الموضوع: سيارتى سرقت اليوم

سبحان الله يعني حتي في الحذر اللي احنا فيه العربيات بتتسرق!!!
عموما فداك ال ٣٠ الف جنيه و ربنا يعوض عليك و الف مبروك رجوع العربيه ... حاول بقي تامنها كويس و ربنا يسترها معاك و معانا

حمد لله على سلامه العربيه و ان شاء الله ترجع احسن من الاول و قدر الله و ماشاء فعل و حسبى الله و نعم الوكيل فيهم

المشاركة الأصلية كتبت بواسطة aoa

أنا متشكر جدا يا جماعه لكل اللى رد ولو بكلمه

وبعتذر انى معرفتش ارد هنا اليومين اللى فاتوا علشان فتره العيد
كل سنة وحضراتكم طيبين

هاحكيلكم تفاصيل سرقة العربيه ممكن تفيد حد يحصله حاجة مقاربه لاقدر الله

اليوم اللى اتسرقت فيه العربية هو اليوم الوحيد اللى ركنتها فيه بره جراج كنت مأجر فيه
كان يوم الخميس بالليل وكنت راجع متأخر فا ركنتها تحت العماره اللى انا ساكن فيها
كانت واقفه على الشارع الرئيسى وجمبها ب كام متر شارع رئيسى تانى واخر مرة شفتها اليوم دة وقت الفجر
وبعدها دخلت انام وصحيت علشان اصلى صلاه الجمعه
فا فوجئت انها مش موجودة فا قلت جايز اكون ركنتها فى مكان تانى ومش واخد بالى
لغايه لما استوعبت فكرة انها اتسرقت
فا رحت اشوف المكان اللى كنت موقفها فيه
لقيت مكانها كسر زجاج
ولقيت عربيه لانوس مكسرين زجاجها برضه بس تقريبا كان فاصل طرمبة البنزين او حاجة لأنهم كسروا الزجاج فقط ومأخدوهاش

بعدها رحت القسم ععملت محضر
اخدوا منى التفاصيل وبعدها رحت لمأمور القسم وقاللى لو طلبوا فلوس ادفعها لأن اخويا اتسرقت عربيته ودفع فلوس واخدها
وقاللى اننا ممكن نطلع معاك حد بس فى حدود المنصورة فقط

المهم فىى نفس اليوم اتصل بيا رقم وقاللى بالحرف انت عربيتك كذا كذا اللى هى اوصافها يعنى
قالى انه شاريها ب 30 وبيبيعها ب 35
وقاللى انه جايله فيها 50 وهايقطعوها
المهم فضلنا نطول معاه فى الكلام لغايه ماوصلنا لقتره اسبوع علشان نقدر نعمل حاجة
كان سايب موبايله مفتوح ال 24 ساعه
رحت اعمل تتبع .. كان ناقص امضاء المحامى العام فى المنصورة فضل 4 ايام عامل لمبه حمراء على مكتبه ومش عايز يمضى
لغايه لما ناس اتوسطولى ومضى الورقه
بعدها اوفوجئ فى القسم لما رحت قالولى امر التتبع هاييجى بعد 21 يوم
او تروح انت وتطلعه بكره
المهم اللى خلانى مارحتش
ان واحد من اللى فى القسم من الامناء
قاللى لو دى العصابه اللى فى المحله فا احنا بنخاف نتواجه معاهم احسن يضربونا
فا لما قاللى الجمله دى انا فقدت اصلا الامل فى الشرطة بأى اتجاه وقررت اتفاوض مع الحرامى
فا وصل المبلغ ل 30 الف
المهم اتفق على مكان فى الاول
وفضل يلففنا بالعربيه الاجرة اكتر من 3 ساعات جوه كذا مكان تانيين علشان يتأكد ان محدش ورانا

وفى النهايه طلب نرميله الفلوس فى الشارع
وبعدها اتصل وقال 10 دقائق اعد الفلوس واقولكوا مكان العربيه
وفعلا اتصل وقال مكانها
وكانت العربيه دايرة وجواها مفتاح عاملينهولها

الطريقه اللى اتسرقت بيها :
كسروا الزجاج اللى جمب السائق
كسروا علبه الدريكسيون الفييبر
وقطعوا سلك السنتر
وبعدين فتحوا الكبوت فصلوا السلك بتاع الانذار
وبعدها عملوا سلكين من الكونتاك ودارت العربيه
واول اما اتحركوا شالوا اى علامه مميزه على العربيه سواء لو كلمه او استيكر
ومن كتر استعجالهم كانوا بيشيلوها بمفك او اداه حاده لأن اماكنها عندى خربشه باله حاده
ولما راحوا بقى المكان اللى بيحطوا فيه العربيه
خلعوا الكونتاكت وعملوله مفتاح

ملحوظه
اننا واحنا راجعين فتنا على 3 كماين ومحدش اتكلم

بس خير الحمد لله ربنا يبعد عنكم كل دة

اللى انا هاعمله الوقت الحالى :
هاركب امبوليزر ومفتاح مشفر ,, ودى هاتتعمل ب 3000 جنيه ولقيت اللى هايعملها بعد لف طبعا لأن مش اى حد يقدر يعمل الحوار دة
او
هاركب جى بى اس تتبع ومعاه فصل الباور والعربيه وسماع صوت اللى جوه العربيه ودة ب 600 جنيه
أو
هابيع العربية واريح دماغى

الحمد لله إن العربية رجعتلك ......
و ربنا يعدي الأيام دي على خير