الريموت مش بيفتح السنتر

**safwat1100** · 19-10-2013 03:15 AM

ايه يا رجالة الاوبل هو الموضوع صعب اوى كده

**ayman hamdy** · 19-10-2013 09:13 AM

كدة عندك مشكلة فى دائرة السنتر لان فتح السنتر من الباب دائرته منفصلة عن دائرة الريموت كدة مش موضوع برمجة كدة موضوع وايرينج دايجرام يعنى سلوك الدايرة فيها حاجة فاصلة على فكرة الريموت بيدى اشارة لاسلكية لكنترول السنتر علشان يقفل والكنترول ينفذ الاشارة عن طريق اسلاك الدائرة بتعاته دة الموضوع كله علشان كده لازم تروح لكهربائى اوبل كويس علشان يشيك عليها او ممكن يكون كنترول السنتر نفسه باظ

**ayman hamdy** · 19-10-2013 09:17 PM

المشاركة الأصلية كتبت بواسطة safwat1100

شكرا جدا على ردك يا استاذ ايمن انا حروح للكهربائى بأذن الله
بس انا عايز اعرف لو لا قدر الله كنترول السنتر هو اللى بايظ يا ترى بيتصلح ولا بيجى جديد و بعدين و انا عند الكهربائى ايه التجربه اللى تخلينى اعرف ان العيب منه عشان انا مبحبش اشتغالات الصنايعيه

هو بيجى استيراد ومش غالى بس انا معرفش اسعار ممكن اى حد من الزملاء يفيدنا فى اسعاره
اما بالنسبة للتجربة الاول هيكشف بالجهار ويشوف العطل فين لو مش كنترول هيعمل الاتى:
الكهربائى هيشيل الفبرة اللى امام باب الراكب الامامى والفبرة اللى تحت الباب طبعا الاول وهيلاقى الكنترول بتاع السنتر هيشيك على الاسلاك المتصلة به او لو فاهم اوى ومتخصص هيبقى معاه على الكمبيوتر برنامج اوتو داتا او برنامج تى اى اس 2000 وهيعرف من الويرينج دايجرام السلك المفصول اى واحد ولونه وهيعمله فى ثانية وفى الغالب كشف الجهاز هيبين اى دائرة فيها الخلل وهو يشيك على سلوكها بس كدة والموضوع بسيط جدا ومتقلقش على فكرة حضرتك بتتعمل مع مين فى بنها اوعى تقولى عبد الله بتاع كفر الجزار دا جزار على فكرة انا من بنها انا كمان زيك ومن حى الزهور
تحياتى

**ayman hamdy** · 21-10-2013 02:14 AM

المشاركة الأصلية كتبت بواسطة safwat1100

حبيبى خش ف حضن اخوك يا فواز

لأ الحمدلله ربنا نجانى منه انا بتعامل مع واحد ف عزبة المربع (قريبه من الموقف الجديد و من صابر الميكانيكى لو عارفه) اسمه محمد اللالى و اه معندوش كمبيوتر و تكنولوجيا بس كويس لحد دلوقتى
حينفع الكهربائى ده ف الحكاية دى ولا لازم واحد يكون عنده كمبيوتر؟؟؟
و هل اسلام قدح بتاع المفاتيح ممكن يعرف يعمل الموضوع ده عشان انا ان شاء الله حروحله اعمل مفتاح جديد و يبرمجه؟؟؟

انا كدة بقى بقيت فواز فى عندليب الدقى مااااشى هههههههههههههه
اهلا بيك يا صفوت وسط اخواتك ونورت المنتدى
اما بالنسبة للكهربائى مفيش حد فى بنها لاسف بيشتغل فى كهربة الاوبل عليك وعلى حسام اوبل فى طنطا وهيعمله لك فى ثوانى لانه فاهم ودارس كهربه الاوبل كويس وعنده التيك 2 وشغال من الكمبيوتر الللى عليه برامج الويرينج ديجرام بتاعة كل انواع الاوبل والكلام دة من الاخر وسيبك من بنها خالص
اما بالنسبة لاسلام قدح قصدق اللى فى سور الشبان المسلمين هو فعلا بيعمل مفاتيح لجميع انواع العربيات وكمان الاوبل لكن مش هيعرف موضوع السنتر دا ابدا خليك عند حسام
تحياتى اخويا فوزى

**khaled_psd** · 21-10-2013 07:32 AM

طيب ياجماعة مفيش حد يعمل الحوار ده في بورسعيد ولو مكنش ممكن تدلوني علي حد قريب من بورسعيد

لان انا عندي نفس المشكلة اوبل كورسا 2003 وشكراً

**amrosaroukh** · 21-10-2013 12:43 PM

بص يا باشا
كل الاراء من السادة الاعضاء رايحة نحية السنتر اللى في العربية بينما (حلوة بينما دي ) ممكن يكون العيب في المفتاح نفسه بمعني اصح ريموت المفتاح
انا كان عندي نفس المشكلة اول ما اشتريت العربية و رحت لواحد بتاع تصليح كاسيت صلحهولي , الموضوع بكل بساطة ممكن يكون الريموت وقع منك او اترزع على الارض منك او ولادك الخ....... فالدايرة اللى جوة حاجة حصلت فيها انا عملوا عندي هنا في بورسعيد عند واحد بتاع كاسيت او ممكن حد بتاع اليكترونيكس يزبطلك الحكاية لو كان الموضوع ريموت يبقا خير و بركة و مرحتش لحد يعك في العربية و يلعب و يجرب و نظام (try & error) لو مكنش يبقا توكل على الله في اللي قالهولك باقي الزملاء

و شكراً

عمرو الشريف

**safwat1100** · 22-10-2013 12:56 AM

لأ يا ريس المفتاح لا وقع ولا اى حاجه خالص
انا قفلت العربيه بالريموت و نزلت عملت مشوار و لما رجعت بفتح تانى بالريموت مفتحش
شكرا على اهتمامك يا استاذ عمرو