والله العظيم اللي بقوله ده حصل معايا في الزفت عز العرب

**د.هشام** · 23-09-2013 01:55 AM

هم في التوكيل أكيد مبسوطين باللي إنت كاتبه، علشان كده محدش حيروحلهم تاني

**saddam** · 23-09-2013 03:29 AM

صديقي المواطن
والله عجزنا وياما نصحنا التوكيلات في مصر محدش يرضى يشتغل بيها إلا كسر المهندسين وبواقي اﻷسطوات وعشان كده عمري مدخل توكيل وأنا في الضمان إلا أما أكشف بره وأشوف الدنيا فيها إيه التوكيل ليه حاجات معينة غير كده موضوعك مكانش محتاج توكيل ودمتم للنضال

**M I D O** · 23-09-2013 04:07 AM

لا حول ولا قوة الا بالله .. دول ميتقالش عليهم غير بقالين مش مهندسين طلع العيب من الكبالن مش مربوطة في اخر الليلة بعد المرمطة دي وياريتهم صلحو العيب لا بوظو باقي العربية بسبب عيب زي دة حسبنا الله ونعم الوكيل فيهم وربنا معاك ورحلهم تاني عشان الاصوات الي بتسمعها دي

**Ahmed.Ali** · 23-09-2013 09:53 AM

صراحه هم طبعا يستاهلوا البهدله لانهم طلعوا عنيك و معرفوش العيب من الاول بس نقطه تحسب للتوكيل انه كان بيغير من غير و يوجع دماغك انت لو عرفت سعر كل قطعه بتتغير هتتصدم دا كفايه علبه الدركسيون. طبعا دا حق اصيل ليك هم مش بيتكرموا عليك بحاجه و كدا كدا الحساب علي بروتون بس مش كل التوكيلات كدا

**elmadawy** · 23-09-2013 10:34 AM

تصور انت بتتكلم عن نفس العيب ال عندي وعندما روحت التوكيل في الاسكندرية قبل ما يقفل معرفوش سبب العيب وقالو لازم تروح التوكيل في القاهرة وبالفعل سافرت ورحت القاهرة علشان المشكله ديه وبعد التجربة قالي المهندس ال المساعد الشمال عايز يتغير واحجزه علشان لما يوصل نغيره ومن ساعتها كل ما اسال لسه وبصراحه عودت نفسي علي هذا العيب لاني مش فاضي كل شويه اسافر للقاهرة بعد ما كمان التوكيل في الاسكندرية قفل وادو الصيانه لورشه بتشتغل في كل العربيات ومنه لله توكيل عز العرب وكمان الشركة المصنعه كمان ال مديه التوكيل لواحد زي عز العرب ده

**amrseif** · 23-09-2013 03:24 PM

المشاركة الأصلية كتبت بواسطة a.adel

والله أنا شايف من كلامك الناس بتحاول وكل الحاجة بتغيرلك في الضمان

ساعات كده بيبقى فيه مشاكل معقربة وحلها عبيط بس مايجيش على بال حد
أنا مقدر زعلك على البهدلة دي
ومعاك كل الحق

بس إنت تزعل أكتر لو التوكيل قال لك إنه عمل حاجة و طلع كذب
أو قصر معاك في الضمان أو تعاملهم وحش

انما كل التوكيلات في مصر بلا استثناء , أي حاجة بره الصيانة
بيلفوا حوالين نفسهم عشان يجيبوها

بس مش عارف ليه دايما مش موفرين حاجة proton كده
كذا واحد يقول إنه بيستنى قطعة الغيار
مش فاهم ليه مهملين proton كده
مبروك عليك العربية واستمتع بيها و متضايقش نفسك

ملحوظة : أنا مش بدافع عنه
أصل فيه ناس أول ما تشوف إن معاك citroen
تقول ده داخل يدفع على طول

بما ان حضرتك تبع نفس التوكيل ياريت تقوللنا موضوع قطع الغيار أخباره ايه معاك فى سيتروين؟؟ متوفرة وللا برده بتحجز فترة ؟؟؟

**A.Adel** · 23-09-2013 03:35 PM

المشاركة الأصلية كتبت بواسطة amrseif

بما ان حضرتك تبع نفس التوكيل ياريت تقوللنا موضوع قطع الغيار أخباره ايه معاك فى سيتروين؟؟ متوفرة وللا برده بتحجز فترة ؟؟؟

ما هو أصلي لو اتكلمت :)
الناس مش هتصدق وممكن صاحب الموضوع يضايق أو يحس إني بدافع عنه

يا ريت تعفيني من الموضوع ده
أو اتفضل اسأل في موضوع في قسم citroen وانا اجاوب حضرتك وأهو باقي الأعضاء تفيدك برده

**A.Adel** · 23-09-2013 04:11 PM

المشاركة الأصلية كتبت بواسطة saddam

صديقي المواطن
والله عجزنا وياما نصحنا التوكيلات في مصر محدش يرضى يشتغل بيها إلا كسر المهندسين وبواقي اﻷسطوات وعشان كده عمري مدخل توكيل وأنا في الضمان إلا أما أكشف بره وأشوف الدنيا فيها إيه التوكيل ليه حاجات معينة غير كده موضوعك مكانش محتاج توكيل ودمتم للنضال

كلام سليم 100%
كل الصنايعية التقيلة بتسيب التوكيل و بتفتح ورش ليها بره
النص نص بتلاقيه ماسك العصاية من النص ,شغال في التوكيل بس فتح ورشة بره برضه

عشان كده معظم اللي شغالين في التوكيلات ناس تعبانة

**hesham1978mmmm** · 24-09-2013 10:42 PM

متشكر يا جماعة علي مشاعركم الجميلة بس انا مش رايح عز العرب تاني انا جبت اخري معاهم انا هاروح اربط واشحم العفشة عن اي حد بره وكفاية عليهم اوي لحد كده وبافكر جديا صيانة ال40 الف وما يليها اعملها بره وخلاص انا فضالي سنة وشهرين في الضمان مش عايزهم وكتر خيرهم اوي