الموضوع: قولت اغسل الدورة في البنزينة فحرقلي سويتش المراوح

سويتش المروحة اللي الصنايعية بيقولوا عليه الترموستات اللي هو بيشغل المروحة عند درجة حرارة معينة سرعة اولى وعند درجة تانية سرعة تانية

الحكاية اني روحت النهاردة بنزين موبيل FGI اللي في الأوتوستراد ناحية المطار واشتريت Reditor Flush بتاع gunk و اشتريت مية اوبل بـ 80 جنيه الجركن !!
وروحت للراجل وقولتله عايز اغسل
أول حاجة لاقيت مكتوب على منظف الريداتير ، ماتحطش السائل والريداتير سخن ، فقولت للباشا قالي لأ عادي فقلقت منه أكتر
قولتله عايز افك ترموستات الكوعة عشان نطلع المية كلها وتخرج بالصدا بتاعها من غير مشاكل
قالي الترموستات بتشتغل والعربية ماشية بس لكن لما بتكون واقفة ودايرة بيبقى مش شغال !! فقولت انا خلاص وقعت ولا حدش سمى عليا
قولتله ممكن تغسلي قربة المية بالمرة قالي ماشي

فك خرطوم الريداتير وشبكه في خرطوم بمزود بمصدر مية
والخرطوم اللي خارج من الكوعة بتاعة الموتور شبكه في خرطوم ودلدله على الأرض
وفك غطا القربة وابتدى يضخ المية ، فلاقيت المية بتخرج من القربة جامد ، فقولتله ايه ده اقفل الغطا ، قام قالي مانا سايبه مفتوح عشان بغسلك القربة ( يا حلاوة انا اللي جبته لنفسي )

فك الخراطيم وحط منفاخ هواء في القربة عشان يخرج المية اللي لسا فاضلة في الريداتير
فضلت المية تخرج من كوعة الريداتير ، وساعتها قلبي انقبض وقولت في نفسي كدا ممكن السويتش يتحرق
حط المية اللي معايا وقالي اشتري جركن تاني 4 لتر عشان ديه مش هاتكفي
روحت اشتريت واحد تاني ، قالي خليه معاك ولما توصل البيت ابقى زود بتاع لتر ونص
مشيت من عنده والعربية فايقة اوي !
يا سلام يا جدعان هو غسيل الدورة بيفوق العربية كدا ! والحرارة ثابتة على 85 ، قولت فل
دقائق صغيرة جدا وعينيا على امبير الحرارة ولسا ثابت على 85 !! ابتديت اقلق ، ماهو مش معقولة مية موبيل هي السر
روحت طافي الكاسيت ومركز ودني وسمعت صوت المروحة شغالة فوووووون
ركنت على اليمين وفتحت الكابوت والاقي المروحة شغالة على السرعة التانية ، ياسيدي ياسيدي
روحت البيت وبطلت وقولت اسيبها لما تبرد شوية واشوف ايه الحكاية
من حوالي ساعتين كدا بدور لاقيت المروحة اشتغلت عالطول على السرعة التانية والريداتير بارد أصلا ! حتى الهواء اللي طالع من المروحة ساقع
روحت عالطول على الكهربائي وقولتله الوضع
فك فيشة الترموستات قالي اتحرقت ، اطلع بقى على دمشق ولسا بيكمل لاقاني مطلعله سويتش(ترموستات) غيره
قالي طاب دا كدا هانحتاج مية قولتله المية معايا ، قالي دا انت جاهز ، قولتله ومعايا تيفلون كمان :)

ملحوظة:
وهو بيجرب في الأول عشان يعرف سبب تشغيل المروحة على السرعة التانية أول اما ادور العربية كان فك قطاش البطارية السالب ، وده خلى المروحة عايزة تتبرمج
لأنه بعد اما ركب السويتش الأصفر الاحتياطي اللي كان معايا ، لاقينا لسا المروحة بتشتغل مع الكونتاكت ، فدخل العربية وبرمج المروحة وخلاص على كدا

السؤال:
الاقي فين سويتش المراوح الأصلي ويكون GM

نزلت متسخة وبلاش اقول وسخة عشان كلمة عيب ، بس مش للدرجة اللي انتوا متخيلنها لأني كنت غاسلها قبل كدا كذا مرة بس مش بمكنة الشفط والضخ
كنت عاملها بطريقة فادي عشان سهلة ومتاحة لأي واحد من غير الاحتياج الى مكن أو خراطيم معدلة
وهي اني بفك خرطوم الراجع من الريداتير وافضل ازود مية من القربة وادوس بنزين متفاوت لغاية اما المية احسن انها نضفت
و أكرر الموضوع مرتين تلاتة وفي الاخر احط مية تكييف مع كانز إبرو يا إما مية خضرا مع كانز ابرو

بصوا أصلي باردوا لازلت مقتنع بطريقة التنظيف لأن ترموستات الكوعة كانت راكبة وديه بتفتح جزء بسيطة وممكن ماتخرجش المية المتسخة والمليانة صدا بالشكل المطلوب