الموضوع: حد خلع ضرس مدفون

المشاركة الأصلية كتبت بواسطة Y a r i s

طب يا دكتور. عاطف. ان. دلوقتي راجع من عند دكتور
كنت رايح علشان الحشو وقع بتاع ضرسي جيه قالي : يووه يوووه يوووه ده في نفق تحت الضرس
وشوية قالي اووباااااااا ده النفق عميق عميق وواصل لحد الجدر وشوية تالته قالي يانهر ازرق ده النفق. وصل لحد العصب تحت انتا ازاي كنت ساكت عليه كل المدة دي كللها

قلتلوا في ايه يا دكتور ده انتا شوية شوية هتقلي النفق واصل لحد غزة :) المهم كلمه من هنا على كلمة من هنا فتحنا موضوع سوريا هوبا نطينا على حرب العراق هوبا قعدنا نتكلم على عبدالناصر طلع الدكتور ناصري طبعاً بما اني خر زبون في الكشف قعدت عندوا من الساعه ١٠ للساعه ١ الفجر وفضلنا نتكلم حتى واحنا واقفين على باب العيادة

المهم هو قالي عاوز يحشي العصب وهيعمل الموضوع ده على اربع جلسات. وهياخود مني ٤٠٠ جنية
فهل الي بيقول عليه الدكتور ده صح ولا لا لاني حاسس انوا. اربع جلسات كتير وهو كل جلسة هنقعد نتكلم كده ... انا حاسس بالم شديد دلوقتي ابتدى يبان وهو العصب اساساً اساساً بيتحشي ولا المفروض يتشال لو فيه تسوس !

لو انت من الأساس ومن قبل ما تروح للدكتور الوجع كان شديد ومش بتمارس حياتك بصورة طبيعية يبقى الوجع وجع عصب.

وفكرة ان الدكتور كل شوية بيقول يوووه فده عادى (بغض النظر عن اليووه نفسها) لأن الدكتور وهو شغال بيشيل التسوسات من فوق لتحت وبيشوف فى الاخر هل وصلت للعصب ولا لأ. الدكتور بس كان بيخليك up-to-date مع كل حاجة بيشوفها :)

مقدرش أتكلم عن الفلوس اللى هياخدها الدكتور لأن ده تقدير من كل دكتور لشغلة, ممكن تروح لدكتور بيعمل نفس الضرس اللى عندك ب 2000 جنية.

4 جلسات لأن ده عيادة وبيبقى الدكتور عايز يشتغل ليك ولغيرك فبيقسم الشغل على عدد جلسات تسمح بكده, بس ده ميمنعش ان بعد دخول الادوات ال Rotary لعلاج الجذور الموضوع مبقاش ياخد وقت زى الأول.

حشو عصب هو التعبير الشائع عن (علاج الجذور او Root Canal Treatment) واللى بيتم فيها ان العصب لو لسه موجود بيتشال وبيتنضف القناة الموجود فيها العصب وبعد كده بتتحشى قناة العصب (بمادة غير الحشوة العادية), وفى الحالات المتقدمة العصب بيتحلل فالعلاج بيبقى تنضيف قناة العصب وحشوها.

العصب مش بيسوس, العصب بيلتهب وبعد كده بيتحلل. عشان تبقى متخيل الموضوع, شريحة رفيعة وصغيرة من سمكة فيلية تشبه للعصب الموجود فى أسنانك.

المشاركة الأصلية كتبت بواسطة canner

هو كده المفروض ح يعملك حشو عصب و ده بياخد تقريبا من تلات الى اربع جلسات و المفروض يركبلك فى اخر جلسة طربوش لو 400 داخل فيهم تمن الطربوش يبقى كويس قوى قوى و لو مش داخل فيهم يبقى غالى

و لو مش عاوز تتكلم معاه و تضيع وقت احجز معاه فى اول ميعاد ح تلاقيه حتى مش بيتكلم معاك فى الضرس و لا حتى النفق اول ما ح يشوفك ح يقولك اتفضل اقعد و الكلمة التانية مع السلامة

علاج الجذور من أكتر الحاجات المكلفة فى طب الأسنان و 400 جنية فى علاج جذور لضرس مش كتير زى ما انت متخيل.
مش قاعدة عامة ان كل سنة يتعملها علاج جذور يبقى لازم يركب عليها طربوش. الباقى من السنة بعد ما كل التسوسات تتشال من أهم العوامل اللى بتحدد السنة محتاجة طربوش ولا لأ.
عن نفسى, انا عامل علاج جذور لسنة من سنتين ومن حاطط عليها طربوش.

