الريموت مش بيفتح السنتر

**safwat1100** · 15-10-2013 10:45 PM

اولا كل سنه و انتو طيبين ... اخبار الفته و اللحمه ايه
ثانيا المشكله :
انا عندى فيكترا بى جيت من يومين تلاته كده بفتح العربيه بالريموت كالعاده مفتحش خالص مع ان اللمبه بتاعته بتنور و السنتر لما فتحت بالمفتاح فتح عادى مفيش مشاكل
قولت اجرب ابرمج الريموت تانى عملت زى ما قريت هنا ف المنتدى حطيت المفتاح ف الكونتاك و فتحت لحد ما نور الطابلوه نور و دوست على زرار القفل 5 ثوانى و اكتر كمان مره و انا قافل الباب و مره و انا فاتح (لقيت و انا قافل معملش حاجه قولت افتح الباب و اجرب) و برضه مفيش فايده متبرمجش
يا ترى فى تجربه تانيه ممكن اعملها ولا اعمل ايه انا دلوقتى عشان بصراحه الموضوع رخم اوى مكنتش اعرف ان الريموت مسهل الحكايه اوى كده
ملحوظه: كهربة العربيه مظبوطه و السنتر شغال عادى و مفيش اى حاجه غريبه غير حكاية الريموت دى بس

**m7nsh** · 15-10-2013 11:07 PM

دا ريموت الفابريكه ولا صيني ؟؟
لو صيني فا ده حصل معايا ورحت لبتاع ابواب وسنتر طلع الوحده من قدام كرسي السواق و كانت معلقه وخلصت ف دقيقتين ..للاسف مخدتش بالي عمل ايه بالظبط عشان كنت واقف مع صنايعي تاني
لو الفابريكه روح لكهربائي اوبل افضل..وممكن يطلع الموضوع ابسط وتعمله بايدك استني راي جهابزه المنتدي

**saddam** · 15-10-2013 11:13 PM

صديقي المواطن
تغير بطارية الريموت ودايما تشتري بطارية إحتياط وتحطها.في العربية.للزمن وموضوعك بسيط ولا.تقلق وبالتوفيق وإلى اﻷمام
ودمتم للنضال

**safwat1100** · 15-10-2013 11:28 PM

لأ المفتاح الاصلى بيتهيألى ... هو اعرف الاصلى من الصينى ازاى؟
و روحت للكهربائى قالى طالما السنتر شغال يبقا الريموت عايز يتبرمج و قالى على واحد بتاع مفاتيح بس انا مش عايز اروحله عشان خايف يفك الشفره او يلغيها مثلا و انا مش واخد بالى
طب هى المشكله تبقا من البطاريه ازاى و لمبة المفتاح بتنور عادى؟؟؟؟

**egyption2012** · 15-10-2013 11:38 PM

اللمبة ممكن تنور لانها تحتاج لتيار ضعيف جدا
لكن ارسال الاشارة يحتاج لتيار اكبر
فطبيعي ان الريموت ينور وميبعتش اشارة

**sheda** · 15-10-2013 11:52 PM

الحكايه دى حصلت معايا و حلها دور على فيوز السنتر لوك و شيله و استنى شويه و بعدين حطه و جرب

**safwat1100** · 16-10-2013 12:12 AM

المشاركة الأصلية كتبت بواسطة egyption2012

اللمبة ممكن تنور لانها تحتاج لتيار ضعيف جدا
لكن ارسال الاشارة يحتاج لتيار اكبر
فطبيعي ان الريموت ينور وميبعتش اشارة

طب البطارية دى اجبها منين و مواصفتها ايه؟

المشاركة الأصلية كتبت بواسطة sheda

الحكايه دى حصلت معايا و حلها دور على فيوز السنتر لوك و شيله و استنى شويه و بعدين حطه و جرب

حجرب و ارد عليك بس انا كنت بفكر برضه انى افصل البطاريه و اوصلها تانى و اجرب... يا ترى ينفع ولا كده حبقا بعوك؟؟؟؟؟

**egyption2012** · 16-10-2013 12:24 AM

المشاركة الأصلية كتبت بواسطة safwat1100

طب البطارية دى اجبها منين و مواصفتها ايه؟

حجرب و ارد عليك بس انا كنت بفكر برضه انى افصل البطاريه و اوصلها تانى و اجرب... يا ترى ينفع ولا كده حبقا بعوك؟؟؟؟؟

بطارية عادية مدورة
زي بتاعت الساعة
بتفكها من الريموت وبتجيب زيها .. بيكون فيه رقم على ضهر البطارية عشان تجيب نفس البطارية

**ayman hamdy** · 16-10-2013 12:29 AM

روح لاى واحد بتاع ساعات وهات منه حجر بطارية زى بتاع الساعةاليد بس كبير وهتشد المفتاح من طرفه اكنك هتخلعه من بعضه هيتشال المفتاح الحديد بالكيرف بتاعه وهتبقى الوحدة بتاعة الريموت افتحها هتلاقى بطارية الساعة شيلها وهات زيها بس يابانى علشان تعيش وركبها وبرمج وكل حاجة هنرجع زى ما كانت وبس كدة
تحياتى