مية الحنفية واضرارها على الموتور

**المنسي** · 24-09-2013 08:53 PM

طبعا الواحد تعب من كتر الكلام على موضوع مية الحنفية ومدى ضررها على الموتور ومدى عدم نفعها انا عملت الموضوع ده لانى قبل كده اتقرصت من مية الحنفية وجوان وش السلندر اللى ضرب والوش اللى كان مليان تنقير من الصدأ بتاع المية هنا هاوريلكم كام صورة واثار مية الحنفية عليها وكمان هارفق لينك لتجربة مية حنفية فى عربيتين لانسر ولانوس

وده تقرير لاحد الاعضاء
http://www.nilemotors.net/Nile/380119-a.html
http://www.nilemotors.net/Nile/308801-a.html

**lidosasa** · 24-09-2013 10:38 PM

المشكلة فى مصر هى مشى حالك وكبر دماغك وأغلبها كمان بتتقال ليك من الصنيعية اللى بيشتغلوا فى العربية أنا مرة كنت بغير الريداتير وقلت للراجل على ما تخلص حروح البنزينة أجيب مياه موبيل زرقاء وجاى قالى ليه يا استاذ دى مصاريف على الفاضى وملهاش لازمة قلت ليه معلش أهو أنضف للعربية قالى خلاص لو مش عايز تحط مية حنفية هات مية معدنية لاء فكيك ياض . هو أنا يعنى معايا قرشين وعايز اطيرهم والسلام والمياه المعدنية فيها أملاح زيها زى الحنفية بالظبط وبتعمل صدأ ومردتش عليه خالص وسبته ورحت جبت المياه الزرقا ورجعت

**sakr_skoda** · 24-09-2013 10:41 PM

حرمت يابيه اشرب مية من الحنفية بس اسمحلى ممكن اشرب من الزيييييييييير؟؟؟؟؟؟؟؟

والله ياخ منسى موضوعك هايل وفعلا مية الحنفية بتاثر على معدن الموتور من الداخل بس حنعمل ايه ياعم كدا يبقى الواحد يلزمة برميل مية خضرا لأننا بسم الله مشاء الله كل اسبوع مشكلة فى دورة التبريد بتخلينى افرغ مية التبريد على الارض خراطيم مواسير كيعان ووصلات وما اكثرها فى فليشيتنا فاحنا بنحط مية حنفية ونتوكل على الله مادم العلاج موجود اقصاها 3000 ونسقط موتور استيراد *

**aw2100** · 25-09-2013 12:03 AM

الله ينور يامنسى مية التبريد شئ مهم جدا فى العربية وبالاضافة لمنع الصدء بتريح الموتور من الحرارة الزايدة وتبخر المية وكل شوية العربية تعطش وتشربها بتنسى خالص موضوع المية دى بتاخد 1/4 لتر مية حمراء كل كام شهر تحياتى !

**أحمد جودة** · 25-09-2013 09:45 AM

تحياتي مستر منسي موضوع مفيد جدا ...... والله جيت على الوجيعة أنا لسة امبارح بحط صباعي فى القربة علشان اقيس المنسوب لقيت الماية عاملة صدا وعاوز بالفعل اغير الردياتير واحط ماية خضرا بس مستني فى أقرب فرصة علشان العربية مخلصة على جيوبي أول بأول

طيب اخر كلام علشان أنا كنت بأوح وبهرب من موضوع الماية

عاوز اشتري ردياتير ياتري أجيب أي نوع بالظبط

والماية أجيب لونها اية ونوعها أية ومنين

هتوكل على الله وأعمل الشغلانة دي وامري لله

**المنسي** · 25-09-2013 01:42 PM

المشاركة الأصلية كتبت بواسطة ابوابراهيم323

شكرا أخى منسى على الموضوع المهم جدااا ده
التوجه دلوقتى يكون لواحد طبعا بتاع رداتير
اقوله ايه بالظبط ؟؟ يعنى اقوله يعمل ايه عندى
وهل اشترى مياه حمراء ولا خضراء

