الموضوع: جين 2 اوتو ولا بيجو 301 مانيوال

المشاركة الأصلية كتبت بواسطة leitosr

أنا قريت كل الردود, وأنا مع الرأي دا عشان دا اللي كنت هقوله,,
موضوع الثبات عشان الناس اللي بتقول إن البروتون أثبت من البيجو مش عارف بيقولو كدا علي أساس أيه,,
البروتون جين 2 عربية هاتش باك, والبيجو 301 عربية صالون,,
دي ليها wheelbase مختلف عن التانية,,

لو حضراتكم عايزين تتكلمو عن وتقارنو ثبات عربيتين ببعض, لازم يكونو في نفس الفئة,
يعني لو هنقارن جين 2 ببيجو, هتبقي المقارنة قدام بيجو 308 أو 207 أو 208

وساعتها اللي هيجرب هيعرف يعني أيه ثبات لما يركب التلات عربيات دول من بيجو,,:m_yes[1]:
دي حاجة,,

وأعتقد دي الحاجة الوحيدة اللي كانت في صالح البروتون قدام البيجو, لأن كل الكلام في الموضوع كان إن ابيجو أفضل كأختيار في كل حاجة من تقفيل وكاخامات وفرامل وأمان والبروتون أفضل في الثبات بس,,

البروتون عربية مش وحشة, بس من ناحية التقفيل والعمر الأفتراضي للعربية وقطع الغيار وكمان معاملة وسمعة التوكيل مش زي البيجو,,
فكدا الكفة هتكون في صالح البيجو,,

بس طبعاً صاحب الموضوع لو المبلغ اللي معاه ميقدرش يزود ويجيب بيه الأوتو في البيجو وعايز أوتو, الجين 2 هتقضي,,
بس لو عايز حاجة تحس أنك مرتاح فيها 5 سنين علي الأقل وتحس بقيمة فلوسك فيها وتبقي عايز تركب العربية وأنت نفسك مفتوحة,, صدقني البيجو هتبقي الأختيار الأفضل,,

والكلام دا سواء كانت مانيوال أو أوتو,, المانيوال فيه ناس كتير بتسوق بيه كل يوم والحمل اللي هتحمله علي رجلك الشمال علي دواسة الدبرياج,, هوا هوا نفس الحمل اللي أحنا بنعاني منه في الأوتو واحنا كل شوية ندوس بنزين وفرمل بالرجل اليمين,,
عن نفسي محستش براحة كبير ولا متعة لما روحت للأوتو من المانيوال,, ويكون متعة المانيوال في السواقة والسحب بتاعه كانت بتعوض فرق التعب البسيط اللي بتعبة معاه في الزحمة, واللي لاقيته موجود برضه في الأوتو لأني بقت أتعب معاه في الزحمة دلوقتي,, وبياكل تيل فرامل كمان أعلي من المانيوال فخليك فاكر دي كويس,,,

والأستاذ اللي بيقول أن قطع غيار بيجو غالية والتوكيل أكثر من سئ, مش عارف هوا بيقول الكلام دا منين,,
يعني أولاً قطع غيار ال 307 وال 301 قريبين من بعض جداً, ومعظم كتير أرخص من الكوري والياباني والصيني كمان

وعندك كمثال لأسعار قطع غيار ال 301 وال 307,
فلتر زيت ب 50 جنيه,,
فلتر هواء ب 100 جنيه, فلتر تكييف ب 100 جنيه,و فلتر بنزين ب 75 جنيه,,
سير مجموعة ب 110 جنيه, طقم بوجيهات بوش ب 110 جنيه,
دي أسعار الصيانات اللي هتعملها في أول 50 ألف,, والأسعار دي قطع الغيار الأصلية من التوكيل بالتقريب,, فين بقي الأسعار الحراقة ونااااااار والكلام اللي بيتقال دا ؟؟

توكيل بيجو لو تدخل قسم بيجو بنفسك وتشوف الناس اللي بتعمل صيانات مع التوكيل مش هتلاقي ولا شكوي واحدة تقريباً,,
لكن أدخل قسم بروتون وشوف الشكاوي مع عز العرب بنفسك عاملة أزاي,,


نصيحة مني روح أقعد في العربية في المعرض,, وشوف اللي تستريح فيها أكتر,
وأنا رأيي الشخصي إن البيجو هيا الأختيار الصح, من ناحية العربية كأمان وكتقفل وكتوافر قطع غيار في السوق وتوكيل أكتررر من جيد,,, وكمان البيجو عربية بتعيش العمر وعندك كمثال ال 406 وال 307 ماشين في الشارع زي الفل وبكفائة لحد أنهارده وقبلهم العربيات الأسطورية 504 وال 505 لحد أنهارده,,
بيجو بتعرف تعمل عربيات,, والأهم بتعرف تعمل مواتير تعيش العمر,,
سؤال تحطة في بالك هل فيه عربيات بروتون بنشوفها في الشارع بتعيش في نفس عمر العربيات البيجو ؟؟ وبتكون بنفس حالتها وكفائتها ؟؟

بالتوفيق في الأختيار,

كلامك رائع و مقنع جدااااا وانا اساسا ماليش في الجري ولا الغرز فكده يبقي البيجو المانيوال هي الاختيار وربنا يجعله اختيار موفق ان شائء الله

وشكرا لحضرتك