الموضوع: صوت تزييق في الالنترا عند لف الدركسيون والضغط على الفرامل

المشاركة الأصلية كتبت بواسطة ultramisho

صوت تزييق كأن في حاجة مصدية بتحك ؟!!
ده بالظبط الي انا حسيته في عربيتي الام دي وماشية 1300 كيلو بس وباحس بيه احيانا من قدام مش من ورا وخاصة ناحية العجلة الامامية شمال، باحسه والعربية واقفة أو بطيئة جدا وباحرك الدركسيون بدون فرامل والغريبة باحس بيه كمان وانا واقف لما بارفع رجلي من على الفرامل لكن وانا ماشي عادي مافيش حاجة

الغريبة قلتلهم الكلام ده في الصيانة وتابعت من الازاز عربيتي وماشفتهمش عملوا حاجة غير تغيير الزيت والفلتر وجربوا الفرامل والعربية بطيئة وقالولي كشفوا على التيل والفرامل مافيهاش حاجة ، قلت اتابع لقيته برضه بيظهر احيانا وان كانت قليلة بس باسمعه والاغرب بقى اني لقيت الايه بي اس مش شغال بعد الصيانة مع انه كان شغال قبلها!!!!
وطبعا هاروح التوكيل تاني بس لما افضى ... مشوار محترم للعبور من المعادي علشان الموضوع بتاع الايه بي اس ده لانه غايظني

افيدونا يااهل الخبرة

تحياتي

انا اول ما جبت العربية كنت بسمع صوت كده في الدركسيون، دورت على النت لاقيت دي مشكلة شائعة في الالنترا، دورت اكتر لاقيت ان عمنا غبور بيتلكك ويقول لازم نغير هلبة الدركسيون بحالها ب٢٠ الف جنيه !!

انا رحت لعفشجي شاطر في إمبابة، مشي بعربيتي ١٠٠ متر، وقالي الصليبة المتحركة عاوزة تتغير (التوكيل بيتلكك وعاوز يغير العلبة بالصليبة)، المهم رحت لمحل مشهور اسمه الأدهم فيه كل اللي انت عاوزه، وجبت الصليبة المتحركة ب١٨٠ جنيه، ورحت ركبتها ب١٥٠ جنيه وطلب ٢ أتياش ميزان ب١٥٠ وخلصصتها وعملت زوايا ب٣٠ جنيه وربط عفشة ب٢٠ جنيه

لما طلعت الصليبة بتاعتي وحركتها بايدي (هي عبارة عن ماسورتين في بعض معمولين بوصله تليسكوبية)، لاقيت فعلا اللي انا خرجتها من عربيتي الوصلتين ما بيدخلوش في بعض بنعومة وسلاسة واللي جبتها كانت مظبوطة، وخلصت الليلة

طبعا مش ضامن ان مشكلتي هي نفس مشكلتك، انما بس بقولك تاخد بالك من صليبة الدركسيون المتحركة، لأنها تحت فوق دواسة البنزين ويمكن ده السبب انك بتحس بيه قدام شمال، عموما لو عاوز رقمه ومكان العفشجي ده قولي، هو عنده صنايع كتير وبينجز، وبصراحه حسيت كأنه دكتور في العربية، ساقها ١٠٠ متر عرف مشكلتها