رائحـــــــــــة عفنــــــة !

**BUNSH** · 24-09-2013 11:18 PM

السلام عليكم ورحمة الله وبركاتة

عودة بعد انقطـــــــــــــاع طويل ! بسبب ظرووف البلد *ربنا يعديها على خير ويسترها* ,, و يارب تكونوا بخير .

المهم .. نازل فى امانة الله وبمجرد ماقفلت الباب شميت ريحة *اعزكم الله* اكنــــى مخبى قتيل جوة العربية .. نزلت وقلبت العربية يمين وشمال *فتحت الكبوت والشنطة ونزلت تحت العربية* أنى اشوف مثلا رجل قطة او عرســــة مفرومة ! ابداا مفيش ايتوهــــا حاجة بس برضة الريحة لاتطـــــاق .. اخدتها وطلعت على اقرب بنزينة بصراحة دية اللى بتعامل معاهم من ساعة ماجبت العربية ومحترمين جـــــدا ..

اولا : تحديد مكان القتيل .
....خارجة من الرفرف الخلفى / شمال ومسربة على الصالون والشنطة....

ثانيا : بحث افضل الحلول مع بدء التنفيذ !
....تم فك الكنبة وفك للبادة الشنطة بالفانوس الخلفى/ شمال بالكارتيرة بالفردة وطبعا الاكصطدام الخلفى فكيتوة.... ياعينى فلة اتشردت

على امل أنى الاقى الجثة مزنوقة ولا حاجة هنا ولا هنا ,, والمفأجاة مفيش حاجة بس الريحة كل ماشيل حاجة تفحفح اكتــــــــــر !!!!

ثالثا : استخدام افضل اساليب العلاج .

*داخليا* تم تنضيف العربية من جوة الاول ومسحها بمطهـــر ديتول وبعد كدة اديتها وش فيرى *برتقان* ونفس الكلام اتعمل مع الشنطة وبعد كدة رجعوا كل حاجة زى ما كانت ,, *خارجيا* تم غسل العربية من تحت بالجــــاز *بغض النظر أنى كنت عايز انقها فى مية نابالم* وفى الاخر اخدت غسيل خارجى ...

النتائج :

الحمدلله الريحة راحت بنسبة 99.8 % مع أنى لما اوطى جنبة الفردة الشمال بشم ريحتها بس بسيط وجوة الصالون مفيش حاجة ..

وطبعا قبل مادور العربية لازم تخبط وتكلكس يمكن تكون حاجة نايمة هنا ولا هنا

السؤال بقى :

هل غسل العربيات بالجاز والمية من اسفل بيجيب برومة على المدى القريب او البعيد ؟!

فى رعــــــــــــ الله ـــــــــــــاية

**eng.salama93** · 24-09-2013 11:46 PM

دا الناس بتحط جاز ع الميه عشان العربيات ميجلهاش بارومة

**BUNSH** · 24-09-2013 11:47 PM

المشاركة الأصلية كتبت بواسطة samir elshahawy

بداية مرحبا بالعودة و يارب مايقطع لك عادة و لا نور هههههههههههههههه

أنت عملت الفيلم ده كله و كان فاضل تفكك العربية كلها و في الاخر مالقيتش حاجة ؟

غسيل العربية بالمياه و الجاز قد يكون مضر للأسباب التالية :
1- لو بضغط عالي ممكن يدخل علي اي من حساسات الفتيس او أي حاجة و يعمل لك مشكلة
2- الجاز ممكن يأثر علي الكاوتشات او الاويل سيلات أو الخراطيم و يخليها تنشف و تشقق بعد كده

لو هاتغسل بمياه و جاز يكون بالشروط التالية :
1- بدون ضغط عالي
2- يتم التجفيف بأستخدام الهواء بعدها بضغط عالي
3- الابتعاد قدر الامكان عن الاماكن المهمة مثل الفتيس و الكبالن و الاجزاء المطاطية

