الموضوع: قصة حقيقية من فيلم هندى عن سرقة سيارة النترا2013

قصة حقيقية من فيلم هندى عن سرقة سيارة النترا 2013

الحكاية بدأت شهر اكتوبر 2012 لما اشتريت سيارة هيونداى النترا موديل 2013 تانى فئة اتوماتيك فتحة سقف ومرايات ضم ، وكان سعرها 137الف جم.
وعلشان كنت شاريها بالتقسيط ، كان لازم أئمن عليها، وفى فبراير 2013 اتسرقت العربية من قدام البيت وكنت ما عملتش بيها الا 900كم.
وطبعاً عملت محضر فى نفس اليوم، وبلغت شركة التامين ، والشركة المقسط معاها، ومن هنا بدأت رحلة العذاب.

أولاً/ شركة التامين:
قالت التامين ما بيغطيش فى حالة السرقة الا 75% من قيمة السيارة ودة بعد زيادة سرقة السيارات فى الفترة الاخيرة ولو كنت عاوز تغطى 100% كنت قولت من الاول وطبعاً هتزيد قيمة قسط الوثيقة (طبعاً محدش فهمنى كدة فى الاول).
كمان التعويض مبيتصرفش الا بعد 6 أشهر من التبلغ عن السرقة وبعد 3 جوابات صادرة من مدرية الامن التابع لها مكان السرقة تفيد عدم العثور على السيارة.
ثانياً/ الشركة المقسط العربية معها:
قالت مقدرش اوقف القسط الا لما شركة التامين تصرف التعويض وأعمل تسوية للمبلغ الباقى عليك، واشوف هيبقالك فلوس ولا هيكون عليك.
والنتيجة، فضلت ادفع القسط (والعربية مسروقة) لغاية شهر أغسطس 2013 لما شركة التامين، بدأت تعمل اجراءات صرف التعويض، وطبعاً دة كان بعد شوية اجراءات طلبتها شركة التامين، غير خطابات عدم العثور على السيارة، ومنها نقل ملكية السيارة باسم شركة التامين ورفع الحظر من على الرخصة وتسجيل عقد البيع على حسابى ، وتسليم المفاتيح والرخصة ، وتعهد ومخالصة ،،،،،،،،،الخ
واخيراً حددت شركة التامين التعويض وكان 90 الف جم، وكانت الشركة المقسط معاها هتخدهم كلهم تقريباً ، واحتمال تطلب منى مبلغ زيادة، باعتبار ان الحصل عندهم اسمة سداد معجل وبيدفع علية غرامة سداد معجل.
والمفروض كان الشيك يطلع يوم ثلاثاء ، لاكن اتأخر، وهنا حدثت المفاجاة الكبرى

!!!!!!!!!!!!!!!!!!!!!!!!!!!!!!!!

مدرية أمن اسكندرية، اتصلت بي فى نفس اليوم (الثلاثاء) الظهر ، وقالت العربية المسروقة بتاعتك لقينها، وتعالى علشان تستلمها.

قلت حكمت يارب، الفلوس الحلال مابترحش

بلغت شركة التامين، قالت لى ، العربية خلاص ما بقتش بتاعتك، وموش هتعرف تستلمها ، لازم الشركة هى التستلمها،والشيك بتاعك جاهز، تعالى استلمة.

(طبعاً طمعت فى العربية)

قلتلهم خلاص نطلع انا ومحامى الشركة على الاسكندرية ونستلم العربية، وروحت لقيت العربية ممسوكة فى جناية قتل والكان راكبها متهم فى خمس جنايات قتل .
قلت ومالة، طيب اروح اشوف العربية واتاكد بنفسى انها عربيتى.

بوووووووووووووووووووووم

عربية ملهاش اى علاقة بالعربية ال انا عارفها (طبعاً هى عربيتى المسروقة)، من برة فيمة وسقف ابيض وصور السى سى، ومن جوة التبلوة والدركسيون والاوكر والفرش والزجاج الامامى مبدئياً عاوزين يتغيروا، ومفيش بطارية ومفيش استبن وكل دة طبعاً والعربية مدارتش لسة والله اعلم اة تانى.
طبعاً شركة التامين شافت العربية بالمنظر دة (التكلفة المبدئية فى حدود 30 :40 الف جم)، قالت لى خد العربية ياعم حلال عليك.
طيب ياجماعة هاخد العربية بس صلحوها.
قالوا موش هندفع ولا مليم ودى علشان العربية خلاص مبقيتش بتاعتك والتامين سقط.
قلت موش عاوز العربية، وعاوز الشيك بتاع التعويض.
بدأت الشركة فى الملاوعة ، طيب هنعرض الامر على الادارة ،
ومن هنا لهنا صرفوا شيك التعويض للشركة المقسط معاها، ومخدتش طبعاً ولا مليم من التعويض ، والحمد لله خسرت 90 الف جم فى عربية ركبتها 900كيلو.
موش قلتلكم ،، دى حكاية فليم هندى والايام عدت،، بس الحقيقة انا عجبنى النظام.