الشكر لله اولا لو ناوى تعمل الموضوع والردياتير عندك الاصلى بتاع العربية فيضل تغيره بواحد صينى الومنيوم وتمنه تقريبا 190 جنيه وهتجيب ترموستات ايطالى 82/68 ودى اللى راكبة عندى بس ناوى ان شاء الله اغيرها ل 90/80 فى المرة اللى هنظف فيها دورة التبريد وهتجيب مية سواء حمراء او خضراء المهم ان التركيز لايقل عن 33% لان فالكتالوج بتاع العربية التركيز مكتوب 40% وتروح لبتاع الردياتير ويعمل الشغلانة بس اهم حاجة ميكونش عندك خرطوم مشقق وبيسرب علشان ميبقاش رميت فلوسك فالارض وكمان يكون غطاء القربة السيكس بلف بتاعه سليم ومش بيسرب وهتلاقى الدنيا بعدها ان شاء الله تمام سواء فى درجة حرارة الموتور او فى نقصان المية اللى كل شوية تزودها

**المنسي** · 25-09-2013 01:49 PM

المشاركة الأصلية كتبت بواسطة lidosasa

المشكلة فى مصر هى مشى حالك وكبر دماغك وأغلبها كمان بتتقال ليك من الصنيعية اللى بيشتغلوا فى العربية أنا مرة كنت بغير الريداتير وقلت للراجل على ما تخلص حروح البنزينة أجيب مياه موبيل زرقاء وجاى قالى ليه يا استاذ دى مصاريف على الفاضى وملهاش لازمة قلت ليه معلش أهو أنضف للعربية قالى خلاص لو مش عايز تحط مية حنفية هات مية معدنية :m_yes[1]: لاء فكيك ياض . هو أنا يعنى معايا قرشين وعايز اطيرهم والسلام والمياه المعدنية فيها أملاح زيها زى الحنفية بالظبط وبتعمل صدأ ومردتش عليه خالص وسبته ورحت جبت المياه الزرقا ورجعت

ماهو ده الفتى اللى الواحد بيعانى منه لما تروح لصنايعى ويعمل من البحر طحينة ... شكرا لمرورك ونورت موضوعى

**المنسي** · 25-09-2013 02:01 PM

المشاركة الأصلية كتبت بواسطة sakr1964

حرمت يابيه اشرب مية من الحنفية بس اسمحلى ممكن اشرب من الزيييييييييير؟؟؟؟؟؟؟؟

والله ياخ منسى موضوعك هايل وفعلا مية الحنفية بتاثر على معدن الموتور من الداخل بس حنعمل ايه ياعم كدا يبقى الواحد يلزمة برميل مية خضرا لأننا بسم الله مشاء الله كل اسبوع مشكلة فى دورة التبريد بتخلينى افرغ مية التبريد على الارض خراطيم مواسير كيعان ووصلات وما اكثرها فى فليشيتنا فاحنا بنحط مية حنفية ونتوكل على الله مادم العلاج موجود اقصاها 3000 ونسقط موتور استيراد *

ولا برميل ولاحاجة وعلى فكرة انا عندى فالعربية حاطط مية خضرا وشبه مبزودهاش الاكل شهر ونص او شهرين وبتكون المية نزلت من علامة الماكس وقبل علامة المينيمم بشوية ومعايا باقى الجركن المية الخضرا فى شنطة العربية بزود منه بتاع كوباية مية وبعدين انا بنصح ان محدش يحط مية خضرا الا لو متاكد انه مفيش تسريب فى دورة التبريد لان المفروض دورة التبريد تبقى دورة محكمة الغلق وبعدين لما تجيب جركن تمنه 35 او 40 جنيه وهيفضل قاعد معاك وكمان هيحافظ على الموتور افضل ولا تجيب موتور استيراد الله اعلم بيه هيكون افضل

-

الموضوع: مية الحنفية واضرارها على الموتور

LinkBack

أدوات الموضوع

عرض

مية الحنفية واضرارها على الموتور - انشر الموضوع فى :

-

-

-

-

-

-

المواضيع المتشابهه

مياة الحنفية دمرت العربية (نقل التجربة للإفادة)

نصيحة بخصوص الفلاتر وميه الحنفية

ما هى التلفيات المترتبة على استخدام مياه الحنفية بدلا من المياه الخضراء ؟

محدش يستعمل مياه من الحنفية - الموضوع خطير وناس كتير بتستعملها

شركة بيبسي تعترف أن مياه أكوافينا المعدنية مصدرها الحنفية

الكلمات الدلالية لهذا الموضوع

المفضلات

المفضلات

ضوابط المشاركة