و الافضل من كل ده أنك تروح لكار كير متخصص أفضل لنهم بيستخدموا منظفات خاصة لأزالة الشحوم و بطرق كيميائية لاتؤثر علي البوية أو الاجزاء سالفة الذكر

هع هع ,, يارب .
ربنا مايوريــك ياهندســـــة كان يوم مايعلم بية الأ ربنا .. بصراحة مسبتش حد الا ودعيت علية منهم شنج مونج كو على هبور على سمير ريــــــان !
مالقتش حاجة فعلا بس اتوقع انها اتفلفلت ووقعت مثلا دة الأ بقى لو لسة متخزنة بس مش هتبان الا بعد يومين !!!! هيبقى مرار طافح *ربنا يستر*
هوة أنا قولتلة يغسل الجزء الخلفى فقط *بالمية والجاز* مع انة كان عايز يعملها كلها .. بس فاتنى حتة التنشيف دية .. ومكنش فيــــا دماغ أنى اروح أى كار كير ..

**Silent~Dream** · 25-09-2013 12:13 AM

بياثر على المدى البعيد على اى حاجه مطاطيه لذا يفضل غسله او 2 بس فى السنه بالجاز و بدون ضغط غالى زى ما العضو المحترم و ضح فوق

**M I D O** · 25-09-2013 12:29 AM

طيب مكملتوش لية كنت ممكن تلاقي الجثة :d
حصلتلي مرة وفي الاخر لاقيت قطة ميتة ومستخبية في ركن بعيييييييييد عند المحرك كانت رايحة تدفي ياعيني في الشتاء من البرد قامت رايحة لقضاها وبعد مرار يومين طلعناها الحمد لله
السلبي في الموضوع .. الريحة زي الزفت ومكنتش قادر اتنفس وخلصت 3 علب معطر في العربية ومازالت
الايجابي في الموضوع .. كنت كل ما امشي في شارع حتي ولو زحمة الاقي العربيات تبعد وتاخد جمب ويفتحولي الطريق عشان اعدي لدرجة ان وسط الزحمة تلاقي ممر كدة مفتوحلي امشي فية وباقي العربيات لازقة في بعضهاعلي الجمبين :d

**BUNSH** · 25-09-2013 01:42 AM

شكـــــــــراا للاخوة الافاضل اللى ردوا ..

المشاركة الأصلية كتبت بواسطة m i d o

طيب مكملتوش لية كنت ممكن تلاقي الجثة :d
حصلتلي مرة وفي الاخر لاقيت قطة ميتة ومستخبية في ركن بعيييييييييد عند المحرك كانت رايحة تدفي ياعيني في الشتاء من البرد قامت رايحة لقضاها وبعد مرار يومين طلعناها الحمد لله
السلبي في الموضوع .. الريحة زي الزفت ومكنتش قادر اتنفس وخلصت 3 علب معطر في العربية ومازالت
الايجابي في الموضوع .. كنت كل ما امشي في شارع حتي ولو زحمة الاقي العربيات تبعد وتاخد جمب ويفتحولي الطريق عشان اعدي لدرجة ان وسط الزحمة تلاقي ممر كدة مفتوحلي امشي فية وباقي العربيات لازقة في بعضهاعلي الجمبين :d

هية الحتة الخلفية *اللى موبوئها بس* لكان الباقى سليم الحمدلله ..
وربنا يستر تطلع ريحة بس وترووح !

هع هع ,, فكرتنى بعربية الاسعاف .

**khaabas** · 25-09-2013 05:43 PM

هع هع سيبك انتا يا كبير مفيش احلى من شوب فيرى بالبرتقان على العصرية :)

ومبروك على نضافة العربية :p

**khaabas** · 25-09-2013 05:49 PM

وعالفكرة نسيت اقول حاجة عنوان الموضوع جامد قوى قبل ما ادخل على الموضوع شميت رائحة عفنة هع هع
اهو ده التأثير السيكولوجى فى اللاوعى مما يؤثر على الاعصاب القابضة لفتحة المنخار :)