الموضوع: بيجو 301 النسخه الأسبـــــــانــــي (مصر)

حجزت 301 النهارده
مبدئيا انا رحت المركز الرئيسي اللي في صلاح سالم الفئات اللي كانت هناك المانوال والبيزلاين والهايلاين.
انا كنت نازل اصلا متردد شويه وكنت رايح اجيب لانسر شارك 2014 اول فئه ب 137000 او نيسان صني 2014 الشكل القديم ex ب 109000 ( طبعا سعرها الرسمي 100000) وال 9 دول اوفر برايس نزلت طبعا ع نيسان الاول ولما شفت العربيه ع الطبيعه وتجهيزاتها الفقيره جدا يعني هي اوتوماتيك وايرباج واحد للسواق وفرش قماش وطاسات اخدت قرار وقتي برفضها واستبعادها 90% وال 10% دول بحيث اني ممكن ارجعلها تاني ومشيت خرجت ع اللانسر شارك طبعا الفئة الاولى سيئة التجهيز جدااا وكمان من غير اسبويلر ف خلي شكلها وحش والنقطه الاهم السعر عالي اوي 137 بالنسبة للتجهيز الفقير دا وبصراحه مش مقتنع بيها اصلا ..
المهم خرجت بقي ع خط سيري الاخير 301 وانا رايح متردد شويه وحاسس اني بردو هطلع من هناك ايد ورا وايد قدام دخلت التوكيل وقعدت مع الموظف مقابله كويسه وناس كويسه ودخلت افحص العربيه حته حته.. والله من اول نظره بس عليها حسيت اني اخدت القرار ان هي دي ولسه حتي مفتحتهاش ولا لفيت حواليها .. بدات بقي القي نظره متفحصه للشكل الخارجي من قدام والجنب وورا اقل حاجه تقولها روووووووعه وشكلها ع الطبيعه يختلف كتير عن الصور واجهه مميزة جدا جدا بشبك عريض وعلامة بيجو وفتحات تهوية وتناسق مع حجم وجسم العربيه الجنب بقي ممتاز جدا انسيابيه جيده وتصميم هادئ وحيوي في نفس الوقت ومحدش يسئلني ازاي عشان مشعارف .الشنطه والضهر بصراحه كنت مسترخمه في الصور بس الطبيعه اختلفت كتير ..نيجي بقي للشغل التقيل الداخل انا في اعتقادى الشخصي مفيش عربيه في السوق كله من نفس الفئة بالجمال والهدوء واناقة التصميم والارتياح من دخلتك المقصوره .قعدت ع كرسي السواق وقفلت الباب وظبطت الكراسي ع قعدتي وكنت حاسس اني فعلا قاعد في عربيه مختلفه اوروبي بمعني اصح (خصوصا اني قارنت بالشارك والصني ) الصالون واسع جدا وقعدة الكراسي اللي قدام مريحه جداا وتحس انك اتمكنت من العربيه (مع اني مسوقتهاش) الطابلوه جميل جدا مع العدادات وشاشه عرض المعلومات اللي في نص التابلوه والوان اضائته وباقي التابلوه منظم ورائع جدا الصراحه .كرسي السواق بصراحه مريح جدا وبصيت ع اجناب العربيه من قدام كنت حاسس انها بعيده او مش شايفها يمكن عشان الشمس كانت ضاربه في عيني او لسه مسوقتهاش ف متعودتش عليها يعني طبعا شغلتها وشغلت التكيف ع اعلي درجه كنت الساعه 2 الضهر وكان اكتر من ممتاز برغم مشاركات الاعضاء اللي بيأكدوا انه بيتحسن بعد 3000 كيلو (مش فاهم هيتحسن اكتر من كدا ولا قصدهم ايه) ماعلينا ..
نزلت طبعا من قدام وقعدت ورا وكان معايا صحبي قعدنا ورا احنا الاتنين وكنا مرتاحين جدا ورجلينا مفروده وفعلا العربيه واسعه بطريقه غريبه..بالنسبه للخامات والتقفيل فبصراحه قررت اني انسي بقي حاجه اسمها ياباني وكوري ..فعلا الاوروبي اوروبي ..
