أوبلاوى جديد

**أيمن كور** · 30-09-2013 02:04 AM

السلام عليكم
ان شاء الله بكرة رايح علشان أخلص فى أسترا 2008 انجوى ... ربنا يكرمنا فيها و أنضم لعائلة أوبل المحترمة ... و إعتذارى لعائلة رينو العزيزة ( بس انا تعبت و مالقيتش حالة كويسة )
المهم كام سؤال على الماشى لأنى لا أفقه شئ فى الاوبل نهائيا ..

1- إيه رأيكم فى الموديل ده
2 - أفضل مركز صيانة معتمد و أفضل صنايعية و محلات لقطع الغيار ( مايكونوش نصابين أوى هههههه) انا من الاسكندرية
3- ايه هية الحاجات اللى اخد بالى منها فى العربية (هية عاملة 98000 كم )
4- مواعيد و تكلفة الصيانات القريبة علشان مش متوفرة على الموقع زى رينو مصر
5- الاكصدام الامامى كليبساته مفكوكة و الشبكة اللى تحت واقعة و كنت عايز أظبطه يتكلف كام و عند مين ؟
6- المراية الشمال الغطاء بتاعها مش موجود بس شغالة الاقيه فين و بكام و لا اعمل ايه .
7- الفانوش الخلفى فى عليه زى باغة زجاج او بلاستيك غطاء شفاف كده ده مكسور بس الفانوس سليم أغيره فين و بكام .
8- أخيرا أنا هاكشف على العربية عند مركز الزرانى اللى فى سيدى بشر .. علشان اتصلت بالتوكيل قاللى الكشف فى العامرية فقط و لازم تحجز قبلها بيومين و الكشف بياخد اليوم كله تقريبا ايه رأيكم و أركز على ايه بالظبط ( زى ماقولتلكم انا فى الاوبل أبيض )
بصراحة كمان أسلوب الراجل اللى كلمنى من خدمة العملاء قلقنى ... مش أسلوب خدمة عملاء أسلوب ورشة ( مع احترامى للصنايعية ) بس ده اسلوب و ده اسلوب !!!!
و لو فيه أى نصيحة أخرى طبعا مش هاقول لأ ...هههههههه

شكرا ليكم و ربنا يعدى التجربة دى على خير علشان قلقان من العربية .. مش علشان و حشة علشان ممكن اتخدع بسبب جهلى فيها بسهولة

أخيرا ممكن حد من الاسكندرية يكون "دعم فنى" بالنسبة لى بمعنى إنى أكلمه لو فى حاجة مش فاهمها ( و الله ما هاصدعه ) هههههههه

**pilotahmed1** · 30-09-2013 11:28 AM

اول شي شيك على الكمبيوتر الرئيسي عند واحد يفهم ثانيا صيانه لكل من:
البواجي تبديل
قواعد الجير بوكس وقواعد المحرك العلوي والسفلي
زيت الجير بوكس
فلتر البنزين والهوى
البريكات
اذا كانت هاتش باك ما تستاهل خذ فكترا 2005 وطالع

**egyption2012** · 30-09-2013 04:49 PM

اهم من الحاجات الظاهرة .. كشف الكمبيوتر

**Mohamed Fahmy** · 30-09-2013 09:52 PM

فعلاً أهم حاجة كشف الكمبيوتر .. و الباقى ده سهل جداً .. الفوانيس و المرايات و غطاء المرايا الخارجى كله كله موجود و متوفر كمان .. ربنا يوفقك و تشرفنا فى جروب الأوبل

**أيمن كور** · 01-10-2013 03:12 AM

أولا شكر واجب لكل الردود السريعة و للأخوة أعضاء جروب أوبل
ملخص ماحدث اليوم ...
كشفنا عليها فى مركز معتمد و النتيجة ..
- حالة العربية فابريكا برة و جوة
- مافيش ريحة الرش
- العفشة 10/10 و الكاوتش ماكنش عاجبنى بس الراجل قاللى ممكن يقعد كمان شوية و حالته مش وحشة للدرجة
- الفرش بتاع العربية فابريقة و مش متهان و حالته ممتازة
- الموتور زى الفل مافيهوش حاجة و تمام
- حساسات و فلاتر و كل اللى بيتكشف عليه كمبيوتر تمام و مافيهوش حاجة و 10/10

نيجى بقى للعيوب ...
- أكصدامين محتاجين يتظبطوا علشان فيهم خبطات و الامامى مفكوك من عند الرفرف
- فانوسين خلفى محتاجين يتغيروا بس شغالين
- خبطة فى العتبة بس مش مؤثرة

هاتقوللى طيب مبروك أقولك نيجى للطعنة اللى فى القلب
الفتيس ....
أول ما كشف عليه طلع فيه أربع أكواد لعيوب بس مش عارف لحد دلوقتى ايه هية
عاد الكشف عليه مرتين تانى الجهاز ما قرأش العيوب و طلع سليم .. قلقت من الموضوع
الراجل من نفسه نادى على واحد و خلاه يسوق العربية برة و يجرب الفتيس
الراجل رجع قاله الفتيس مش مظبوط و فيه رعشة أو رجة كده مش تمام الفتيس فيه عيب
ايه هوة مش عارفين قالنا الفتيس ما يتصلحش الا فى التوكيل و ده اكبر عيوب السيارة دى

صاحب العربية اتصدم و هو شاب محترم اوى .. المهم حلفلى انه مشيك على العربية من شهرين بس فى التوكيل و من ساعتها ماحدش ركب العربية لأنه كان مسافر

و صمم انه يروح التوكيل و يعمل كشف بنفسه و على حسابه علشان هوة متأكد من عربيته

إيه رأيكم ؟
و ايه اللى يخلى الفتيس يبقى فيه الرعشة دى ؟

و بصفة عامة ايه رأيكم فى العربية لأنى مافهمش فى الاوبل خالص ؟
و شكرا