طلب من اصحاب اللادا (سمارا الجديده - كالينا - 2110 الخ الخ )

**mohammed dodda** · 23-10-2013 01:06 AM

المشاركة الأصلية كتبت بواسطة hanyaziz

اخى الفاضل بعد التحية
ملاحظات التقفيل المصري عموما ولاغلب انواع السيارات المجمعة محليا هى فى الفنش النهائى للكابينة من الداخل (الصالون) على سبيل المثال وجود فاصل بين فرش الباب ووصاج الباب نفسة اوفراغ بين التابلوة والبربريز الامامى وغيرها من الملاحظات البسيطة التى يكتشفها المدقق دة غير انى المصرى بتنزل ب2 قزاز كهرباء امامى ومجهزة ب 2 خلفى اما الروسي فغالبا بتنزل ب 4 زجاج كهرباء دة على حد معلوماتى

.....لك جزيل الشكر يا أخ هانى و على فكرة معظم معلوماتى عن ال110 اخدتها منك بصفتك من ملاكها وأحب أضيف على كلام حضرتك ان اهم فرق للروسى عن المصرى انه 1500 2 كامة 16 صباب بيطلع قدرة حصانية اعلى من المصرى ال1600 واحد كامة 8 صباب....فيه معلومة مش متأكد منها ان المصرى على اسكترا باور لكن الروسى نازل بباور فعلى وياريت حضرتك تاكدلى المعلومة

**HanyAziz** · 24-10-2013 02:00 AM

الاخ محمد شكرا لحضرتك وفعلا الروسى 1500 سى سى بس بيطلع قدرة حصانية اكبر (110) حصان اماالمصرى 1600 سى سى بينما القدرة الحصانية اقل (86) حصان وبالنسبة لموضوع الباور اعتقد المصرى والروسى على اسكترا بس ممكن تلاقى البعض بيلعب بالالفاظ عند العرض للبيع فنقول سيمى بور اوهاف بور انما فى الحقيقة هناك فرق كبير فى الاداء بين البور الكامل والهاف وانا تحت امركم فى اى معلومة كما انى ملم ببعض الاعطال الشائعة عنها وشكرا

**hazemsherif2000** · 25-10-2013 12:14 PM

المشاركة الأصلية كتبت بواسطة hanyaziz

الاخ محمد شكرا لحضرتك وفعلا الروسى 1500 سى سى بس بيطلع قدرة حصانية اكبر (110) حصان اماالمصرى 1600 سى سى بينما القدرة الحصانية اقل (86) حصان وبالنسبة لموضوع الباور اعتقد المصرى والروسى على اسكترا بس ممكن تلاقى البعض بيلعب بالالفاظ عند العرض للبيع فنقول سيمى بور اوهاف بور انما فى الحقيقة هناك فرق كبير فى الاداء بين البور الكامل والهاف وانا تحت امركم فى اى معلومة كما انى ملم ببعض الاعطال الشائعة عنها وشكرا

استاذ هانى
انا عايز اشترى لادا 2110
و فى عربية موديل 2006
و عايز النصيحة
حد يكون جرب العربية دى قبل كده و يقولى راية اه ؟؟
بالنسبة للعربية اللى حالتها كويسة رنج السعر كام ؟؟؟
بالنسبة لقطع الغيار اخبارها اه ؟؟؟؟
بالنسبة للسخونه عايز اعرف رايكم ؟؟؟؟؟؟

**HanyAziz** · 25-10-2013 04:20 PM

استاذ حازم تحية طيبة وبعد
العربية لوعجباك مبدئيا من حيث الشكل والسعر لازم يشوفوها ثلاثة اشخاص سمكرى يطمنك على الدواخل والخوارج وهل فبريكة ولا راشة ودة لة دور كبير وبيحدد سعر العربية فالغالبية تفضل السيارة الغير مرشوشة
ثانيا ميكانيكى يطمنك على حالة الموتور والسحب والاداء
ثالثا عفشجى يبص على العفشة وهل هى سليمة ولا تحتاج مساعدين اوكبالن او بعض الطلبات
رابعا ودى عليك جرب العربية بنفسك فى طريق مفتوح وشوف السحب وصوت الموتور واداء التكييف وعينك على مؤشر الحرارة المفروض ميعديش ال 90 وبص على حالة الصالون من الداخل وحالة الكاوتش من الخارج لان دى حاجات ممكن تكون البعض لا يهتم بها ولكن هى مصاريف مستخبية قد تتحملها ومتكونش فى الحسبان
موضوع الحرارة يتم علاجة عند معرفة سببة الرئيسى مثلا مشكلة دورة التبريد -تسليك ريداتير - خلل بمروحة التبريد - انسداد بعلبة الشكمان وغيرها من الاسباب التى يمكن التغلب علها بس ياريت تلاحظ المؤشر بتاع الحرارة اثناء تجربة السيارة وتسيب العربية واقفة فترة وتبص بصة على المؤشر المفروض ميعديش ال90 ولاحظ عمل الثيرموستات وفصل وتشغيل مروحة التبريد بصفة منتظمة
بالنسبة لقطع الغيار مدام حضرتك من سكان القاهرة او قريب منها فلاداعى للقلق من عدم توافرها
بالنسبة للسعر النضيف يبدا من 30 الى 38 الف لموديلات 2006 و2007
وانا تحت امرك فى اى استفسار وفقك الله للخير والصالح

