المستهلك المصري عايز ايه ؟ موضوع للمناقشة

**Haitham Basha** · 25-09-2013 01:30 AM

شوف يا باشمهندس سمير أنا من عشاق السيارة الصغيرة و كذلك من محبي الكبيرة و عليه لو الموضوع ده طبق في مصر زي ما أنا شفته بعيني في لندن و في جنيف و في كذا دوله أخرى هيبقى الأكثر في حصة السوق للسيارة الصغيرة كالـ i10 مثلاً و هيكون ليه فوائد كثيرة جداً و كل الي بيقول أصل و فصل دلوقتي هيغير تفكيرو ساعتها و على فكره العربية الصغيرة بتسافر و بتروح و بتيجي و بتقلب الدنيا يمكن أكثر من الكبيرة كمان على سبيل المثال أنا كان معايا بيجو 206 و العربية دي شافت بلاوي و راحت شرم و الغردقة و الساحل ، الجولف الرابيت برضو راحت اسكندرية و الفيوم و الهيونداي i30 عملت زيهم بالضبط ما علينا يعني من التنوع في الأنواع أنا من النوع الي بيحب ينوع و يجرب و يشوف بس مش دا مجلنا و لا نقطة النقاش ... لو الموضوع ده طبق أنا هكون في صف السيارة الصغيرة بكل المقاييس لأني أظن ساعتها إن الميني كوبر و الجولف هيرخصو ههههههههههههه بهزر أكيد بس فعلاً العربية الصغيرة ممتعة جداً كفاية الزحمة و إنك متبقاش قلقان و تركن في أي حته ...

**michohat** · 25-09-2013 12:02 PM

لو الظروف الماديه مستريحه هتكون عربيه الالنترا للسفر لان ف السفر العائلة بتكون معايا ( السفر قليل ) ومعاها ال i 10 علشان التنقل ف داخل البلد

لكن اذا كان المتاح بالنسبة لي عربيه واحده فقط فهزنق نفسي واجيب ال الالنترا مع اني مش بسافر كتير وغالبيه الوقت بكون لوحدي ف العربية بس لما بسافر العيلة (3 افراد ) بتكون معايا بالاضافة للشنط

**Samir Elshahawy** · 25-09-2013 12:47 PM

المشاركة الأصلية كتبت بواسطة michohat

لو الظروف الماديه مستريحه هتكون عربيه الالنترا للسفر لان ف السفر العائلة بتكون معايا ( السفر قليل ) ومعاها ال i 10 علشان التنقل ف داخل البلد

لكن اذا كان المتاح بالنسبة لي عربيه واحده فقط فهزنق نفسي واجيب ال الالنترا مع اني مش بسافر كتير وغالبيه الوقت بكون لوحدي ف العربية بس لما بسافر العيلة (3 افراد ) بتكون معايا بالاضافة للشنط

طيب طالما مش بتسافر كتير ماينفعش تجيب العربية الصغيرة بسعر منخفض و مافيش داعي تزنق نفسك أو توفر الفرق أنت أولي به و لما تيجي تسافر تأجر عربية كبيرة ؟

عايزين نغير مفاههيمنا شوية و نخرج عن المألوف و المعتاد و ما ألفنا عليه أبائنا و أجدادنا

**profimh** · 25-09-2013 01:25 PM

المشاركة الأصلية كتبت بواسطة samir elshahawy

طيب هيا عربية زي ال أي 10 أو مافي فئتها مش ممكن تسافر ؟

طبعا تسافر و زى الفل انا شخصيا سفرت بيها مسافة 600 كيلو رايح جاى فى نفس اليوم يعنى 1200 و كانت تمام الحمدلله
و مقتنع ان اى عربية صغيرة تقدر تعمل اللى تعمله الكبيرة بس بمقاييس ووقت اقل
بس انا اقصد ان الالنترا فى المسافات اللى فوق ال 200 كيلو هتبقى افضل فى الراحة و طول النفس و القوة لو حبيت تخلص موقف بشداية كده
معلش اعذرنى انا برضه متحيز شوية للإلنترا( فيرجنيا) جميلة الجميلات

