الموضوع: سانديرو 2014 ولا لوجان 2014

الموضوع ده انا كنت عامله من فتره
وكان مفيد جدا جدا


http://www.nilemotors.net/Nile/362719-a.html

شكرا يا رجااالة اوى على ردودكم
طيب قصة الباور دى؟

طيب يا ديب بيه
ده سعرهم فى معرض الرينو هل بيقل لو حجزتها مثلا من ااتوكيل ولا ده هوا هوا سعر التوكيل واقل سعر اجيب بيه رينو منين؟

مفيش فرق حضرتك خاااااالص الفكرة كلها حضرتك عايز عربية سيدان ولا هاتشباك وربنا يوفقك واختيار موفق وعربية محترمة

دي شويه اراء لاعضاء هنا في المنتدي معاهم العربيه


السلام عليكم.
أنا معايا سانديرو (اخت اللوجان بس الهاتشباك) وححاول أسرد النقاط اللي ضدها كلها:
النقاط المعروفة: ودي لا اختلاف عليها
1- صوت الموتور عالي شوية (مش مزعج بس برضه عالي)
2- الكاوتش سيء ولو ناوي تجيبها غيره بالكتير بعد 10 ل 15 ألف أو بيعه استعمال وهي العربية لسة جديدة يجيب سعر عشان لسة ممشاش.
3- نتشة الفتيس واضحة في بعض الأحيان ومابتروحش بالتليين
4- دهان الاكصدامات خفيف وبيطلع باللمس (دهان العربية نفسه بالنسبة لي تقيل وده من كلام السمكري عشان كان عندي حكة ف طرف الرفرف بيعملها... يمكن حظي طلع كدة الله أعلم)
5- المساحات مش متظبطة مع البخاخات (أول ما تشتريها اطلع علي الاكسسوارات اشتري المقاس الأعلي للمساحة اللي قدامك والأقل للي جنبها حتلاقيها مظبوطة)
6- الباور تقيل شوية


نقاط موجودة عند البعض وغير موجودة عندي:
1- كرسي السواق بيزيق أو الضهر بيتهز: مش موجودة عندي ولو موجودة ماتروحش التوكيل روح لسروجي يظبطها حايخلصهالك ف 10 دقائق.
2- سخونية التابلوه أو الدواسات: الدواسات عمري ما حسيت بيها أما التابلوه مرة واحدة كان فيه زرار دافي بس كان مشوار 4 ساعات.
3- التكييف مكتوم: روح التوكيل يفضي شوية من الفيريون ساعات بيبقي ماليه بزيادة.
4- الطلعة بطيئة: مش عيب بس فيه ناس مش بتكبس شوية بنزين ف الطلعة الأولي فا بيحس ان العربية مابتديش معاه.. الموضوع كله انك طالما مش كابس شوية العربية بتفهم انك ماشي ع الهادي أو بتوفر.
5- الكيك داون مش شغال: لو عملت كيك داون عادي يديع أعلي عزم لنفس النقلة.. انزل بالدواسة للآخر عشان يسقط نقلة.
6- الطنابير أو التيل: ماحصليش أي مشاكل منها بس أي عربية فيها احتمال ان الطنابير أو التيل تبوظ بسرعة أول مرة (مش تبرير بس بص ف أي قسم حاتعرف)

نقاط موجودة عندي ومش عامة:
1- دواسة الفرامل بتزيق: في آخر 2 سم من الضغطة بتزيق بسيط أعتقد محتاجة حبة زيت أو شحم حاعملها وانا ف التوكيل ان شاء الله.

أما المميزات:
مش حاتكلم كتير بس اللي مش عيوب اعتبره مميزات هههههه.. بص هي حاجة ماحدش ينكرها ان أي حد جرب الفيرنا أو الأفيو أو الصيني بعد ما يسوق اللوجان شهرين تلاتة يحس انه سايق عجلة وده من واقع اني سايق الأفيو بتاعة أخويا مع السانديرو.. غير ان الأبواب وكل حاجة فيها محملة وكويسة.


