الموضوع: تقرير الامجراند7 بعد 4 الاف كيلو

السلام عليكم و رحمه الله و بركاته

ازيكوا ياشباب عاملين ايه انا عارف انى بقالى فترة مش بدخل و الحقيقه شفت المواضيع المكتوبه و اتخضيت من كميه المشاكل الموجوده فالامجراند7 و انا مصدق كل واحد كتب عيب ظهرله .. اخر عيوب كنت شفتها قبل فترة غيابى كانت لمبه التشك انجن و فبرة التنك و الدهان لما رجعت لاقيت مشاكل فى واير الفتيس و الاسطوانه .. الحقيقه مابقتش عارف اقول المشاكل ديه سببها ايه هل هى حظوظ لان فيه ناس كتير معاهم العربيه و مبسوطين بيها و انا منهم و لا هى فعلا فيها مشاكل كتير و هتظهر مع الوقت انا الصراحه مش هفتى لانى مش عارف ايه كميه المشاكل ديه لكن انا هكلم عن نفسى انا عربيتى عامله 4300 كم بقالها 4 شهور طبعا الناس عارفه الاوبشن بتعها فمش هرغى فده .
هبتدى بالمميزات .. فالعيد الى فات سافرت اسكندريه عالصحراوى حوالى 3 الفجر و جبت بيها 165 كم / ساعه العربيه ماشاء الله ثابته و الاضاءة مبينه الطريق كله و العالى يخلى الليل نهار المرايات الجانبيه موضحه الاجناب كويس علو الشنطه مش مأثر فالرؤيه الخلفيه لمرايه الصالون بالنسبه للسحب فزى مالاعضاء اجمعوا بعد 3.5 rpm فعلا العربيه بتتحول و بتسحب بطريقه غريبه و اعتقد ده طبيعى عشان وزنها طلعت من اسكندريه عالزراعى عشان كنت رايح المنوفيه عند اصحابى وطبعا الطريق سىء جدا و كله مطبات و كنا 3 فالعربيه و المطبات ماثرتش فحاجه و الامجراند كانت وحش عالطريق رجعت من المنوفيه عالقاهرة و مشينا من طريق القناطر برضه مطبات بس كانت اغبى من الزراعى و الحمد لله ايمى ماحكتش و وصلنا القاهرة بحمد الله
العيوب..لازال عيب نشوفيه الكرسى ده مصيبه خاصه ان رجلى بتوجعنى جدا و ساعات بركن اقف عشان استريح شوية .. الكاسيت بصراحه شغال كويس لكن مرة كان بيجى عند اغنيه معينه و يفصل شلت الفلاشه و ركبتها تانى اشتغل كويس فمش عارف عيب فلاشه و لا كاسيت .. حاسس ان استهلاك البنزين عالى لكن لسه ماحسبتش بالضبط اد ايه هحسب و اقلكوا .
ملاحظات:الحمد لله لمبة التشك انجن منورتش عندى و بحط بنزين 92 من ساعه ماشترتها بس بحط من بنزينه شل او موبيل او توتال او الامارات..بنزل اقفل غطا التنك بنفسى كل مرة خوفا من انكسار فبرة التنك و فمرة نسيت و الباشا الى بيمونلى رزع الغطا بس الحمد لله جات سليمه..
كان عندى مشكله فالترموستات و اتغيرت فالتوكيل طبعا ماكنتش موجوده و غيرتها بعد 3 اسابيع
انطباعى:انا الحمد لله مبسوط من العربيه جدا لكن خايف من المشاكل الى بتقولوا عليها و ربنا يستر..لازال التوكيل غير قادر على استيعاب كم العربيات الكبيرة كانهم اتفاجئوا بحجم المبيعات..
و لازلت بقول انها افضل من عربيتى السابقه النوبيرا فالاوبشن و الاتساع لكن لازالت النوبيرا سمعتها افضل بكتير و اعتماديه جدا .
واخيرا الاعضاء الى بيقترحوا ان العربيه كانت المفروض تبقى 1600 سى سى اوضحلهم ان النوبيرا 1600 و كانت 107 حصان زى الامجراند و الافيو 1500 بتطلع 83 حصان دلوقتى اللعب كله فالهورس باور يعنى فولكس عامله موتور 1400 سى سى بيخرج 122 حصان فالمهم الهورس باور .

فالنهايه انا الحمد لله راضى جدا عن العربيه و ان شاء الله هتابعكوا بالجديد اولا باول