ممكن افهم ليه اشتراك النادي بيوصل ل 100 الف و150 الف

**qkash.com** · 29-09-2013 10:08 PM

انا مستغرب جداً لما الاقي في اسكندرية نوادي اشتراكها مايقرب من 100 الف وكذا في القاهرة وقد تزيد لتصل الي 150 الف جنيه
ليه يعني هما هيطلعوا ابني بيكام!!!!!؟؟؟؟؟؟

ايه الفرق بين انشطة النوادي المبالغ في اشتراكتها دي واي نادي تاني اشتراكه 10 الاف ولا 20 الف مثلاً.

هو الناس بيكون هدفها نادي اجتماعي يتجمع فيه الاطفال واسرهم ويمارسوا انشطة سباحة او تنس أو كرة قدم أو اي نشاط رياضي واللي بيكون متاح في كل النوادي

يبقي ايه الفرق بقي؟

**Anaslbda** · 29-09-2013 10:57 PM

الهدف هو قصر النوادي دي على طبقة معيّنة, الـ upper class.
في القاهرة نوادي زي الصيد والجزيرة الحصول على عضوية فيهم صعبة أصلاً حتى لو عندك استعداد لدفع المبلغ,
يعني في الصيد مثلاً مؤخرّاً لغوا نظام التقسيط, ومبلغ الـ 180 ألف لازم على دفعة واحدة.
نادي الجزيرة لازم يبقى عندك recommendation أو توصية من عضو عامل موجود في النادي بقاله مدّة معيّنة.
وباب الإشتراك بيفتح شهرين بس في السنة, وبيبقى فيه انترفيوز وتقييم للوضع الإجتماعي بتاع العيله
قول عليها طبقية أو عنصرية لكن محدّش يقدر يلومهم.
مصر مبقاش فيها مكان نضيف يتقعد فيه فعلاً. البلد بتوسخّ سنة بعد سنة.

**samyyousef** · 29-09-2013 11:05 PM

سبب غلو الاشتراك هو تكدس تلك النوادي مع زيادة طلب العضوية فيجب الحد منها حتى يستطيع النادي ان يلبي احتياجات الاعضاء
فالمشكلة ليست في سبب ارتفاع مبلغ الاشتراك..لكن المشكلة ان بعض هؤلاء الاعضاء ينسى او يتناسى انه اشترك ب500 جنيه

**أبو آسر** · 29-09-2013 11:09 PM

طب يا جماعة أنا عايز أفهم إيه الفرق بين واحد عامل عضوية في نادي الشمس مثلا وواحد بيدخل نفس النادي بتذكرة ب20 جنيه زي حالاتي !
يعني أنا بدخل النادي بتذكرة وبلفه حتة حتة وبخلي الأولاد يلعبوا وبقعد أتغدى وأقضي يوم ظريف وبخرج إيه المميزات بأه بتاعة العضو اللي دافع اشتراك عني ؟؟

**أبو آسر** · 29-09-2013 11:41 PM

المشاركة الأصلية كتبت بواسطة ehab

انا عضو في الاهلي تقريبا من 96 او 97 و يمكن قبل كدا معرفش الوالد عمل العضوية امتي
الفرق الوحيد في الاهلي الي ناقص هو نزول حمامات السباحة ممنوع تماما و دخول الملاعب في بعض الاحيان

بس نادي الشمس معتقدش ان اللي عايز ينزل البيسين حد بيقوله معاك عضوية ولا لأ ! أنا بروح أقعد على البيسين وأطلب طلبات ولو حد من العيال عايز ينزل محدش هيقوله انت بتعمل ايه
يبقى كده أروح أدفعلي 100 ألف جنيه عضوية ولا أشتري تذكرة ب20 جنيه يعني لو كل أسبوع مرة 20 جنيه * 4 مرات * 2 فرد = 160 جنيه ؟!!

**فبريكا** · 29-09-2013 11:48 PM

اعتقد لاسباب كتيرة
1- مرتبات وزيادة عدد الموظفين.
2- اعمال الصيانة والانارة وتوفير الاجهزة في كل قسم والعاب الاطفال و شراء مستلزمات النادي من اثاث.
3- تقليص عدد الاعضاء والارتقاء بهم يعنى مش منظر دكتور مع عيلتوا يقعد مع ميكانيكي مثلا ولا يشترك شوية عيال صيع الواحد يبقى خايف على اسرتوا منهم .
4- اشتراك النادي في بطولات وتنظيم بطولات.

**qkash.com** · 29-09-2013 11:53 PM

برده ماوصلتش لفكرة لية ادفع 150 الف جنيه او اكثر...هستفيد ايه...هستفيد ايه من اني اشوف ناس من ال upper class دول او اتكلم معاهم او حتي اهزر معاهم...

ليه الناس بتتهافت علي الاشتراك في النوادي دي هل فعلاً بيعملوا علاقات اجتماعية مع ناس ذو شأن او ذوات مناصب او رجال اعمال علشان يعملوا معاهم مصالح وكدة

وهل فعلاً النادي بيقدم خدمات تستاهل كل المبالغ دي....وبينمي قدرات ابنائي وابناء غيري؟؟؟

**qkash.com** · 29-09-2013 11:59 PM

المشاركة الأصلية كتبت بواسطة فبريكا

اعتقد لاسباب كتيرة
1- مرتبات وزيادة عدد الموظفين.
2- اعمال الصيانة والانارة وتوفير الاجهزة في كل قسم والعاب الاطفال و شراء مستلزمات النادي من اثاث.
3- تقليص عدد الاعضاء والارتقاء بهم يعنى مش منظر دكتور مع عيلتوا يقعد مع ميكانيكي مثلا ولا يشترك شوية عيال صيع الواحد يبقى خايف على اسرتوا منهم .
4- اشتراك النادي في بطولات وتنظيم بطولات.

وهو انا مشترك في النادي علشان ادفع مرتبات للموظفين وبس؟؟؟؟....ومهما كانت مرتباتهم عالية مش هتتقارن بالاشتراك المبالغ فيه

وممكن في نادي محترم ويكون اشتراكه اقل بكتير نقول مثلاً 20 الف ويكون العدد محدود برده ومش كل من هب ودب هيشترك يعني ممكن يكون فيه برده مجموعة شروط واختيار الاعضاء علي اساس معين

ويكون برده النادي بينظم بطولات.

ليه بقي اروح ل ابو 150 الف في حين اني هلاقي كل حاجة بالمثل في ابو 20 الف