٦ أكتوبر: خبط الواد وشالو بدل ما يودية المستشفى رماه في صندوق زبالة !

**Y a r i s** · 15-09-2013 04:06 AM

صورة من ارشيف جوجل
ليست صورة حقيقية

الموضوع. باختصار كنت رايح ازور انا وبعض الاخوه الزملاء زميل لنا
كانت عيانة وانتوا عارفين عيادة المريض واجب المهم لقيت الغفير بيتكلم مع شب من سكان العمارة وبيسئلوا. ابني فين. فانا سمعت كلام خلاني اقف واتضامن مع الواد الغفير ... لمن. الشب بيقول للغفير. انا معرفش لقيت عربية جيب سودة خبطت الواد فنزل السواق لمن لاقا ابنك راسوا اتفتحت من الجنب وقال ايدكم معايا يا جماعه وخد الواد على المستشفى بس مقلش انهي مستشفى ... فالمهم استوقفني الحوار وقمت ادخلت وقلت يعني ايه خد الواد على المستشفى مفيش حد ركب مع السواق من الحته ( الشب :) لأ. مكنش في وقت وكان السواق عاوز يلحق الواد بسرعه على اقرب مستشفى وانا طلعت متاخر من البيت وحكولي بتوع التاكتيك الي وقفين الي حصل. وهما خدوا. نمرة العربية ...

المهم
في الاخر. سمعت. مجرد سمع من صديق ليا لسه قافل معاه سماعت التيلفون. ان الواد الغفير لقى ابنو محطوط في كرتونة و مرمي في الحي الرابع بجوار صندوق الزبالة !

لا إله الا الله. طفل صغير ترميه جمب صندوق الزبالة ... انا مش متاكد من المعلومة وحابب اعرف من الغفير تفاصيل اكتر عن الموضوع ... بس انا ممكن اقدر مخاوف سواق العربية لاهل الطفل يطلعوا. يقطعوه مثلاً لمن يشوفوا انوا خبط ابنهم. ... لكن مش قادر اقدر موقف السواق انوا. يشيل طفل بريء. ويرميه سايح بدموا في كرتونة. بجوار صندوق الزبالة .... وان كانت معلومة الكرتونة دي صحيحة. يعني معقولة. عندك وقت تدور على كرتونة تحط فيها العيل . ومعندكش وقت تاخود الطفل على المستشفى ... يا اخي سيبو. قدام باب المستشفى واجري. هقولك ايه اكتر من كده ( استغفر الله العظيم )

عارفين انا زمان ايام مكنت بقرى جرايد الصبح ... كنت بشوف حكايات زي كده في صفحة الحوادث ... كنت بقول كلام فارغ. مستحيل حد يعمل كدة. ... هو تلاقي بس الصحفي مش لاقي حاجة يكتبها فقام مخترع موضوع ومؤلف حكاية من الخيال ... اتاري الموضوع. بجد وبحق وحقيقي .... ومش بعيد حد من الاعضاء يقرى الموضوع ويقول. وأيه يعني عاااااااااااااادي الموضوع ده حصل قبل كددددة كتير ( ده مرة حصل كزا وكزا وكزا ) !!!

بس. عاوزين الحق. ... انا معاكم ان في ناس بتخلف وبترمي عيالها في الشارع
وممكن تلاقي عيال بتلعب قدام بيتها طولها نص متر ولا لابس شيبشب في رجلوا ولا لابس بامبز وماشي بربورو نازل على بوقوا وعمال يجري في الشارع هنا وهناك ... طيب صحاب العربيات بجد ربنا يكون في عونهم

بس كمان مقدرش انكر ان في شباب كتير بيجروا في شوارع مش بتاعت جري اساساً. بيكون في عيال بتلعب واحد بيعدي الشارع. طفل جري من هنا او هناك وده تلاقيه ماشي في وسط الاحياء على سرعة ستين او مية كانوا داخل رالي الباشا ابن الباشا. بسلامتو ... ومن ناحية تالتة. انا ملاحظ حاجة غريبة. كل ما اجي اعدي الشارع اي حد يشوفني بعدي الشارع مش يختشي على دمو ويهدي السرعة لأ ابص الاقيه بيدوووس بنزين زيادة وكانو بيقولي يالله انا هدوسك اهو عديت معديتش انتا حررر بقه. ( استغل الفرصة. ) .. . حتى مبيقدروش مثلاً الواحد ماشي معاه وحده ست ولا معاه اطفال. ... ابداً لأ تبص تلاقيه. عاوز. يدوسك ويهرسك كده تحت كويتشات عربيتوا او على الاقل يرعبك ويحس بحلاوت الانتصار

@@@@@@@@@@@@@@@
بس قولولي لو كنت مكان العربية الجيب السودة
كنت عملت ايه ... هل كنت وقفت وواجهت عصبية اهل الطفل
الي ممكن يكسرولك عربيتك الجيب. ... ولا كنت جريت ... ولا كنت عالجت الواد
ولا كنت. حطيت الواد في كرتونة ورميتها في جردل زبالة في حي تاني غير الحي بتاع الواد

