غيرت البطاريه 70 امبير كلورابد مصرى
العربيه بقالها كام يوم بتدور بالعافيه
الاول اعتقدت انه المارش لان البطاريه بقالها سنه ونوعها فارتا وكنت دافع فيها 500 جنيه واستبعدت انها تبوظ بسرعه كدة
المهم غيرت المارش واشتغل كويس
بس بعدها بيوم رجع الوضع زى الاول
روحت اقيس الشحن
وهنا عرفت ان البطاريه بايظه
طبعا فى حاله الافلاس الى احنا فيها وكمان كنت شارى بطاريه عظيمه وكان اخرها سنه
طلعت على شارع احمد سعيد لان هناك ارخص سعر للبطاريات
المهم
جبت بطاريه جافه 70 امبير كلورايد مصرى شكلها مش فخم خالص--مصرى بقه-ودفعت 330 جنيه فقط ودة احلى شىء فى الموضوع انى مدفعتش كتير
الملاحظات للفرق بين البطاريه 70 امبير عن 55 امبير
النور اتحسن كتير جدا حتى نور العدادات كمان
العربيه الاداء اتحسن شويه
الكاسيت بقى صوته انقى
انا قولت اجيب الرخيصه بضمان لان كدة كدة اخرها سنه معايا ومن تجار ب لبطاريات جافه انواع متعدده
ورساله خاصه لاستاذ علاء انته عدتنى بعد 185 نوبيرا 1800 سى سى علشان بطاريتى كانت بايظه
اى نعم انته كنت محمل فيها اتنين طن بس برضه انته اكتر منى 300 سى سى
ونشكر الاستاذ علاء على كرم ضيافته