الموضوع: الشعب المصري شعب متدين بطبعه :(

المشاركة الأصلية كتبت بواسطة mgheam

العيب في حاجات كتير
زي مثلاً ثقافة الزحام لما مدينه يتكدس فيها عدد هائل في مساحة صغيره لابد تظهر بينهم كافة انواع الجرائم
عيب تاني الامية
حاجه ثالثه عيوب انظمة حكم متوالية
عيوب في وضعنا كدولة بجوارنا صراعات اتفرض علينا في فترات كتير حروب جعلت الدولة لاتهتم الا بالمجهود الحربي واجيال كاملة فات عليها كل فرص التعليم والرعاية الجيده وبالتالي اغلبهم مايعرفوش حتى يربوا اولادهم صح


لايمكن حصر تخلف شعب في سبب واحد زي (الدين)
لأنك ببساطة هتلاقي كل دول العالم اللى شعبها محترم (كاليابان والالمان) مثلاً مش مسلمين
ده على العكس 90% من الشعوب الاسلامية هي اكتر الشعوب تخلف وهمجية في العالم ولايستسنى من ذلك الا دولة او اتنيين

ولايمكن حصر التخلف بسبب نظام الحكم الديكتاتوري
لأن فيه دول كتير ديكتاتورية زي الصين وفيتنام وماليزيا دول تصنف ديكاتاتورية واقتصادها وشعبها ناجح

بتوع السياسية تفكيرهم تفكير عبيد (اذا اخذوا شكروا واذا منعوا شتموا)
يعني الشعب متدين بطبعه اذا انتخبنا ... والشعب قليل الدين اذا ثار علينا
والطرف الاخر يقول الشعب جاهل اذا لم ينتخبنا .. لكن لما يثور على الاخوان يبقى وطني وجميع ورائع

هؤلاء هم اسوء مشكلة وكارثة حلت على هذا الشعب

وباختلاف ايدولوجيتهم (ليبرالية اسلامية الخ) لايهتمون بشئ الا الوصول للكرسي

لكن طبعاً تجار الدين مشكلتهم اكبر

بسبب ان اعداداهم اكبر والمغيبيين عندهم اكتر وبالتالي حربهم والتخلص منهم شئ اساسي لأي حد عايز يخرج مصر من دوامة التخلف

كنت هاقول لك الله ينور لولا اخر سطر :-)
حرب و تخلص ؟ ازاي ؟
لو حد من الناس اللي مش عاجبينك دول قال يجب الحرب و التخلص من العلمانيين هتقول عليه ارهابي :-)
أنصف و كن موضوعيا يا رجل
بالنسبة لل90% من الشعوب الاسلامية المتخلفة انا عايز اضيف لك معلومة , من 500 سنة بالظبط كان الوضع عكس كده , لحد ما حصل الاستعمار , اللي ساب الدول دي كلها يا اما لعائلات حاكمة خاضعة له يا اما لعسكر خاضعين له برده , فتش عن دي

المشاركة الأصلية كتبت بواسطة imhotep

انا لما كتبت قصة صديقى فى الشغل كان هدفى اؤكد على المعنى الاصلى لاول تعليق ليا و هو ان الاخلاق حاجة و مظاهر التدين حاجة و هو لب معنى الكلام بتاع صاحب الموضوع ..... لان فى ناس كتيرة علنياتها و فاكرة ان ده ضرورة لده او بتفترض ده لحد ما تصحى على الواقع المرير المختلف...... كون انها مست وتر حساس عند البعض فده غير مقصود فى ذاته و ان كان الحمد لله صديقى ده واحدة واحدة بيفوق لروحه لانه طول عمره متدين لكن اللى طرأ عليه كان نوع من استغلال ده و استغلال علاقته بالناس فى الترويج و التجارة لاشياء معروفة بعينها لتحقيق مكاسب معينة..... سواء لنفسه او لفئة معينة

نرجع بقى لافتراض ارتباط التدين بالاخلاق و هو لب الموضوع...... خاصة بقى التدين لما يكون سطحى و ظاهرى و بس...... زى ما صاحب الموضوع كتب فى البداية بالظبط..... الشباب قاعد على الناصية بيحشش و بعدين يالله ياجماعة صلاة العيد قوموا بينا نصلى

نفس المنطق ده جابته السينما المحترمة من الخمسينات بدون التطرق لاى قضايا دينية صريحة فى فيلم زى رصيف نمرة خمسة فى شخصية زكى رستم و الكلام ده كان سنة 1954

كمان موضوع الازدواجية..... اللى الناس بتمشى بيها و تفتكر ان مجرد الالتزام بقشور التدين هو ده اللى عليه الاجر و الثواب...... و تنسى ان اللى امر بالصلاة امر كمان بالامتناع عن الحاجات اللى تغيب العقل

