اسئلة هامة عن الابيزا 1998

**Mahmoudelsayed** · 25-09-2013 06:20 PM

السلام عليكم يا ابيزاوية
انا عندى اسئلة مهمة بخصوص ابيزا 1998 موتور جولف 1400 هاف انجكشن !!!

1- هل هناك فرق فى استهلاك الوقود باستخدام بوجيهات 1 او 2 او 3 شمعة ؟
2- ازاى اعرف ان الامبوليزر بتاعى شغال ؟
3- ازاى ارستر عداد الكيلومتر ؟
4- ازاى اختبر ثبات العربية بتاعتى واحدد اللى هيا محتاجاه زى ترصيص علبة دركسيون ؟
5- ازاى اسرع لوك السنتر فى القفل والفتح لانه بياخد وقت ؟

6- هوا فى عتب كساحات لجناب العربية بيتباع عادى ولا لازم عمولة ؟
7- اسعار الكساحة الامامية و مساعدين الشنطة ؟
8- هل هناك اى تعديل او حل لاستخدام بنزين 80 مع العلم ان الموتور جولف 1400 هاف انجكشن ؟

وشكرااااااااااا جزيلا لكل الابيزاوية اللى مش بيتاخروا على حد فى تقديم النصيحة

**SYD** · 25-09-2013 06:25 PM

اولا الف مبروك العربية
ثانياً هرد علي كل اسئلتك دي لما اقعد قدام الكمبيوتر عشان انا داخل موبايل

تحياتي

**Mahmoudelsayed** · 25-09-2013 10:32 PM

الله يبارك فيك يا باشمهندس محمد
فى انتظار ردك

**Karim Ibiza** · 25-09-2013 11:18 PM

المشاركة الأصلية كتبت بواسطة mahmoudelsayed

السلام عليكم يا ابيزاوية

انا عندى اسئلة مهمة بخصوص ابيزا 1998 موتور جولف 1400 هاف انجكشن !!!
الموتور الهاف انجيكشن بينزل فى الـ94
لكن الـ98 1400 فول انجيكشن
1- هل هناك فرق فى استهلاك الوقود باستخدام بوجيهات 1 او 2 او 3 شمعة ؟
لازم تستخدم البوجيه الخاص بموتورك عشان استهلاك البنزين والأداء وتقدر تعرف البوجيه المناسب لموتورك من خلال الموقع ده http://www.ngk.de/nc/en/product-find...w/zk_benziner/
2- ازاى اعرف ان الامبوليزر بتاعى شغال ؟
لو الايموبلايزر مش شغال العربية مش هتدور اصلا
3- ازاى ارستر عداد الكيلومتر ؟
عداد الكيلومتر مش بيتصفر لكن اللى بيتصفر هو عداد الرحلات عن طريق ضغطة طويلة وهتلاقيه اتصفر وده بينطبق على كل العربيات اللى فى العالم
4- ازاى اختبر ثبات العربية بتاعتى واحدد اللى هيا محتاجاه زى ترصيص علبة دركسيون ؟
اكشف عند بتاع زوايا ثقة وشاطر وبعدين عفشجى ثقة وشاطر وطابق كلامهم ببعض, او انك لو تعرف تشخص الاصوات والمشاكل فى العفشة يبقى مش هتحتاج حد منهم غير لما تيجى تغير
5- ازاى اسرع لوك السنتر فى القفل والفتح لانه بياخد وقت ؟
انا مش فاهم قصدك بس عموما دى شغلانة بتاعت كهربائى او بتاع ظبط ابواب ومفاتيح
6- هوا فى عتب كساحات لجناب العربية بيتباع عادى ولا لازم عمولة ؟
اسأل عليها جديد ولو لقيت بتاعت الجولف 3 هتركب عادى ولو مش كده يبقى تجيبها من بره من على النت
7- اسعار الكساحة الامامية و مساعدين الشنطة ؟
الكساحة فى حدود من 100 لـ 200 والمساعدين بـ 75 جداد بتوع الفليشيا
8- هل هناك اى تعديل او حل لاستخدام بنزين 80 مع العلم ان الموتور جولف 1400 هاف انجكشن ؟
الهاف انجيكشن شغال 80 زى الفل
وشكرااااااااااا جزيلا لكل الابيزاوية اللى مش بيتاخروا على حد فى تقديم النصيحة

:018a1d~146:

وجود موتور زى ده فى عربية 98 ده حاجة تعيبها مش تميزها

**SYD** · 28-09-2013 05:17 AM

المشاركة الأصلية كتبت بواسطة Mahmoudelsayed

السلام عليكم يا ابيزاوية

وعليكم السلام ورحمة الله وبركاته
وأسف علي التأخير في الرد

انا عندى اسئلة مهمة بخصوص ابيزا 1998 موتور جولف 1400 هاف انجكشن !!!

