الموضوع: مطلوب مساعدة.. شراء أوبل تيجرا

[justify]السلام عليكم جميعاً :)

بدور من فترة على عربية تكون فيها مواصفات خاصة جداً..
خلاصة المواصفات في جملة واحدة "كان معايا فيكترا 2001" ودلوقتي عاوز اشتري عربية تانية بس الماديات مقيداني حبتين..

طبيعة استهلاكي عالي جداً.. ولازم العربية تستحمل معايا أوي.. وبصراحة الفيكترا مبدعة أوي في الموضوع ده ما شاء الله عليها..

معروض عليا عريبة "تيجرا" موديل 1996.. العربية شركة جوه.. واكسسوارتها الخارجية (زجاج - فوانيس - إلخ) كلها أصلية..

أنا هكشف عليها بعد يومين لأني مشغول حبة..

قرأت عن العربية كتير جداً.. وهي عاجباني جداً بصراحة .. وخصوصا إنش مش فارق معايا موضوع صالونها خالص..

بس اللي يهمني أعرفه (وطبعاً أنا مفهمش فيه) أنها متسقطلها موتور (استيراد بتاعها برده) 1600 عادي مش تربو.. (أنا أصلا معرفش الأصلي بتاعها تربو ولا عادي)..

عاوز أعرف ده يعيبها ؟؟؟ والميكانيكا بشكل عام عاملة إيه ؟؟؟ وطبعا قطع الغيار ؟؟

كمان العربية مفهاش تكيف أصلاً ،، وأنا نويت إن شاء الله أركب واحد.. معنديش أي فكرة أركب إيه ؟؟

بما إني ركيب أوبل 11 سنة ... عارف إن كل عربية ليها عفريتها...
زي الفيكترا ... عفريتها التكييف والـ إيه بي إس .... يا ترى إيه عفريت التيجرا ؟؟؟

أنا عاوز أعرف المشكلات بتاعتها... ولو ليها تعديلات لحل المشاكل دي ؟؟؟


آخر حاجة ... أنا عرفت أن التيجرا على مستوى العالم كله (شوفت يوتيوب كتير) فيها عيب غريب أوي ... وانت مدور العربية العربية (كأنها بتسخن) عادي جداً ... تلاقي الأر بي إم مش مستقر.. (على الرغم أن العيب ده من كل الناس مش بيأثر على العربية في أي حاجة)... بس هو إيه سببه أصلاً.. وهل ليه علاج ؟؟


شكراً فعلاً لكل من يساهم في أي إضافة :) :)[/justify]