**Differential** · 10-02-2014 05:47 PM

دي مجموعة الSpare parts catalogs او كتالوجات قطع الغيار

دا الخاص بلادا 2113 و 2114 و 2115 اللي هيا السمارا الجديدة
LADA 2113 2114 2115 Spare Parts

دا الخاص بلادا 2108 او السمارا ال2 باب (القديمة)
LADA 2108 21089 Spare Parts

دا الخاص بالسمارا 2109 و 21093 اللي هما السمارا الهاتش باك او ال4 باب اللي منتشرة عندنا + السمارا السيدان اللي منزلتش كتير
LADA 2109 21093 21099 Spare Parts

دا الخاص بالكالينا او 1117 و 1118 و 1119
LADA 1117 1118 1119 Spare Parts

دا الخاص باللادا 2110 و 2111 و 2112
LADA 2110 2111 2112

دا الخاص بال2107 اللي مش بنشوفها على الطريق خالص :D :D
LADA 2107 Spare Parts

ملاحظات عامة:

- الكتالوجات اتعملت في وقت معين موجود في اول صفحة يعني اي تعديل على العربيات تم بعد الفترة دي اكيد مش موجود في الكتالوج والاحدث مش لاقيه على النت خالص .. وطبعا شركة لادا اصيلة جدا والعربيات ماشاء الله ماتعملش عليها اي تعديل لحد ما اتوقف انتاجها السنة قبل اللي فاتت :D

- في حالة انك لقيت رقم الجزء او الPart Number بتاع حاجة معينة موجود في اكتر من كتالوج دا معناه ان نفس الجزء بيركب .. لو فيه اختلاف الرقم بيكون مختلف .. الارقام دي للطلب من المصنع واكيد مش هيعملوا فيها غلطات

- حاول بقدر الامكان تراجع الكتالوج والواقع اللي عندك في العربية .. الله اعلم ممكن يكون فيه غلط او حاجة ناقصة في عربيتك

- معظم الاجزاء الفعلية في العربية مكتوب عليها الPart Number بشكل واضح اما كتابة بارزة او محفورة او على ستيكر مطبوع

- الكتالوج ب 5 لغات .. عشان الناس اللي ثقافتها روسي او الماني او فرنساوي او اسباني يعرفوا يقروا :D وبالنسبة للغلابة اللي زيي بتوع الانجليزي طبعا موجود .. وممكن تعمل كوبي من الملف على جوجل ترانسليت لو فيه كلمة او جملة مش فاهمها يترجمهالك .. او ممكن تسأل هنا

- الكتالوج في الاول بيشرح ازاي تستخدمه وازاي تقرا الاكواد اللي فيه .. وعربيتك بيبقى ليها رقم فرعي على حسب الاوبشن والموتور اللي راكب .. هتلاقيه مفصل الكلام دا عشان احيانا بيكون فيه اختلاف في الاجزاء بس دا مبيبقاش كتير يعني .. مجرد بس فروق الشكل

- الكتالوج مبيقولش تفك وتركب ازاي .. هوا بيقولك الاجزاء الموجودة في كل مكان ورسمة توضيحية ليها عشان لو حسيت ان فيه حاجة ناقصة او اتكسرت تعرف ايه هيا

فيه كتالوجات تانية Service Manual بيقولك ازاي تفك وتركب كل حاجة في العربية بالصور .. دا هرفعه لما ارجع من السفر باذن الله :)

**محمد ابو المجد** · 10-02-2014 07:49 PM

متابع

**amro_ahameed** · 23-06-2014 02:05 PM

اصدقاء اللادا سمارا المحترمين
سلام الله عليكم ورحمته وبركاته
احب اخد رايكم في عربية لادا سمارا 2010 - استعمال خفيف
من حيث قوه العربية - ومهم جدا ارتفاعها عن الارض عن الشوارع والمطبات اللي بنمشي فيها
وحاجه كمان مهمه هي تعمل في حدود سعر ؟؟
العربية معروضه عليا ولسه ما اخدتش قرار
نزلت سألت علي قطع الغيار في التوفيقه، البياع قال لي نصيحه ما تخدهاش، قلت له ليه؟!!، هي قطع الغيار مش موجودة، قال لي قطع الغيار غاليه، سألته يعني ايه بيكون بكام؟ قال لي الفانوس بـ 250 جنيه، المساعدين قدام 750، والمساعدين وراء بـ 450 ، وهلم جرا

رجاء من سيادتكم سرعة الرد عشان اخد قرار، علي فكره انا معايا بولونيز وقطع غيارها تكاد تكون ببلاش، يعني الفانوس كامل بـ 15 جنيه، المساعدين صيني بـ 80 جنيه جديد، والاستيراد بـ 60 جنيه وهلم جره

الموضوع: طلب من اصحاب اللادا (سمارا الجديده - كالينا - 2110 الخ الخ )

LinkBack

أدوات الموضوع

عرض

-

-

-

المواضيع المتشابهه

بخصوص اللادا كالينا 2006 ارجوكم ساعدوني

سبب رخص سعر اللادا سمارا

صور عربيتى اللادا كالينا علشان تشوفوها

لادا كالينا و لا 2110 ولا فيرنا و لا لانوس

العربيه اللادا 2110

الكلمات الدلالية لهذا الموضوع

المفضلات

المفضلات

ضوابط المشاركة