الموضوع: مشكله عندى فى دبرياج اوبل فيكترا 2001

السلام عليكم و رحمة الله و بركاته و كل عام و انتم بخير
انا عضو جديد فى المنتدى بس متابع المواضيع الممتازه اللى الكل بيستفيد منها هنا من فتره
انا عندى شوية اسئله لانى لسا جديد فى موضوع العربيات و اول عربيه اركبها اللى هى معايا دلوقتى اوبل فيكترا 2001 1600 سى سى مانيوال و بقالها معايا حوالى 10 شهور
اول مشكله عندى هى مشكلة ان اول ما جبت العربيه كان دبرياجها عالى شويه و دا كان مضايقنى شويه فودتها لميكانيكى معرفه اوهمنى انو خبير فى الاوبل عشان يوطيليى الدبرياج شويه فطبعا الميكانيكى ده لعب فى حاجه اسمها مسمار الهواء و قالى انو هواه شويه و بعدها طلعت بالعربيه محستش باى فرق خالص و فهمت ان الاخ ده معملش اى حاجه لانى كمان حسيت انو كان محتاس و هو بيبص فى العربيه و بعدها باسبوع حسيت ان مشوار الدبرياج زاد عن الاول لتحت يعنى لازم ادوس اكتر لتحت و لما بيرجع بيرجع لوضعه الطبيعى اللى هو كان اصلا عالى و طبعا ده مسببلى مشكله بالذات فى الزحمه لانى لما بدوس و قف كتير بالدبرياج بحس ان دواسة الدبرياج بتنزل تحت رجلى او رجلى اللى بتطلع فوقها فاضطر انى امور و اشيل رجلى و احطها فى الوضع العادى من تانى كل شويه و طبعا الموضوع ده متعب جدا فى الزحمه و كمان بحس انو دواسة الدبرياج بقيت طريه اكتر من الاول دا غير ان الفرامل اتاثرت فى نفس الوقت برده و الدواسه بقت طريه اكتر من الاول مع العلم انى مغير بلية دبرياج تالت يوم جبت فيه العربيه و مركب بليه برازيلى لانى ملاقتش غيرها عندنا فى الاسماعيليه

تانى مشكله عندى فى العفشه : كنت بحس بصوت حاجه بتلق فى الناحيه الشمال ادام لما اجى اخد مطب جامد او نقره روحت للعفشجى قالى دى بيضة مقص و فعلا غيرتها بنوع اسمه Topranو الامور مشية كويس لمدة شهر بعدها ظهرت نفس المشكله ناحية اليمين ادام برده و زاد عليهاصوت خبط فى الارض الغير ممهده بس مش دايما حسب مزاجها يعنى روحت للعفشجى غيرلى بيضة مقص يمين نوع تركى اسمه ETC و غيرلى كمان دراعين الاسكاتره و الجلد بتاعهم و دراعين الميزان بالجلد بتاعهم برده نفس الماركه برده و الامور مشيت اسبوع بس كويس و بعدين رجعت صوت الخبطه اللى من الناحيه اليمين تانى مع النقر بالذات لكن الحمد الله موضوع الخبط فى الارض الغير ممهده دى راحت خلاص

يا ريت بعد اذنكم لو حد يقدر يفيدنى فى الامور دى لانى لسا جديد فى العربيات و معلوماتى لسا قليله جدا و الف شكر على سعة صدركم

شكرا حاليمو ... منتظرد رد طنانى باشا