1- هل هناك فرق فى استهلاك الوقود باستخدام بوجيهات 1 او 2 او 3 شمعة ؟

اولا خلينا نتفق انك لازم تركبلها البوجيه بتاعها بناء علي كود المحرك
ثانيا مفيش اي من مواتير فولكس بيركبله بوجيه 2 شمعة نهائي
ثالثا سواء البوجيه كفران او حتي جديد مش بيفرق في الأستهلاك لأن مش من علامات استهلاك البوجيه زيادة استهلاك الوقود
وبعد التغيير مش هتحس بالفرق الواو
لكن عموماً عدم التزامك بالبوجيه الموصي بيه ممكن يأثر معاك في الأستهلاك

2- ازاى اعرف ان الامبوليزر بتاعى شغال ؟

الأيموبلايزر مش بيتجرب
لكن ممكن تعرف لو فصلت فيشته من الوحدة الخاصة بقراءة الكود وارسالها للecu ودي موجودة في درج الفيوزات فوق الدواسات
هتلاقي علبة سودا اكبر شوية من علبة السجاير وخارج منها فيشتين - افصل احدهما وحاول تدور
لو العربية دارت معاك يبقي الأيموبلايزر مفصول - الطبيعي انها هتدور معاك في حدود ال3 ثواني وتبطل ثاني

3- ازاى ارستر عداد الكيلومتر ؟

عداد الكيلومتر مش بيعمل reset لكن عداد الtrip هو اللي بيتعمله reset ودة عن طريق الضغط علي الزرار الموجود بجواره لمدة 3 ثواني

4- ازاى اختبر ثبات العربية بتاعتى واحدد اللى هيا محتاجاه زى ترصيص علبة دركسيون ؟

اختبار الثبات دة صعب شوية لأنه لو فشل هتبقي العواقب وخيمة
لكن انت هتحسها في الملفات او لو ماشي بسرعة جمب تريلات وعربيات نقل واتوبيسات - هتحس قد ايه عربيتك مكلبشة في الأرض - ولما تعلي عن 100 وتلاقي نفسك مش حاسس بالسرعة وطبعا لو ركبت فيات او شاهين هتحس قد ايه عربيتك ثابتة

اما عايزة ايه - فدة هيحدده بتاع العفشة او بتاع الزوايا

5- ازاى اسرع لوك السنتر فى القفل والفتح لانه بياخد وقت ؟

السنتر الهوا بطئ شوية في الفتح والقفل بس مش جداً
ولو حاسس انه بطئ جداً جرب بطرمبة هوا تانية

6- هوا فى عتب كساحات لجناب العربية بيتباع عادى ولا لازم عمولة ؟

مش هتلاقي عتب جديد ليها علي ما اعتقد
وبالتالي مش قدامك غير التفصيل

7- اسعار الكساحة الامامية و مساعدين الشنطة ؟

الكساحة الأمامية لو فرضنا انك لقيتها لوحدها - فمش هتقل عن ال150 - 200 جنيه
اما مساعدين الشنطة - ممكن تجيب استيراد ب50 او جديد (بتاع فيلشيا) ب 75 جنيه

8- هل هناك اى تعديل او حل لاستخدام بنزين 80 مع العلم ان الموتور جولف 1400 هاف انجكشن ؟

لو موتورك spi او رشاش واحد فقط - ممكن تستخدم بنزين 80 بس ابقي راعيها في السيرفيس وتغيير فلتر البنزين كل من 5000 - 10,000 كم
واحب اقولك ان فولكس بتنصح باستخدام بنزين 92 حتي للمحركات الكاربراتير موديل 94

وشكرااااااااااا جزيلا لكل الابيزاوية اللى مش بيتاخروا على حد فى تقديم النصيحة

خالص تحياتي

يمكنكم متابعة اهم الموضوعات من خلال صفحة القسم علي الفيس بوك
http://www.facebook.com/SeatNileMotors