العربية لما كانت بحاجة وتمانين كان سعرها ممتاز جدا بالنسبة لأي عربية ف نفس السعر.. فيرنا - لانوس (مع العلم ان مافيش لانوس اوتو) - أفيو - ساجا هي أحسن من كل ده.. سعرها حاليا 95 ألف وده يخلي أي حد بيجيبها جديد يعيد التفكير. وانا بكل صراحة لو كنت حاجيب السانديرو بسعرها الحالي 97 ألف مقارنة بوقت ما جبتها 83 ألف كنت حافكر تاني (أو بالأصح ماكنتش حاجيبها).

أما الخيارات المتاحة كالتالي:
1- الصني الشكل القديم (لو مش معترض انك تجيب الشكل القديم) عربية لها مميزاتها ولها عيوبها برضه اقرا عنها وشوف. بس برضه 97 ألف كتير عليها.
2- الصني الشكل الجديد مش داخلة دماغي ومافيش حد يقنعني انها كويسة ب 110 ألف!!
3- ادخل ف المستعمل وده كان حايبقي قراري في وقت زي ده لو كنت لسة حاجيب عربية.. بل اني بافكر أبيع السانديرو علي 90 وأزود عليها وأجيب جيتا 2008-2009 استعمال بس مش عاوز أبقي باغير عربية كل شوية ومستني يمكن أجيب الأعلي ان شاء الله قدام.

من الآخر مافيش عربية زيرو تستاهل تمنها ف الوقت الحالي اللهم الا البيجو ال 301 سعرها حاليا 123 ألف أول فئة أوتو.






العربية معايا دلوقتي بقالها 23700 كيلو و النتشة بين الاول و الثاني بتظهر بس في حالة ان الطريق زحمة و انت جبت سرعة عالية على الاول و اقل من الثاني فالعربية بتنقل ثاني ساعتها علشان بيبقى احسن ليها علما بان دي حاستها في الصني الياباني مش المصري و موجودة في فتايس اوتو كثير

الفتيس فرنساوي 100% و هو هو نفس فتيس الميجان و نفس موتور الميجان مع اختلاف ان موتور الميجان فيه الترس المسؤول على تغيير حركة الفالفات على حسب السرعة و دوسة البنزين (ده اللي انا فاهمه من المهندس بتاع التوكيل) مش موجود عندنا لأن الفالفات عندنا حركتها ثابته

سخونة الدواسات دي نسبية بتختلف من شخص للثاني انا حسيت بيها في الصيف مع المسافات الطويلة و هي تحس بدفا من عند الرجل اليمين و التوكيل بيحطلك طبقى لباد عند المواسير بتاعة المياه السخنة اللي بتسبب الاحساس بالحرارة ده و لو معملش حاجة بيزودوا اللباد ده زيدة شوية و ممكن تنتهي تماما بانك تلغي التكيف السخن زي مالدكتور احمد عبد الرحمن ما عمل في المواضيع المثبته

السحب زي معظم العربيات الاوروبي بيبقى ثقيل لحد ا60 و بعد كدة بتلاقي تسارع العربية كويس جدا لحد ال140 150 و من ال140 لحد ال190 بيبقى بطئ شوية

العربية انا متفق مع الناس ان 95 الف كثير عليها بس مقارنة بباقي اسعار العربيات فلسة بتعتبر سعرها كويس و ابعد تماما عن الافيو عربية كلها مشاكل و ادخل خد لفة في قسم شيفروليه و شوف الماسي اللي ملاكها بيشتكوا منها خصوصا انها مش رخيصة ... دي اغلى من اللوجان الاوتو ب98000 يعني اغلى من اللوجان ب3000 جنيه و مفيهاش نص الاوبشنز ولا الامان اللي في اللوجان