حد ركب ورق حائط قبل كدة ؟

**شريف** · 17-09-2013 11:08 AM

السلام عليكم

حد ركب ورق حائط قبل كدة ؟
شوفت الصنايعي بيركبة في اوضة عندي و شايفة سهل مش قصة هل ادوس
انا جبت كتر و سلاح و غراء فاضل بس التجربة؟
اجرب ولا اية رايكم ؟

**marsguy** · 17-09-2013 11:26 AM

الموضوع مش كيمياء طبعاً

بس وفق الرسومات مع بعض لو في رسومات , وقص الإرتفاع صح وأهم حلجه لازم تفضي أي بقاليل هواء

أكيد

هاتلاقي فيديوهات كتير تساعدك على النت زي ده How to Hang Wallpaper - YouTube

**أبو_يوسف** · 17-09-2013 11:29 AM

ايوة جربت بنفسي والموضوع مش صعب..
ممكن اقولك شوية ملاحظات في البداية:
- امسك الرول قرب السقف وحطه على بداية الحائط من ناحية والناحية التانية علم بالقلم خط.. وجيب خيط واربط فيه حاجة تقيلة ونزله من اعلى لتحت واعمل كذا علامة على الحائط محاذاة للخط.. علشان الورق ميبقاش مايل.. وبعد كدا هاتلزق محاذاة لاول صف
ولما تيجي تقص تاني صف امسك الرول بايدك وارفع لحد ماتلاقي الشكل بيكمل الصف الاول وقص من تحت بزيادة شوية
وحاول الورق ميجيش فوق الورق علشان اللزق ميفكش
ممكن تستخدم فرشاه عريضة بيسموها فرشاة بطانة علشان تغرق الورق غراء والحائط.. ولازم يكون معاك مقص وكاتر..
ومقاسات الرولات 50سم و70سم ومتر.. ال 50سم في اشكال كتير يليه ال70 ثم المتر..
ولو افتكرت حاجة تانية هاقولك..

**شريف** · 23-09-2013 11:08 AM

في نصايح تانية قبل منسمي و نبدأ؟

**أبو_يوسف** · 23-09-2013 11:35 AM

لو هاتركب الورق داير مايدور في الغرفة يعني في حائطين جنب بعض ماتبدأش من اول الحائط
انما ركب الورق بحيث يبقى نص الرول في حائط والنص التاني في حائط علشان لو بدأت من اول الحائط مش هاتعرف تقفلهم مع بعض خالص

ولما تيجي تقطع من عند السقف او من عند الوزرة استخدم سكينة معجون مع الكاتر والكاتر يكون في الناحية اللي هاتتقطع من الورق

سمعت ان ممكن تضيف شوية غراء ابيض مع اللاصق
واستخدم قماشة مشيها على الورق بعد اللزق علشان تفرغ الهواء واتحرك بيها في الاتجاه المفتوح من الورق

ولو في شوية هوا مش عارف تخرجهم اعمل شرطة صغيرة بالكاتر

**amoor89** · 23-09-2013 09:45 PM

الأدوات اللى هتحتاجها سكينة معجون + كتر + مسطرة صغيرة + رولا صغيرة + قلم رصاص + كولا +غراء أبيض بتكون علبة ربع كيلو كفاية قوى + لزق أبيض ورق مش فاكر اسمه بيتجاب من بتوع الدهانات هتجيب اللزق ده وتلفه مرتين ولا حاجة على طرف سكينة المعجون بحيث انك تدارى الطرف الحاد بتاعها عشان هتفرغ بيها الهوا من الورق

هتجيب حاجة تحط فيه الكولا ممكن حلة صغيرة تفى بالغرض وتملا نصها مية وتفضى كيس واحد كولا وتحط مقدار معلقة كبيرة غراء أبيض وقلب الخليط كويس لغاية متحس انه بقى تقيل ومفيش حاجة مكلكعة فيه
هتجيب رول الورق وتحط طرفه على اول الحيطة من فوق وتسيبه ينزل وعينك معاه لغاية تحت خالص وبعدين سيب من فوق وانزل تحت علم مكان ما هتقطع وحاول تسيب 1 سم زيادة وبعدين اقطع وبعدين اغمس الرولة فى الكولا ووزع على المكان اللى هيركب فيه الورق من اول فوق بس مش كل الحيطة لا قسمها على اربع اجزاء عشان الورق يبقى سهل الحركة معاك وانت بتركب وتقدر تحركه زى منت عايز بس ياسيدى وهكذا
الموضوع سهل جدا ونا عملت شقتى بنفسى وربنا معاك لو احتجت حاجة تانى قولى ونا معاك
تحياتى