اقتباس المشاركة الأصلية كتبت بواسطة hdabawy مشاهدة المشاركة
لأ ما فيش ضامن بتجيب مفردات مرتب من جهة العمل (عام أو خاص) وبياخدو بياناتك وبتدفع 100 جنيه استعلام وبيجي مندوب من الشركة يقابلك وبيسأل شوية اسئلة روتينية مثلا عند دخل خاص غير العمل الزوجة ان كنت متزوج بتعمل طيب مرتبها كام وهكذا
وبرده مافيش نقل مرتب هم بيبعتوك لبنك معين ولأقرب فرع ليك بتفتح حساب بإسمك ويسلموك دفتر شيكات وبتروح كل شهر تودع القسط فى حسابك فى البنك ده والقسط بعد كدة بيتحول لحساب كونتاكت
الشيكات بقى انت بتمضى على شيكات حسب القسط يعنى انا مثلا مضيت 10 شيكات بمبلغ مجموع القسط والقسط على 60 شهر وكل 6 شهور من دفع الاقساط بروح الشركة آخد شيك ومع نهاية الاقساط بتاخد آخر شيك
بس فيه نقطة ناس كتير ما بتحبهاش وهى انك بتعمل توكيل لشركة كونتاكت بس انا شايف ان الموضوع ده عادى لأن الشركة فى الآخر بتضمن حقها وعند سداد الأقساط كلها خلاص بيتلغى التوكيل
فيه بعض البنوك بتاخد نسخة من مفتاح العربية لكن كونتاكت مابتعملش كدة
وطبعا الرخصة بتبقى بإسمك لكن عليها حظر بيع لغاية ما تدفع الاقساط
ولم ترخص العربية الترخيص بيكون سنوى ........ اول مرة لما تستلم العربية بيروح معاك مندوب بيخلص الترخيص بعد كدة كل سنة بتروح فرع كونتاكت وبتاخد جواب ترخيص وترخص انت العربية
وفروع كونتاكت فيه فرع فى الزمالك وفرع تانى فى اول مصر اسكندرية الصحراوى قبل البوابات على الشمال
وأى استفسار انا فى الخدمة