**Samir Elshahawy** · 25-09-2013 01:32 PM

المشاركة الأصلية كتبت بواسطة profimh

طبعا تسافر و زى الفل انا شخصيا سفرت بيها مسافة 600 كيلو رايح جاى فى نفس اليوم يعنى 1200 و كانت تمام الحمدلله
و مقتنع ان اى عربية صغيرة تقدر تعمل اللى تعمله الكبيرة بس بمقاييس ووقت اقل
بس انا اقصد ان الالنترا فى المسافات اللى فوق ال 200 كيلو هتبقى افضل فى الراحة و طول النفس و القوة لو حبيت تخلص موقف بشداية كده
معلش اعذرنى انا برضه متحيز شوية للإلنترا( فيرجنيا) جميلة الجميلات

هههههههههه حقك أتحيز براحتك انا معاك و لكن عايزين نفكر بشكل عملي

ليه مايكونش معاك عربية صغيرة بسعر أقل و تكاليف تشغيل أقل و شغل حيز اقل في الشارع و لما تحب تسافر سفرية طويلة شوية تأجر عربية كبيرة تسافر بيها و تريح عربيتك ؟

**horas3000** · 25-09-2013 01:48 PM

احلي حاجه في الموضوع انكم معتبرين الالنترا عربيه كبيره ههههههه

نيجي للجد بقي
شخصيا انا لو هقدر هجيب الاتنين و استخدم ال i10 في المدينه و الزحمه و الالنترا للسفر و العيله و كده

و في الواقع انا عامل كده فعلا
الباجيرو عربيه السفر و العيله والشقي و البهدله
ال 316 للتنقلات داخل البلد و الشغل و كده

و مؤخرا و لان مراتي عندها ظروف و مش بتسوق
فانا مستولي علي ال i10 بتاعتها تماما
الاول كان استسهال و بعد كده سوقت فيها لانها ظريفه جدا
و بروح و باجي بيها و معتمد عليها بشكل اساسي و العربيتين التانين مش بيتحركوا الا مره في الاسبوع
و العربيه مناسبه جدا لمصر و طرقها و بجري بيها عادي و معدل سرعتي 120 و جبت بيها 160 كمان
و ممكن تسافر عادي من غير اي مشاكل
كل مشكلاتها افتقارها لاي من عوامل الامان و ده اللي بيخليني مش واخد راحتي قوي لانها وقت الجد ممكن متسعفنيش
و الاسوء من كده ان بسبب حجمها فانت بيتم البلطجه عليك من كل اللي اكبر حجما
لكن ده عيب ناس مش عيب العربيه

**michohat** · 25-09-2013 01:57 PM

هيا الفكرة لسه عليها شوية
لان ف الايجار الواحد بيكون مقلق من العربية اللي معاه ومش عارف حالتها
وصعب اجر العربية بسواق علشان الاسرة

**Samir Elshahawy** · 25-09-2013 02:09 PM

المشاركة الأصلية كتبت بواسطة horas3000

احلي حاجه في الموضوع انكم معتبرين الالنترا عربيه كبيره ههههههه

هههههههههههه
مش مقصودة طبعا بس أنا قولت نعتبرها كبيرة مقارنة بال اي 10 علشان معظم العربيات في مصر من نفس فئة الالنترا تقريبا

الالنترا تعتبر برضه عربية مدينة مش عربية سفر و مسافات طويلة لكن مش معني كده أنها ماتسافرش

عربيات السفر فعلا زي ماحضرتك قلت الباجيرو و مافي فئتها من باقي الموديلات و ده اللي أنا قصدته من الموضوع

الفرق في الاستخدام بين العربيات الكبيرة أو الفخمة و العربيات الصغيرة و مدي تقبل الناس هنا في مصر للفكرة و أستعدادهم للتنازل عن المنظرة بركوب عربية كبيرة و مكلفة و بسعر مرتفع بالرغم من عدم أحتياجهم الفعلي لها مقابل شراء سيارة صغيرة حتي لو لعدد 2 راكب بس بتقضي الغرض

**profimh** · 25-09-2013 02:13 PM

المشاركة الأصلية كتبت بواسطة samir elshahawy

هههههههههه حقك أتحيز براحتك انا معاك و لكن عايزين نفكر بشكل عملي

ليه مايكونش معاك عربية صغيرة بسعر أقل و تكاليف تشغيل أقل و شغل حيز اقل في الشارع و لما تحب تسافر سفرية طويلة شوية تأجر عربية كبيرة تسافر بيها و تريح عربيتك ؟

طبعا متفق معاك تماما بس هى حكاية الايجار عندنا زى ما انت عارف عملية مقلقة مش زى بره
فيا ريت الاتنين يبقى موجودين كل واحدة لغرضها يبقى كده تمام و ان شاء الله انا ناوى على كده