قطر الميري

**د.أحمد سمير** · 12-09-2008 03:00 AM

من روائع الشاعر المبدع محمد بهجت

أنا قطر الميري
دماغي تشيط
ونشيط
في الخدمة وأومباشي

فوق كتفي شريطة
وتحتي شريط
ويزيد الحمل .. لكن ماشي

ماشي على مدق .. لكن ماشي
عضمي بيندق ..لكن ماشي
ولا قولتش لأ .. لكن ماشي
ولا قولتش ...آه

فوق القضبان ماشي اتطوح
زي السكران الطرطورة
معرفش أنا جاي ولا مروح
لما بتسحبني المقطورة

صواميلي تفك .. لكن ماشي
أربطها تحك .. لكن ماشي
وانا ماشي بازك ..لكن ماشي
وكله على الله

أنا قطر الميري
دماغي تشيط
ونشيط
في الخدمة وأومباشي

اذكر المقصود بالقطار في هذه القصيدة ..
مصر
المواطن المطحون الغلبان
الزوج أبو العيال
الموظف
الشعب العربي
كل ما سبق
أخرى .. تذكر

تقبلوا خالص مودتي

**OlaOsman** · 12-09-2008 10:07 AM

راااااااااائع و لامس وجع الناس اوي.

مش عارفة ليه حاملة هم دخول الدراسة.. المواطن المطحون و الموظف البسيط (الشريف) هايبقى مطلوب منهم انهم كل يوم يعملوا حسابهم في سندوتشات للعيال.. على الأقل خالص جبن.. ده غير مصروف العيال في إيدهم وهمه رايحين المدرسة اللي صعب يقل عن 50 قرش اللي ما تجيبش غير كيس شيبسي تعبان. طبعا ناهيك عن مصاريف دخول المدارس المعروفة، بس معرفش انا ليه مركزة اكتر مع المصاريف اليومية و الأعباء الإضافية بتاعة شهور الدراسة.

زمان كنا بنقول تعليم مجاني و تعليم بفلوس.. دلوقتي بنحمل هم اللقمة اللي العيال هايكلوها في المدرسة لحد ما يرجعوا البيت عشان مايقعدوش على لحم بطنهم من الصبح للعصر

**Casio2000** · 12-09-2008 03:38 PM

المشاركة الأصلية كتبت بواسطة OlaOsman

.. دلوقتي بنحمل هم اللقمة اللي العيال هايكلوها في المدرسة لحد ما يرجعوا البيت عشان مايقعدوش على لحم بطنهم من الصبح للعصر

و مطلوب نبدع و نركز في الشغل و البحث العلمي و التطوير

طب ازاي ؟

الاحتياجات الاساسية جدا هي الشغل الشاغل لأغلب المصريين

فقروها ليحكموها

و شكرا جدا ل د أحمد على مشاركتنا بالشعر الجميل دا

**OlaOsman** · 12-09-2008 06:07 PM

المشاركة الأصلية كتبت بواسطة Casio2000

و مطلوب نبدع و نركز في الشغل و البحث العلمي و التطوير

طب ازاي ؟

الاحتياجات الاساسية جدا هي الشغل الشاغل لأغلب المصريين

فقروها ليحكموها

و شكرا جدا ل د أحمد على مشاركتنا بالشعر الجميل دا

هو ده بالظبط اللي جه في بالي أيام ما كنت انا اللي باكتب كل الإيميلات الخاصة بزدني بيعلنوا فيها عن الدورات التدريبية و اي حاجة يحبوا يعلنوا عنها.. كانوا يدوني المعلومات المطلوب مني أقولها في الإيميل أقوم انا حاطاها في قالب إعلاني جذاب و أدور على فكرة إبداعية توصل للناس بسهولة و تخليهم يحضروا. يومها كنت راجعة من زدني و جوايا حماس يهد جبال و أفكار كتيرة مبعثرة محتاجة بس ورقة و أقلم عشان ألمهم و احطهم في شكل إيميل. طبعا معروف ان زدني في ميدان رابعة العدوية.. نزلت من عندهم و عايزة أروح بسررررررررررعة عشان الأفكار ما تطيرش مني.. أيامها ما كنتش لسه جبت العربية.. فضلت مستنية ال CTA.. نص ساعة.. ماجاش.. قلت آخد ميكروباص و بعدين ابقى اركب المترو.. كله مليان.. استنيت شوية كمان عشان آخد أي حاجة للتحرير او رمسيس.. كله بييجي مليان.. بدأت أشاور لتاكسي.. كله برضه مليان أو مش راضي يروح شبرا.. وقفت على كده ساعة ونص لحد ما أعصابي تعبت.. فكرت أرجع زدني و اتصل في البيت أقول لهم انا بايتة هنا النهاردة عشان مش عارفة أجيلكوا البيت

طبعا بعد ما كنت وعدت د. محمد عمر اني هابعت له الميل الليلة دي روحت اتصلت بيه و قلت مش قادرة حتى أفكر.. مش عايزة غير إني انااااااااام و بس.. بقالي زيادة عن ساعتين بحاول أروح البيت.

عودة لما بدأت به كلامي.. طبيعي ان مافيش إبداع و لا تفكير و لا اختراعات و لا نهضة في البلد دي.. ازاي الواحد اللي فضل يحارب ساعتين عشان يوصل لمكان معين هايقدر يبتكر أو يفكر او يخترع.. الحاجات دي عايزة روقان بال و إيقاع حياة أقل جنونا زي ما كان على أيام عباس العقاد و مصطفى لطفي المنفلوطي و الرافعي و احمد شوقي.

معلش يا دكتور احمد خرجنا عن الموضوع بس هو ده برضه حالنا.

**Casio2000** · 12-09-2008 10:01 PM

المشاركة الأصلية كتبت بواسطة OlaOsman

.. طبيعي ان مافيش إبداع و لا تفكير و لا اختراعات و لا نهضة في البلد دي..

لأ هو كان فيه بس خلص

شايف توبيك جديد فتح من وحي التوبيك دا - حاكمل هناك

شكرا مرة ثانيه للدكتور احمد على الشعر دا - محمد بهجت عاجبني من ايام ماقريت "تحتمس 400 بشرطة" للكاتب احمد بهجت - كان حاططله زي اغنية لذيذة كدا في الكتاب - حادور عليها و حطها في الاجتماعي