شوية مساعدة عن الفيرنا

**Hamada hozein** · 12-10-2013 08:07 PM

بسم الله الرحمن الرحيم
السلام عليكم ورحمة الله وبركاتة

يا جماعة انا ان شاء الله هجيب فيرنا بالقسط وفاضل شوية اجراءات بسيطة كدة واستلم بأذن الله خلال اسبوعين ولا حاجة
فكنت عايز استفسر عن شوية علشان لما اقابلها ابقي عارفها
انا بتصفح قسم الهيونداي صفحة صفحة وموضوع موضوع عن اي كلمة عن الفيرنا ووصلت لصفحة رقم ٣٥ :)
المهم بس كنت عايز اعرف تكلفة الترخيص هتكون كام لفيرنا ١٦٠٠ سي سي موديل ٢٠١٤
وطبعا الترخيص هيكون سنة واحدة علشان في حظر بيع
وهل هيكون في تسجيل ولا طول ما في حظر بيع مينفعش اسجل ؟
تاني حاجة
عايز اعرف حاجة عن موضوع التليين في الاول دة
انا اللي اعرفة انة الف كيلو الاولي
الار بي ام اقل من ٣
السرعة لا تزيد عن ١٠٠
بس في ناس بتقول ممنوع تشغيل التكييف وكمان ممنوع ضغط الفرامل بشدة
هل الكلام دة صحيح
معليش انا اسف عارف اني صدعتكوا
واي اسئلة عن السعر او اجراءات بنك ناصر او توكيل غبور فرع هيليوبلس انا جاهز
وشكرااااااا

**MOTOR HEAD** · 12-10-2013 08:50 PM

هو فعلا مش مستحب تشغل التكيف
او تدوس فرامل جامد لحد ما الفرامل تطبع

و ياريت تبقى تقولنا ايه اخبار التقفيل عشان بيقولوا تقفيل الفيرنا بقى وحش
و الف مبروك

**ahmedangel55** · 12-10-2013 09:12 PM

مبروووووووووووك يا باشا انا كنت هشترى فيرنا برضو بالتقسيط اليويمين دول بس هاجلها شوية بس قريب ان شاء الله هشتريها بس الى اعرفة عن التلين انك متعديش ال 80 ويا ريت تقول التقفيل اخبارة اية؟ العزل كويس ؟ صوت الماتور عالى ولا اية ؟ واخر حاجة انا لما سالت عن الاوراق فى المصرية و غبور الاتنين قالولى بالبطاقة بس ! وانت بتقول اجرائات ! فكنت عاوز اعرف اية الاجرائات دى وجبتها منين ؟

**shaaban2008** · 13-10-2013 04:40 AM

ترخيص اول سنة في حدود 750 جنيه شامل الطفايه

**Hamada hozein** · 13-10-2013 04:41 AM

المشاركة الأصلية كتبت بواسطة motor head

هو فعلا مش مستحب تشغل التكيف
او تدوس فرامل جامد لحد ما الفرامل تطبع

و ياريت تبقى تقولنا ايه اخبار التقفيل عشان بيقولوا تقفيل الفيرنا بقى وحش
و الف مبروك

الله يبارك فيك واول ما استلمها ان شاء الله هعمل موضوع عن كل كبيرة وصغيرة

**Hamada hozein** · 13-10-2013 04:49 AM

المشاركة الأصلية كتبت بواسطة ahmedangel55

مبروووووووووووك يا باشا انا كنت هشترى فيرنا برضو بالتقسيط اليويمين دول بس هاجلها شوية بس قريب ان شاء الله هشتريها بس الى اعرفة عن التلين انك متعديش ال 80 ويا ريت تقول التقفيل اخبارة اية؟ العزل كويس ؟ صوت الماتور عالى ولا اية ؟ واخر حاجة انا لما سالت عن الاوراق فى المصرية و غبور الاتنين قالولى بالبطاقة بس ! وانت بتقول اجرائات ! فكنت عاوز اعرف اية الاجرائات دى وجبتها منين ؟

ياراجل بطاقة اية
دي حوارات ملهاش اول من اخر
بس يمكن انت عايز تقسط مع المعرض او التوكيل مباشر
انما انا بقسط مع بنك ناصر
بيطلبوا في الاول مفردات مرتبك انت والضامن
وبعد كدة يديك ورقة تحويل مرتبك من الوزارة او الشركة اللي انت بتشتغل فيها والضامن كمان بس الضامن بيتحول في حالة امتناعي عن السداد
ووصولات كهرباء واربع صور بطاقة للضامن وخمسة ليك
وبعد كدة بتمضي انت والضامن علي كمية ورق اقسم بالله من كترهم انا مقريتش حاجة
بس مضيت مش اقل من ١٥ مرة
لدرجة اني قولت للموظف هو انا لو عايز قرض ب مليون جنية هتاخدوا هدومي ولا اية
وبعد كدة بيديك ورقة اسمها تخصيص بتروح المعرض اللي اتعاملت معاه لانك في الاول خالص بتاخد من المعرض عرض سعر بالعربية
بتروح بجواب التخصيص للمعرض يحطلك رقم الشاسية ورقم الماتور
بس انا لغاية دلوقت دة اللي عملتة وهكمل بعد العيد ان شاء الله بس ادعيلي العربية متغلاش علشان لو غليت ١٠٠ جنية هعيد كل دة من تاني
بص لو هتتعامل مع معرض او توكيل مباشر احسن واسرع اعتقد بس اسالهم الفايدة كام
لو لقيتها اكتر من ٦،٥ ٪ يبقي فكك منهم واطلع علي بنك ناصر
استحمل الارف اه بس هتدفع مقدم بسيط ١٥٪ بس وكمان اقل فايدة في مصر