تقرير مفصل لصيانة العشرة الاف كيلو

**mohamedsisi** · 06-12-2010 12:59 PM

فى البدايه مكان المركز فى القطاميه قريب من طريق السويس

اسهل بنالسبه ليا من العباسيه فالحمد لله وصلت من غير ما اتوه المره دى

على حسب وصف الاستاذ وليد جزاه الله خيرا

وصلت فى حدود تسعه وربع كان فى زحمه من التاكسى وبعد وصولى بلحظات

الزحمه كمان بقت فى الملاكى

بمجرد الدخول عامل الاستقبال غلف الدركسيون و عصى الفتيس والكرسى الامامى

باكياس واقيه عليها شعار السياره وركنت فى جنب فى الدور

وكنت رابع عربيه فضلت ادردش ربع ساعه مع العملاء اللى واقفين والحقيقه كله اشاد بالسياره

ماعدا بعض عيوب التقفيل البسيطه زى شنطه مابتقفلش خرطوم باور بيرشح زيت وصفراة الفرامل

لكن كلنا اجمعنا على روعة السياره فى الطريق وثباتها وشكلها الجميل

المهم بدا المهندس احمد حسين اخذ امر الشغل منى ولاول مره الشركه تلتزم الدور ولايوجد تعدى

على الاقل فى اليوم ده

المهم قلت له على الحاجات اللى كنت عايزها وهى صفارة الفرامل و كبوت العربيه ساعات بيعلق

مع طبعا تغيير الزيت والفلتر وتربيط العفشه والفرامل

المهم خلصنا وقاللى سيب المفتاح فى العربيه واطلع فوق فى الاستراحه

طبعا قلبى مش طاوعنى فضلت جمبها لانى قلت ممكن يطنشوها ولا حاجه ويحص تعدى على الدور

وكان بيدخلو عربيتين ملاكى مع بعض واعتقد اربع عربيات اجره لذلك العربيه اتاخرت شويه حوالى نصف الساعه

لكن الحمد لله دخلت فى دورها على الرغم من بعض الاشخاص اللى بيعملو نفسهم مهمين وعايزين يسبقو

الدور لكن الحقيقه المهندسن والعمال كانو ممتازين فى صدهم وانا طبعا كنت براقب كويس الحكايه دى علشان

اشوف فى تغيير او لا والحمد لله كان على اد المسئولي على الاقل فى اليوم ده

طلعت فوق وانتظرت فى ساحة الملاكى ولقيت العربيه دخلت واترفعت وبدا الشغل فيها قعدت ساعه جوه

واتغير الويت والفلتر والتيل و استدعونى لتجريب السياره وطلعت مع مهندس سامح

وبعد كده رجعنا وقاللى فاضل الكبوت وفحص كهرباء السياره

وبعدها بنص ساعه قللى تمام ونزلت جربتها والحمد لله كان مستوى مرضى جدا

رحت الحسابات وحاسبت بس المصنعيه كانت خمسين جنيه فدفعت 357 جنيه لانى باضع موبيل 1

خدت الفتوره واذن الخروج وتوكلت على الله وانا حاطط ايدى على قلبى من السمعه السابقه اللى بنسمع عنها

لكن الحمد لله العربيه بسم الله ما شاء الله وبفضل الله كانت زى الفل وصوت الموتور انخفض والدركسيون كانه مياه

والفرامل كانت معقوله جدا ووصلت الحمد لله اسماعيليه فى الثانيه والنصف

بالنسبه ليا كنت حاسس ان الامور معقوله جدا ويبقى املنا فصل الاجره عن الملاكى وجعل مركز غمره المنتظر

للاجره وترك القطاميه للملاكى

لاحظت وجود فردين باين عليهم من الاداره منهم واحد اسمر وواحد تانى طويل شويه كان كل شويه بيلفو على

الورشه وسالو الصنايعيه على العربيت اللى بيشتغلو فيها وكان الحاج صبحى رئيس الورش بيلف معاهم

بالنسبه ليا المره دى انا سعيد جدا بزيارة المركز وربنا يكرم ويفضلو فى تطوير مستمر

**bassem.naguib** · 06-12-2010 01:31 PM

ألف مبروك على صيانة العشر آلاف .. وعقبال صيانة المليون وتكون راضي عن العربية بإذن الله .

