أولا تحيه وتقدير لمهودك في صباغه متميزه لموضوع بالحترافيه دي .
انا ليا 3 أراء احب اشارك بيهم في الموضوع ده
1- زي ما ناس قالت اسكود وبيجوا فئات اعلي من انها تتحط في مقارنه مع عربيات بتصنف علي انها عربيات صغيره وليست حتي متوسطه . انا طبعا فاهم قصدك من ضمهم للمقارنه ولكن انا لو هجيب بيجو 508 الفئه الاولي عشان ابقي راكب بيجوا 508 وبسعر اعلي فئه في كرولا انا شايفه منطق مش عملي ومش صح . انا يهمني في العربيه الاعتماديه . الوكيل اللي لو عربيتي حصل فيها اي شيء هيحلهالي وقتي . مش هيقولي طيب استني نكلم الشركه الام ونشوف ايه الحل ونبقي نرجعلك وده اظنه ممكن يحصل مع اسكودا و بيجو . انا شايف ان سعر الاسكودا مبالغ فيه شويه . وفيه استغلال خاطيء لنجاح سكودا فانتازيا في مصر سوف ينهيه الموديل الجديد من سكودا عشان خاطر الفتيس اللي ناس كتير متخوفه منه في مصر وبرضع الناس كانت بتشتري فانتازيا اللي ب 180 الف وفرق بينها وبين كرولا وسيفيك وغيرها بسيط انما لما توصل ل 290 الف اظن الوضع هنا يختلف .
2- انا لست متحيز مع الكرولا ولكن انا شايف وممكن ناس تختلف معايا ان الموديل الجديد خاصه النسخه الاوروبيه اللي هتنزل مصر شكلها خارجيا ثوري وطفره في شكل كرولا وجزاب واحسن من اشكال تانيه كتير . تويوتا اثبت مش بس في مصر انها العربيه رقم واحد وشوف اي حد معاه تويتا حتي لو داخليا فقيره فهي عربيه لها وزنها علي الطريق ومحدش اشتري تويتلا وركبها مهما ركبها وجه يبيعها وخسر فيها بل بالعكس في ناس اشترت العربيه وركبتها سنين ولما جت تبيع باعت باكتر من السعر اللي كانوا مشترين بيه وده للاسف نتيجه لثقافه السوق الخطا اللي عندنا في مصر مع الجنيه اللي جايله حاله مرض .في ميزه موجوده في الكرولا ولازم ناخد بالنا منها وهو الفتيس cvt وده فتيس بجد تحفه في التحكم والقوه والتوفير في البنزين ونقلاته بلا حدود . الكرولا عربيه ترضي ناس كتير واللي مش هيرضي بيها اكيد هيلاقي في سكودا او بيجوا اللي يرضيه بس ادفع اكتر بقي يا معلم وحط بنزين 95 اللي ب 6 جنيه .
3- في عربيه اي نعم هي منزلتشي مصر لسه ووكيلها الحرامي هيحرق امها هنا كالعاده بس انا شفت ريفيوهات لها بجد تحفه و تضرب التويتا والاسترا ألا وهي ماذدا 3 الجديده 2014 . حاولوا تتفرجوا عليها ويا ريت نضمها للمقارنه وكمان هوندا سيفك الفاسليفت 2013 بعد ما هوندا غيرت في موديل 2012 المحبط عشان كثره الشكاي اظنها بقت عربيه جميله .
والخلاصه انا لي رايي ان الالماني غير الفرنساوي غير الياباني غير الكوري كل فئه منهم لها ملامحا اللي تتميز بها وتختلف عن الاخري بها ومفيش عربيه سوف تنال كل الاعجاب ومن غير اي عيوب الا لو دفت كتيير قوي وبرضه هيطلع عينك في مصر لان مفيش توكيل عنده ضمير كامل ومفيش وعي مستهلك ممكن يكون رقيب علي وكيل او ضمانه حكوميه عشان السلعه ورغبه المستهلك تحترم غير بقي الطرق الزباله اللي عندنا والبنزين اللي بيزلونا بام الدعم اللي عليه .
وتقبلوا مروري
المفضلات