الموضوع: لوجان ولا ميجان

المشاركة الأصلية كتبت بواسطة semsem85

هي الفكرة مش معايا التسعين 90 كلهم لكن لو اللوجان كانت تستاهل كنت اتصرفت عشان اجيب زيرو واريح دماغي من قطع الغيار والصيانات لمدة 4 5 سنين لكن اللي معايا في حدود 70 بكتير 75 فكده مفيش غير الميجان وان كان بقارنها بحاجات كتير زي الستريون c4 و المازدا 3 والكيا سيراتو 2006 لحد 2009 والبيجو 307 محتار اي عربية احسن في كل حاجه وان كنت شوفت الميجان وجربتها بنفسي عجباني بس قلقان منها دعواتكم

ميجان 2007-2010 او سيراتو 2006-2009
ال307 على ما باسمع مشاكلها كتير جدا خصوصا فتيسها
المازدا3 حلوة بس ضيقة و مش فخمة و قطع غيارها اغلى حبة محترمين من الميجان و السيراتو
السي4 مش عارف عنها حاجة بصراحة

المشاركة الأصلية كتبت بواسطة semsem85

استاذ تامر طيب لو بنقارن بين الميجان و السيراتو بما انك راكب ميجان شايف ايهما احسن في الركوبة وقطع الغيار والاعطال والصيانات

هممم , هي الميجان معايا انا و واحد زميلي في الشغل و مبسوطين منها اوي و السيراتو دي مع اتنين زمايلي في الشغل (مبسوطين منها اوي) و مع واحد كان مديري كمان , و في رأيي الميجان كعربية و ركوبة افضل , بس برده كل واحد له احتياجاته
عناصر التفوق الواضحة للسيراتو دي على الميجان : التسارع الجميل جدا في السيراتو و على قده في الميجان , و النعومة اللي افضل شوية في السيراتو , و التكييف الكوري طبعا و اعادة البيع
و عناصر التفوق الواضحة للميجان على السيراتو دي هما الشكل و الفخامة و الكماليات و الاتساع الداخلي بفروق كبيرة في كل واحدة

العفشة الاتنين كويسين و مش عارف انهي فيهم احسن
الثبات الميجان كويسة , و السيراتو دي مش عارف
الفرامل الميجان كويسة و السيراتو دي مش عارف و اظنها كويسة
الاتنين الفتيس ستيبترونيك 4 نقلات
باور الميجان كهربا , باور السيراتو دي زيت , احسن كتير في الميجان
قطع الغيار , الميجان موجودة في التوكيل و غالية (عاملة زي السيراتو الشكل اللي بعد ده , و كذلك في اسعار الصيانات) , و موجودة استيراد كتير , لكن في القاهرة و اسكندرية بس
السيراتو مش عارف برة ايه النظام, زمايلي شغالين توكيل , و في التوكيل على ما باسمع فهي اقل شوية من الميجان بس اللي اعرفه انها مش اقل بكتير
الاعطال مش عارف ايهما اقل , بس اظن السيراتو بحكم ان تكنولوجيتها ابسط

انا اتحطيت في المقارنة دي لما كنت باشتري , و لقيت ان الميجان اعلى كعربية و ركوبة فميلت ناحية الميجان
كانت الكماليات و الفخامة و متعة القيادة فارقة معايا كتير , و التسارع مش اوي يعني
فاخترت الميجان , الميجان كفخامة و متعة قيادة و كماليات تتقارن راس براس مع عربيات بتنزل زيرو النهارده , سواء الفلوينس قبل الفيس ليفت او السيراتو الشكل قبل الحالي و الالنترا الشكل الحالي (عدا التساااااااااارع)

اما عن السيراتو دي فرغم ان انتشارها قليل الا انها ماسكة سعر , و يكفيها ان الراجل اللي كان مديري لما جه يجيب عربية لزوجته اشترى لها نيسان صني زيرو (الشكل قبل الحالي اللي الناس بتحبه) , و اتشل منها جدا جدا بالمقارنة بالسيراتو دي