موقع ....... cars لتقسيط السيارات

**abo sandy** · 30-09-2013 11:36 AM

السلام عليكم

مين يا جماعة اتعامل مع موقع كونتاكت كارز لتقسيط السيارات
يقولنا ايه نظامه والتعامل فى بيبقى ازاى ... والموقع ده له مكان على الطبيعة ولا موقع بس ولو حبيبت اتواصل معاهم يبقى ازاى .
وهما الى بيخلصولك كل حاجة وانت بتدفع المقدم وتستلم على طول وتبعت القسط كل شهر وخلاص ولا ايه

نسمع بقا من الناس الى اتعاملت مع الموقع ده ايه نظامه

**abo sandy** · 30-09-2013 11:41 AM

يا ريت يا جماعة اى حد من المشرفين المحترمين يشوف الموضوع يعدل بس اسم الموضوع لانه كده مش واضح للناس ... يخليه حتى عربى لان مش عارف كلمة كونتاكت مش ظاهرة ليه .

**Ahmed_2013** · 30-09-2013 01:03 PM

مكانهم علي الطريق الصحراوي إتجاه القادم من الإسكندرية بس قبل البوابات أمام بنزنية شل لو قصدك علي إجراءات شراء السيارة المستعملة فبلغني علشان أنا عارف الأجراءات علشان أنا واحد صاحبي إشتري سيارة مستعملة بالتقسيط عن طريقهم أم إجراءات سيارة جديدة فأنا معرفش إيه الأجراءات بتاعة سيارة جديدة

**hdabawy** · 30-09-2013 01:16 PM

خد يا باشا اللينك ده انا كنت مشارك بيه قبل كدة
http://www.nilemotors.net/Nile/377918-301.html

**محمد بلال** · 30-09-2013 02:08 PM

استاذ احمد 2013
ممكن تشرح لنا اجراءات تقسيط المستعمل ولكم جزيل الشكر

**mody112** · 30-09-2013 02:24 PM

المشاركة الأصلية كتبت بواسطة محمد بلال

استاذ احمد 2013
ممكن تشرح لنا اجراءات تقسيط المستعمل ولكم جزيل الشكر

**abo sandy** · 30-09-2013 03:38 PM

المشاركة الأصلية كتبت بواسطة ahmed_2013

مكانهم علي الطريق الصحراوي إتجاه القادم من الإسكندرية بس قبل البوابات أمام بنزنية شل لو قصدك علي إجراءات شراء السيارة المستعملة فبلغني علشان أنا عارف الأجراءات علشان أنا واحد صاحبي إشتري سيارة مستعملة بالتقسيط عن طريقهم أم إجراءات سيارة جديدة فأنا معرفش إيه الأجراءات بتاعة سيارة جديدة

انا عايز اشترى جديدة بس يا ريت حضرتك تقولى على اجراءات المستعمل
جايز اجيب مستعمل والغى حوار الجديد لو هتفرق كتير فى الفلوس

**Ahmed_2013** · 01-10-2013 11:11 AM

تقسيط المستعمل بيبدأ أنك تختار العربية الأول وتتفق مع صاحب السيارة علي السعر ( هم عندهم عربيات مستعملة لما كان صاحبي بيشتري العربية بتاعته بس كانت غالية قوية بس حالتها نضيفة جداً) وبعدين بتورح معاه الشركة علي الطريق الصحراوي ويتم معاينة السيارة ( وممكن يتطلب فحصها في مركز خدمة أو بنزينة وإحضار التقرير) وبعد كده يبلغوك في الشركة أن السعر اللي اتفقت عليه مع صاحب السيارة مناسب أو لا ويتم إمضاء الورق الخاص بالسيارة في الشركة ويتم فتح حساب ليك في بنك تبع الشركة علشان تعمل إيداع كل شهر بمبلغ القسط وتروح تسجل في الشهر العقاري وتاني يوم ترخص بس بيكون معاك جواب من الشركة علشان بيتعملها حظر بيع لصالح الشركة ولما بتجبلهم الرخصة ويأخدوا صورة منها يتم إصدار شيك لصالح صاحب السيارة.
نصيحة : وأنت بتتفق مع صاحب السيارة علي السعر يفضل تبلغه بالأجراءات علشان انا شوفت ناس لما تعرف الأجراءات في الشركة بتعمل مشكلة في الشركة بعد ما يكونوا اتفقوا علي كل حاجة
بس احسن حاجة في النظام ده ان صاحب السيارة ميستلمشي الشيك إلا لما السيارة تتنقل بإسمك فده بيأمنك قوي من أكبر مشكلة في المستعمل أن السيارة ممكن تكون مسروقة.