يا خوفي من انتشار العربية بشكل كبير يصاحبه إهمال غير مقصود في الصيانة بسبب كثرة الضغط على مركز الصيانة .. وفي اعتقادي في خلال السنتين تلاتة بالكتير حتحتاج شركة الأمل فتح مراكر خدمة أكتر وخاصة في المحافظات .

شكراً على التقرير الوافي .

**ehabpopo** · 06-12-2010 03:02 PM

المشاركة الأصلية كتبت بواسطة ziabassem

ألف مبروك على صيانة العشر آلاف .. وعقبال صيانة المليون وتكون راضي عن العربية بإذن الله .

يا خوفي من انتشار العربية بشكل كبير يصاحبه إهمال غير مقصود في الصيانة بسبب كثرة الضغط على مركز الصيانة .. وفي اعتقادي في خلال السنتين تلاتة بالكتير حتحتاج شركة الأمل فتح مراكر خدمة أكتر وخاصة في المحافظات .

شكراً على التقرير الوافي .

ايه يا باسم ما تخليك محضر خير ... وسيب الناس تاكل عيش ... وبلاش الكلام ده ... هو انت كده دايما
ما الراجل بيقول كلام زى الفل ... خليك متفائل ... الصين حلوة يا باسم .. الصين حلوة
على فكرة اعتقادك فى محلة ياباسم

**bassem.naguib** · 06-12-2010 03:15 PM

لا والله أنا محضر خير وأتمنى من كل قلبي التوفيق لتوكيل الأمل ويبيع كمان وكمان .. بس أنا خايف من كتر الانتشار

وصلت فى حدود تسعه وربع كان فى زحمه من التاكسى وبعد وصولى بلحظات الزحمه كمان بقت فى الملاكى

يحصل زي ما حصل لتوكيل كبير لسيارة أسيوية .. باع من العربية كتير جداً .. وأصبحت منتشرة أنتشار كبير .. واللي حاصل دلوقتي أن خدمة ما بعد البيع والصيانة زي الزفت لأنه معملش توازن بين البيع وخدمة ما بعد البيع .. وكل اللي بيشتروا العربية دي دلوقتي بيصينوها بره التوكيل علشان يبعدوا عن قرفه .

وطبعاً التقرير اللي عمله أستاذ محمد السيسي يوضع في ايجابيات التوكيل اللي من الواضح أنه في تقدم مستمر .

**mohamedsisi** · 06-12-2010 05:30 PM

المشاركة الأصلية كتبت بواسطة abaza2107

الف شكر على المعلومات القيمه ديه وربنا يديلك خيرها ويكفيك شرها
تغيير تيل الفرامل منع صوت الصفاره ولا وهل هوا علي حساب العميل ولا ايه

هو منع فعلا الصفاره لكن الحقيقه انا متوقع انه يظهر تانى لان نسبة النحاس فى التيل عاليه جدا

وساعتها ان شاء الله هغيره بتيل تويوتا كورولا

**memos** · 06-12-2010 07:43 PM

الف مبروك يا باشا وعقبال 100000 واحب اقولك بالنسبه للتيل قريت ان رئيس مجلس اداره الشركه عمل مقابله لجريده الاسبوع وقال انهم عملوا قالب جديد للتيل في المانيا وتم صب التيل بخامات جديده في الصين وذلك بعد تأخر الام الصينيه في الرد عليهم بخصوص التيل وهذا ان دل يدل علي ان الشركه بتحاول مراضاه العملاءبأى طريقه