@@@@@@@@@@@@@@@@@@
وتحياتي
@@@@@@@@@

**البرنس** · 15-09-2013 09:36 AM

باشا اللي يبقا مش غلطان و يعرف يخلع, يخلع ... أنا مرة واحد كان بيعدي الدائري و الأهبل كان بيعدي الدائري حارة حارة و كان في نص حارتي هو بيعدي من اليمين للشمال روحت كابس فرامل و كاسر يمين راح البيه إتردد و رجع لورا قدام العربية روحت شيلته مامتش بس إتكسر و كانت الدورية معدية بالصدفة روحت معاهم و إتعمل محضر و الإسعاف خدت الراجل و بعتله ناس من عندي علي المستشفي اللي هو راحها و دفعولوا 2000 جنية مصاريف دخلة المستشفي بعد كده لاقيت حد من طرفه بيكلمني بيقولي عايز 5000 جنية قلتلوا ليه يا حج هو أنا بطبع فلوس في البيت هو ألف كمان جدعنة مني عاجبك مش عاجبك إنت حر ... راح الراجل اللي و لا عندوا و لا ذمة ولا ضمير رافع عليا قضية و بيقول إنه كان مستني علي الرصيف و مش بيعدي ولا حاجة و أنا اللي روحت خبطه و كمان سبته و جريت

**احمد المصرى** · 15-09-2013 09:42 AM

مسمعتش اى حاجه فى الحى الرابع عن الموضوع دا مع انى مش قادر اصدقه لان ببساطه هو هيدور على كرتونه وهينزله يحطه فى كرتونه ويحطه فى صندوق قمامه ما يرميه كدا على طول ومش شرط فى اكتوبر خالص يرميه فى اى صحراء مثلا ...... اسال البواب ايه ال حصل وان شاء الله يكون الولد تمام بس الاشاعات هيا ال كتير

ثانيا :- احيانا بيكون فى ناس مستفزه لازم تشيلها بوش العربيه وتجيبها على الكبوت انبارح مثلا اختى ماشيه بعد بنك فيصل الاسلامى وفى 2 شباب بيعدوا الطريق لحد كدا عادى جدا صح
شاب من الاتنين راح وقف قدام العربيه ووشه للعربيه وقاعد يبتسم مش عارف هل دا نوع جديد مش المعاكسه مثلا طبعا هيا ضربت فرامل جامد ووقفت ولما لقيته ابن ظريفه كدا راحت شايلاه بوش العربيه وطبعا اترزع على ظهر امه على الارض هل دا حرام دا اقل واجب مع .......................... دى

يرجى مراعاه إنتقاء الألفاظ الملائمه للعرض على صفحات المنتدى
يرجى مراجعه قواعد المنتدى
مشرف 9 ب
18/09/2013
11:52am

**تامر.محمد** · 15-09-2013 09:53 AM

ربنا يكفينا جميعا شر اختبار زي ده

عموما
من شهرين فاتوا بس كنت ممكن استغرب من وقعة زي دي
دلوقت عادي
حد قال لهم يخلفوا عيال تجري في الشارع كده لوحدهاو تجيب مصايب لخلق الله ؟
يستاهلوا

**محمود السيد** · 15-09-2013 10:31 AM

حسبنا الله ونعم الوكيل

**saddam** · 15-09-2013 10:59 AM

صديقي المواطن
عن تجارب لازم توقف حتى لو حتضرب أو تتسجن كام يوم إحتياطي لازم توقف الهروب مش حينفع حيكبر الموضوع وربك حيوقف جنبك ولاد الحلال ودمتم للنضال

**mohamed hussei** · 15-09-2013 11:04 AM

المشاركة الأصلية كتبت بواسطة البرنس

باشا اللي يبقا مش غلطان و يعرف يخلع, يخلع ... أنا مرة واحد كان بيعدي الدائري و الأهبل كان بيعدي الدائري حارة حارة و كان في نص حارتي هو بيعدي من اليمين للشمال روحت كابس فرامل و كاسر يمين راح البيه إتردد و رجع لورا قدام العربية روحت شيلته مامتش بس إتكسر و كانت الدورية معدية بالصدفة روحت معاهم و إتعمل محضر و الإسعاف خدت الراجل و بعتله ناس من عندي علي المستشفي اللي هو راحها و دفعولوا 2000 جنية مصاريف دخلة المستشفي بعد كده لاقيت حد من طرفه بيكلمني بيقولي عايز 5000 جنية قلتلوا ليه يا حج هو أنا بطبع فلوس في البيت هو ألف كمان جدعنة مني عاجبك مش عاجبك إنت حر ... راح الراجل اللي و لا عندوا و لا ذمة ولا ضمير رافع عليا قضية و بيقول إنه كان مستني علي الرصيف و مش بيعدي ولا حاجة و أنا اللي روحت خبطه و كمان سبته و جريت

كبر مخك ولة هيعرفوا يعملوا حاجة انت كنت ماشي علي شمال واساسا شمال مفهوش رصيف يعني كدة كدة الواد هو الغلطان علشان ممنوع تعدية علي طريق سريع ولة هتاخد نص يوم فيها البلد دي مينفع فيها واحد شهم ناس جاشعة