المشاركة الأصلية كتبت بواسطة Y a r i s

طيب هو ايه فايدة الطربوش. لان بحياتي ما ركبت طرابيش
وبعدين بسمع ناس كتير بتقول. الطربوش وقع الطربوش مش عارف حصلو ايه ... ومن ناحية تانية الدكتور مجبش سيرة طربوش خالص هل ممكن علشان بعد ما اخلص الجلسات الاربعه. ارجع اشتكي تاني من الوجع والالم و ارجعلوا في الخامسة اشتكي فيقولي اااه كده بقه انتا محتاج طربوش وهيكلفك كمان ٢٠٠ جنية اضافية غير الربع مية الاولانين !! ... وتحياتي

وسؤال تاني معليش : دلوقتي الدكتور المصري بياخود ٤٠٠ جنية وانتا طالع. ...
طيب هو ليه مفيش دكتور سنان صيني بيشتغل في مصر ويزاول المهنة !! :)

بعد علاج الجذور للسنة مش هيكون فيه اى وجع بأذن الله, لأن العصب هو الجزء اللى بيحس من السنة وده اللى بيتشال فى علاج الجذور. ده بعيدا عن أمراض اللثة اللى ممكن تسبب وجع فى الأسنان.

السنة الطبيعية اللى لسه فيها العصب ,العاج (Dentin) بيبقى لسه عايش وده اللى بيبقى موجود تحت مينا الأسنان وبيعمل كحاجة لامتصاص القوى (زى لوح زجاج محطوط على اسفنج).
بعد علاج الجذور السنة بتبقى Non-Vital وفى الحالة ده مينا الأسنان بيبقى ساند على حاجة صلبة لأن العاج مبقاش عايش وده بيخلى السنة أكتر عرضة للكسر (لوح زجاج محطوط على زلطة) فالطربوش وظيفته هى حماية السنة من الكسر, وزى ما قلت للعضو الفاضل انها مش قاعدة عامة ان كل سنة يتعملها علاج جذور تبقى محتاجة طربوش, ده بترجع لتقييم الدكتور فى الأول وفى الاخر.

المشاركة الأصلية كتبت بواسطة gebreel

لسة عاملها من حوالي 6 شهور، هتاخد وقت شوية في العملية بس انت مش هتحس باي حاجة

عملتها و كنت كويس بعدها على طول و نص ساعة و التعب بقى مش طبيعي فلازم تاخد حد يسوقلك و انت مروح لأنك مش هتقدر

اهم حاجة تبقى جايب الادوية اللي الدكتور هيكتبهالك لأن هيبقى فيها مسكنات حقن و مضادات حيوية و لازم تتاخد بعد

العملية مباشرةهتحتاج بردو اول يوم كمادات مية سخنة و بعد كدة لمدة 3 ايام كمادات مية ساقعة

كورس الحقن هيخلص و تكمل الاسبوع بكورس مضاد حيوي اقراص

ممنوع الاكل على الناحية اللي اتخلع منها الضرس تماما لحد المدة اللي الدكتور هيحددها

اول يوم النزيف هيبقى شوية كويسيين فحاول توازن الموضوع ده بسوائل تتشرب لأنك اول يوم مش هينفع تاكل

العملية كلفتني 1000 جنيه و اخدت اجازة مرضي بعدها 5 ايام

اهم حاجة التعقيم التعقيم التعقيم

اي استفسار انا تحت امرك يا باشا =)

أول يوم بيبقى كمادات ميه ساقعة للحد من أى ورم ممكن يحصل, وفى الأيام اللى بعدها (لو حصل ورم) بتبقى كمادات ميه دافية لمدة لا تزيد عن 15 دقيقة.

فى أول يوم بعد الخلع, بيبقى ممنوع المشروبات الساخنة, المضمضة بعنف, شرب أى حاجة بشاليمو.

وزى ما سيادتك قلت التعقيم هو أهم حاجة, وعلى أساسه ان مش قاعدة عامة ان كل ما سنة تتخلع المريض لازم ياخد مضاد حيوى, المضاد الحيوى بيبقى ضرورة لا يمكن تجاهلها فى المرضى اللى عندهم حالات صحية توجب استخدام المضادات الحيوية كأجراء وقائى قبل الخلع (مرضى السكر, بعض مرضى أمراض القلب, الأمراض اللى بتقلل المناعة). لكن, فى الاشخاص الاصحاء مفيش قاعدة عامة توجب استخدام المضادات الحيوية الا لو فيه خوف من العدوى (ادوات مش متعقمة كويس).

وأشكرك جدا على ذكرك للمضادات الحيوية.