غيرت الكاوتش

**Mohamed Abosef** · 26-09-2013 02:58 AM

صباح الخير علي احلي شباب نيسان
من كام يوم كده الكاوتش ابتدي يستهبل و كنت انزل الصبح الاقي فرده كاوتش علي الرض خالص
و نظرا لظروف شغلي بروح و ارجع من علي الصحراوي قررت تغيير الكاوتش
و علي الفور توجهت الي واحد بتاع كاوتش محترم جدا عندنا في الاسكندريه اسمه / علي حبيب
و سألته علي الكاوتش البريدجستون قالي انه غالي و اقنعني بالكومهو فره ناعمه و نقشتها مريحه في الجري و الفرامل و اناشخصيا مجربها في سياره والدي الاوبل فيكترا كاوتش محترم و مريح
و قررت اني اجيب فردتين حطيتهم ادام طبعا و كانو مقاس الفابريقه اللي هو ١٨٥/٦٥/١٥و قالي بلاش تغير الاربعه و قالي ان الفردتين اللي ورا كويسين و حرام يتغيروا دلوقتي و ده يدل علي انه راجل محترم و مفيش عنده فصال في الاسعار و ده لانه يعتبر ارخص واحد في اسكندريه و كان تاريخ انتاج الكاوتش السبوع ال٣٠ من عام ٢٠١٣ و ده بيبقي مكتوب١٣٣٠ و علشان انا اعرفه قالي التركيب و الفك و الترصيص و النيتروجين و البلوف مجاناً
و قررت اني افك الفردتين اللي ورا علشان اراجع الترصيص و انضف الجنوط و اغير البلوف لانها ناشفه شويه و كل ده ب ٢٠ جندي فقط لا غير
الانطباع بعد تغيير الكاوتش:
• حسيت بالامان خاصة اني بمشي علي طريق سريع
• راحه و هدوء في المشي في الشوارع المكسره
• تحسن كبير و ملحوظ في اداء الفرامل
• نعومه في الدريكسيون و خفه في الباور حاصة و العربيه واقفه
• العربيه بقت ثابته في الجري

¥¥¥¥¥¥¥¥¥¥¥¥¥¥¥¥¥¥¥¥¥¥¥¥

و عامل التركيب نصحني اني اظبط زوايا لان الكوتش القديم كان متاكل من ناحيه و التانيه لا
و روحت عملت الزوايا في البنزينه بتاعه مصر اللي في البراهيميه علي البحر كان العجل فعلا مقفول و العربيه بطلت تحدف شمال و الاغرب ان الراجل طلع معايا علشان يجرب و بعد كده قالي الدريكسيون مش مظبوط و عدله و كله تمام و الكلام ده ب ٢٠ جنيه و اديته اكراميه ١٠ جنيه

¥¥¥¥¥¥¥¥¥¥¥¥¥¥¥¥¥¥¥¥¥¥¥¥¥ ¥¥
الكاوتش روح العربية

و كده انتهي التقرير و يارب اكون افادتكم
و فعلا انت تستاهلو اكتر من كده

**svneleven** · 26-09-2013 06:05 AM

1000 مبروك لكن نصيحة الكاوتش الجديد بيركب ورا مش قدام. و بعد كام ألف يطلع قدام.

**aldesha989** · 26-09-2013 08:15 AM

الف مبروك ياريس انا كمان الحمد لله لسه مغيرهم وظابط زوايا فى بنزينه مصر بس اللى فى الشاطبى حلوين برضه

بس عملك ايه فى الدركسيون علشان عندى نفس المشكلة

**akmm** · 26-09-2013 10:35 AM

مبروك الكاوتش الجديد وفعلا البياع ده محترم وامين ............. ياريت فيه منه في القاهره ...... البائع يعنى في امانته .

**wardet** · 26-09-2013 10:54 AM

بكام ياباشا
والف مبروك

**Ahmed_Ramadan** · 26-09-2013 02:07 PM

ألف مبروك و تدوبهم على خير ...عملوا كام الفردتين لوحدهم

**Mohamed Abosef** · 27-09-2013 04:22 AM

المشاركة الأصلية كتبت بواسطة svneleven

1000 مبروك لكن نصيحة الكاوتش الجديد بيركب ورا مش قدام. و بعد كام ألف يطلع قدام.

الله يبارك فيك
بس اللي اعرفه ان الجديد قدام علشان العربيه دفع امامي و الفرامل كمان

المشاركة الأصلية كتبت بواسطة aldesha989

الف مبروك ياريس انا كمان الحمد لله لسه مغيرهم وظابط زوايا فى بنزينه مصر بس اللى فى الشاطبى حلوين برضه

بس عملك ايه فى الدركسيون علشان عندى نفس المشكلة

الله يبارك فيك
غالباً انت عملت في نفس البنزينه اللي انا عملت فيها الزوايا
و الدريكسيون عندي كان معووج شمال و عدل الريجلاش بتاعه من تحت

المشاركة الأصلية كتبت بواسطة akmm

مبروك الكاوتش الجديد وفعلا البياع ده محترم وامين ............. ياريت فيه منه في القاهره ...... البائع يعنى في امانته .

الله يبارك فيك و هو فعلا راجل محترم

المشاركة الأصلية كتبت بواسطة wardet

بكام ياباشا
والف مبروك

الله يبارك فيك
الفرده الواحده عملت ٤٥٠ جنيه المقاس الاصلي

المشاركة الأصلية كتبت بواسطة ahmed_ramadan

ألف مبروك و تدوبهم على خير ...عملوا كام الفردتين لوحدهم

الله يباركلك
الفردتين عملو ٩٠٠ جنيه المقاس الاصلي

**mem** · 27-09-2013 09:01 PM

مبروك الكاوتش الجديد وفعلا الكومهو من الفرد المحترمه
بس حسيت انها فى مستوى البريد جستون ولا اقل شويه ولا زيها

**mamdouhsh1973** · 27-09-2013 11:58 PM

ياريتك جبت بريدجستون الاصلى ما فبش اريح منة

**dr.hazem** · 28-09-2013 12:22 AM

حسب اخر دراسات يفضل تحط الكاوتش الجديد ورا مش قدام طالما انت غيرت 2بس...
ده عشان تفادي ان العربيه تعوم منك بالذات احنا داخلين عالشتا.. ربنا يكفينا جميعا شر الطريق...
اللي عايز تفسيرات هوضحله باذن الله وممكن تدورا على ظاهرة الhydroplanning وفايدة نقشة الكاوتش....
تحياتي

Sent from my Xperia Arc S using Forum Runner