتين جدا، صالون واسع ومساحات تخزينية، شنطة كبيرة، ثبات في السرعات العالية والدورانات، عالية عن الأرض، دفع خلفي، قطع غيار معمرة
بس من ناحية إعادة البيع فهي صعبة حبتين تلاتة إلا لو حد غاوي، واستهلاك البنزين عالي لو مشاويرك كلها وسط البلد وداخل المدينة، أما لو حياتك كلها سفر فالإستهلاك عادي والموتور بيشتغل 80و 90 و92 معندوش مشاكل
العربية دي متشتريهاش إلا لو سليمة ومش متهانة (يعني اشتريها استخدام باشاواتي زي ما بيقولوا وهتلاقي)
منها كذا موتور اشهرها الموتور الأبيض العادة كربريتور 2300 اوائل الثمانينات، والموتور الأسود 2000 وأغلبه حقن الكتروني اواخر الثمانينات واوائل التسعينات، وموتور ثالث قديم معليهوش طلب بيكون 1899 او حاجة زي كده بيقولو عليه الماكينة الصغيرة ومش محبذة، وماكينة تانية 2100 مش قوي برضه من ناحية وفرة قطع الغيار والصيانة
العربية دي ميزتها إن شاسيه السبعينات هو هو لغاية اوائل التسعينات ودي ميزة لراغبي التعديل، وقطع الغيار الاستيراد مرطرطة في بورسعيد والوكالة واسعارها منافسة على غير المتوقع
بس لما تشتري لازم تعرف العربية متعدله ولا على ابوها
وبكرر إن المهم إن شاسيه العربية يكون 100% مش 99
عندي صديقين واحد معاه 240 والتاني 244
الاتنين واحد بس 240 هتلاقيها أشيك شوية (وجهات نظر) فانوس خلفي اعرض والكابوت بيسموه البومه شكله اشيك، بس كله بيركب على بعضه واللي معاه 244 خلاها زي 240 التسعينات
آسف للإطالة بس حبيت انقل لك معلوماتي البسيطة، بس لازم تعرف إن ليها ميكانيكية معينة واعطالها نادرة فعلا لو العربية سليمة
بالنسبة للسعر بيكون فيه تفاوت كبير بداة من عربيات تلاقيها تعمل 17 و18 ألف لغاية عربات تعمل 40 ألف.
ولو غاوي وعندك نية ووقت ممكن تشتري واحد 79-80 مثلا قديمة أو مركونة (شاسيه سليم زي ماتفقنا) وتاخدها تشدها من الألف للياء كل كل حاجة وتبقى معدل تسعينات اوتو كاملة أم موتور اسود انجكشن وصالون جلد ومفيش بعد كده هتقف عليك كلها في الثلاثينات بس راكب عربية ملهاش مثيل، وبالتوفيق

تسلم ايدك يا كبير :)
انت كده جبتلي المفيد كله
جزاك الله كل خير