الشنطه بقي ماشاء الله حجمها مش طبيعي من كبرها مش فاهم يعني ام المهندس اللي مصممها وسعها اوي كدا ليه بجد واسعه بااعجوبة اعتقد ان طولها متر كامل وعرضها كذلك مع انه كان ممكن يصغر مساحة الشنطه شوية ويكبر الصالون اكتر وساعتها كان هيبقي انتريه :D
صاج العربيه قوي وجدا ومتين والدهان ممتاز وكل الوانها روعه بصراحه لدرجة اني اصلا كنت رايح مستبعد 3 الوان وبفضل 3 تانين لما شوفتهم ع الطبيعه عكستهم بقي :D بتحصل بتحصل :D
حجزت الاسود اول لون والبترولي والفيراني ..الفئة المانوال ب 107900 البيزلاين 124000 الهاي لاين 135000 انا جبت المانوال دفعت حجز 10000 ولو اني كنت هموت واجيب الهاي لاين بس اضطريت اجيب المانوال عشان والدي مش بيحب الاتوماتك ومش متعود عليه (معلش بكره يعرف غلطته):D
طبعا الفئات الاعضاء مشكورين جدا اتكلموا بالتفصيل الممل فمش هحكي فيه..كمان العربية عاليه عن الارض افتكر 16.6 والاكصدامات اللي ورا واللي قدام عاليين اكتر من البدي نفسه كمان..
كمان اخدت ورقه بااسعار قطع الغيار
فلتر هواء 50
فلتر بنزين 40.5
فلتر زيت 48
فلتر تكييف 134
ذراع ميزان امامي 85
تيل خلفي 550
طقم دواسه 354
اكصدام امامي 2230 خلفي 1845 (متهيالي غاليه شويه)
برابريز امام 998
مرايه كهربا 624 زجاج المرايه 66
مساعد خلفي 239
فانوس خلفي شمال او يمين 591
كشاف شمال 1274
طنابير امامي 636
مارش 1204
بوجيه 33
غماز رفرف 22
طلمبة بنزين 788
طقم كاتينه 481
كبوت 2333
بلية مجموعه 494
كصدام امامي 2230
تيل امامي 424
في النهاية هقولكم والله انا من اول بصه ع العربيه وانا قررت اني هاخدها ان شاء الله وارتحت من ام الحيره اللي كنت فيها بصراحه تستاهل سعرها بالنسبة لامكانياتها وشكلها وتجهيزاتها حتي الفئه الهاي لاين تستاهل 135000 وروعه وان شاء الله تنجح في السوق وتاخد الشو من عربيات كتير ..
انا هستلم في حدود شهرين ان شاء الله .ادعولي:)
اعذروني لو في اي اخطاء وربنا يبارك لاي حد فيها ويديله خيرها ويجنبه شرها

المشاركة الأصلية كتبت بواسطة leitosr

on1touch مشاركة ممتازة,
ياريت تعمل بيها موضوع جديد باسم حجزت بيجو 301 أنهارده

عشان يبقي أسهل علي الأعضاء أنهم يوصولو للموضوع عن البوست دا,,
وربنا يكرمك وتستلم علي خير إن شاء الله.

حاضر هعمل موضوع جديد

المشاركة الأصلية كتبت بواسطة Akram.Gamal

استاذ on1touch
اولا بشكرك على سرد تجربتك الجميله

ثانيا تستلم عللى خير ان شاء الله و ربنا يباركلك فيها

ثالثا :-D هتندم انك ضيعت الهايلاين

اشكرك جدا ربنا يخليك
بالنسبه لموضوع الهاي لاين دا مش بمزاجي حكم القوي بقي اعمل ايه

المشاركة الأصلية كتبت بواسطة airac2002

الف الف مبروك

الله يبارك فيك اشكرك

استاذ on1touch
كلامك بسيط و ممتع
بارك الله لك فيها و حفظها لك من كل سوء