السلام عليكم و رحمه الله و بركاته، السادة الكرام محترفى الفيليشيا أرجو منكم المساعدة.
من شهر السيارة كنت رايح بيها مشوار و أنا بسخن كانت بتترج زيادة فوق العادة و مع الغيار الأول و الثانى كانت بتكركر منى و صوت الماتور عالى رحت رايح للميكانيكى علشان يبص عليها قالى البوجيه معرق زيت و لقيت لما قعد يزود السيارة بتطلع دخنه سوداء راح مغيرلى طقم بوجيهات و قالى الماكينه خفيفه شويه و محتاجه شنبر فسألته طيب و قصه الزيت اللى معرق على التور من الأمام ده من إيه قالى إن جوان وش السليندر وحش و محتاج يتغير، و من بعد ما غيرت طقم البوجيهات العربيه ماشيه تمام لحد أمس العربيه رجعت عملت نفس الحركه تاني فقولت لما أجرب أشوف البوجيه المتهم ده شغال ولا إيه ظروفه فعلا لقيته مبيشتغلش إنما لما بشد السلك بتاعه و أبعدة مسافه صغيرة عنه بيلقط كهربه و الرجرجه تخف شويه بس برضو موجودة، المقصود و الإستشارة المطلوبه كلآتى:
- هل أعمل الشنبر زى ما الميكانيكى قالى و بالمرة أغير جوان وش السلندر و جوان وش التاكيهات و جوان الكارتيرة بالمرة؟ ولا الشغل فى الشنبر مالوش لزمه؟
- يا ترى لو هاعمل القصه بتاعه الشنبر دى إيه المكونات المطلوبه و أسعارها تعمل كام و المصنعيه فى المعقول تبى كام؟ و لو هاعمل قصه الجوانات بس هل ينفع و إيه المكونات المطلوبه و أسعارها كام؟
جزاكم الله خير يا جماعه و نشكركم و يا ريت برضو الإخوة الأفاضل الأستاذ منسى و الأستاذ صبحى و الأستاذ أحمد جودة يفيدونى بخبراتهم و أكيد الأستاذ أحمد جودة ممكن يفيدنى بأماكن قطع الغيار أو الميكانيكى اللى ممكن ينفعنى فى القصه دى خصوصاً على حد معلوماتى إنه من حلوان زى حالاتى
المفضلات