زياده عزل السيريون

**bmya** · 23-09-2013 11:19 PM

السلام عليكم
بقالي فتره عاوز اعمل الحوار ده ومتابع المواضيع لمعموله قبل كده في الاقسام الاخرى لغايه ما اخيرا عملته عندي
ملحوظتين في السريع:
السيريون عزلها كويس اصلا بس انا قلت ازوده فقط
تاني حاجه دي تالت مره اعمل فيها الموضوع ده وهتبقى اخر مره عشان زهقت منه بصراحه اول مره عملته اتمسح من المنتدى غلط مع تاني مره عملته وقبل مااعمل اعتمد الموضوع اللاب هنج وعملت ريستارت ودي تالت مره وربنا يستر

بسم الله
اولا الخامات انا زنلزت لفيت لفه عند الناس المتخصصين في الجلود والعوازل واتسقريت على نوع من العزل اسمه صوف لباد هو عامل زي الصوف كده او زي بطاطين الجيش + فرخ بلاك لزق وده بتباع عن بتوع الحدايد واالبويات

دي صوره اللباد

ودي صوره البلاك اللزق

بالاضافه لانبوبه سيلكون او علبه كوله للزق اللباد وتثبيته في فرق الباب
الخطوات طبعا هنفك فرش الباب وهو سهل على فكره بس للاسف مصورتش خطوه الفك دي
ودي صوره الفرش وهو مفكوك طبعا في طبقه عزل بس خفيفه اوي اللي هي البيضه دي

تاني حاجه هنقطع اللباد 4 اجزاء على قد الاربع ابواب وبعدين هقطع كل جزء من الاربعه لجزئين وده عشان فرش الباب عباره عن جزئين منفصلين مش حته وحده والاسهل نعمل كل جزء لوحده ودي صوره اللباد وهو مقطوع

بعد كده هناخد كل جزء من اللباد ونثبته على الجزء الخاص به من فرش الباب ونفتح مكان المسامير والكليبسات ونلزقه بالكوله او السيلكون ونقص الزوايد ودي صوره الفرش بعد تثبيت اللباد الجزء العلوي

وده الجزء السفلي

ودي صور للجزئين مع بعض

وكمان دي

كده خلصنا من اللباد هنجيب بقه البلاك اللازق وهنقص الفرخ لاربع اجزاء متساويه على قد ما نقدر
ودي صورته بعد التقطيع

بعد كده هناخد كل جزء من البلاك ده وهنلزقه من جوه الباب على الصاج نفسه من جوه وللاسف مصورتش لان المكان ده مزنوق

وبالمره عزلت فرش الكابوت كمان بواقي اللباد اللي فاضل

وكمان حوض الشنطه تحت الفرش بتاعها وتحت الاستبن وده هيمنع صوت التخبيط بتاع العده والكوريك اللي بيظهر احيانا مع المطبات والنقر

وتمت بحمد الله وبشكر طبعا استاذ عصام غنايم قسم الدايو عشان انا استفدت منه كتير بصراحه في الموضوع ده

وبالمره غيرت التيل الخلفي الاصلي ب 280 جنيه ودي صورته برده

اخوكم شريف مصطفى

**bmya** · 23-09-2013 11:44 PM

الله يبارك فيك ياباشا
بص السيريون عزرها اصلا كويس بس طبعا في فرق في اعزل يعني مثلا كنت و ماشي بسرعه نت بحس بهواء خفيف من عند زرارير الزجاج ده اختفى مثلا

**saddam** · 24-09-2013 01:07 AM

صديقي المواطن
بالتوفيق كنت أتمنى عليك تخلي حد محترف ينفذهالك وكمان العزل الصح جدا لا يتم بمادتين أقل واجب 5 مواد مختلفة المهم إنت مبسوط ودمتم للنضال

**bmya** · 24-09-2013 01:45 AM

صديقي صدام انا بحب اعمل اي حاجه بايدي طالما ينفع اعملها بنفسي ده غير ان العزل بتاع العربيه مش مضايقني في حاجه هي نازله اصلا بعزل كويس جدا للارضيه ووصدر العربيه وورا التابلوه الابواب بس اللي عزلها خفيف فانا زودته فقط لا غير مش محتاجه حد محترف شكرا لردك