و ندخل بقى فى كلام اكثر جرأة...... هو صلاة البنى ادم و عبادته...... هدفها ايه؟ هل هى بتفيد الله سبحانه و تعالى؟ حاشا لله..... الله سبحانه لا يزيد و لا ينقص و لا ينتقص منه لانه سبحانه كلى القدرة

اذن العبادات المفروض انها تفيد العبد اللى بيتعبد..... عشان تخلى منه بنى ادم افضل..... طب لو لم يصبح البنى ادم ده بنى ادم افضل...... يبقى العبادات الظاهرية دى و لا تسوى...... طيب هل ده معناه تركها..... بالتأكيد لأ...... لكن ده معناه ان فى مسئولية اعمق موجودة لسه مستنية حد يشيلها...... المسئولية دى على رجال الدين انهم يرجعوا من تانى يوضحوا اهمية انعكاس مظاهر التدين على سلوكيات الانسان....... يعنى مينفعش الانسان يبقى ملتزم بالصلاة و الصوم و غيرها من مظاهر التدين لكن تلاقيه فى اول و ابسط امتحان فى التعامل مع الناس تلاقيه يسقط و يفشل فشل ذريع...... سواء فى كدب او شتيمة او خداع او او او

المسئولية الاهم تقع على عاتق الانسان نفسه...... يراعى ضميره اللى ربنا خلقه بيه بيقوله ده صح و ده غلط و بيستلموه الاهل من الصغر يعلموا الطفل السلوكيات المقبولة من المجتمع و السلوكيات الغير ذلك و فى النهاية يتسلمه الدين ليعطى القواعد الكبرى للسلوكيات الاخلاقية المحبذة......
و لا هنقعد نبرر الغلط مهما كان صغير زى ما نور الشريف بيعمل فى فيلم العار...... اخواته يقولوله السبحة مش بتفارق ايدك و بتتاجر فى المخدرات...... يقولهم دى نباتات !!!!!!!!
..

اهو لولا حتة الاكشن بتاعة وتر حساس دي كنت قلت لك الله ينور برده
عموما الله ينور و التوضيح خير و بركة و مافيش احسن منه :-)
مشاركتك اللي فاتت كان ناقصها الفرق بين التدين الظاهري و التدين الحقيقي , و بالمناسبة الشباب اللي بيحششوا لو سألتهم انتوا متدينين ولا لأ هايقولوا لك "بنحشش يا عم الحاج , متدينين ازاي يعني ؟ :d"

المشاركة الأصلية كتبت بواسطة imhotep

نقطة اخيرة بس على جملة الشعب المصرى متدين بطبعه اللى بقيت بشوفها كتير بيقولها البعض دلوقت على سبيل التندر...... الكلمة دى حقيقة فى حد ذاتها يثبتها التاريخ اللى يطول شرح تفاصيله ..... لكن للاسف الواقع بتاعنا الحالى هو اللى ضيع كتير من معناها الحقيقى و قيمتها لما فقدت ارتباطها بالسلوكيات الحسنة...... طب هنعمل ايه؟ هنقعد نشتكى و نتشكى و خلاص و لا دى كمان محتاجة نظام نستورده نمشى عليه...... و فى النهاية لا يصح الا الصحيح و لا يغير الله ما بقوم حتى يغيروا ما بأنفسهم
..

الله ينور مع اضافة , اللي الحاجة فقدت قيمتها عنده , كانت فاقداها من الاول و المشكلة في الاصل عنده بس كان مكسوف يتكلم و دلوقت لقى حجة
اللي لها قيمة عنده من الاول عارف الفرق بين الحاجة و بين الاشخاص

المشاركة الأصلية كتبت بواسطة imhotep

اخر كلمتين بس عشان نقطع الطريق على اللى هياخد الموضوع لسكك فرعية ملهاش لازمة لا جدوى منها...... الموضوع فى صلبه عن الانفصال بين التدين القشرى الظاهرى و الاخلاق و السلوكيات...... و زى ما فى ما بيثبت النقطة دى زى الراجل اللى عليه مظاهر التدين اللى سب صاحبى..... فيه كمان ناس تانية بتلاقى اخلاقهم بتكمل صورة التدين بتاعهم...... الخلاصة الحقيقية للموضوع هى...... ان احنا نتعود نحكم على البنى ادم بمعايير حقيقية و ليس معايير ظاهرية خادعة او مزيفة...... و اعتقد ده كلام مش محتاج جدال او اختلاف عليه الا طبعا بين اللى عايزين يجادلوا و خلاص و بيحبوا اوى و بيفتكروا انه انتصار لهم ان يكون لهم الرد الاخير....... و هم مش داريانين انهم من النوعية اللى التجاهل هو افضل رد عليهم..... لان الحكمة معروفة بتاعة عدم الدخول فى جدال مع......... لئلا......
..

برده هاقول الله ينور , و برده حتة الاكشن موحشة منظر المشاركة و دخيلة عليها و المشاركة نفسها خسارة فيها :-)