الموضوع: ايه احسن نوع لمبات موفره

المشاركة الأصلية كتبت بواسطة khaled_sabry

متفق معاك
و اللمض الموفره بعد فتره بتضعف

لكن انا حصلتلى حادثه من 4 سنين معقدانى من اللمض الفلوروسينت
كنت يومها المدام سبقتنى على الشغل و انا فى الحمام بتوضى استعدادا لأنى اصلى الصبح و انزل الشغل و كان ساعتها مهاب ابنى عنده سنه و يادوب بيمشى و سايبه فى الصاله و كنت حصلى و بعد كده حنزل اودى مهاب الحضانه و انا على شغلى
مره واحده لاقيته جاى و بيشاور و انا مش فاهم منه حاجه ببص كده لاقيت لوحة كشاف اللمبه الفلوروسين (كانت اللمبه مطفيه) محروقه من ناحية الترانس و بلاستيك اللوحه بداء يسيح و يتساقط و هو مشتعل على الانتريه
فمابقتشى عارف اطفى النار اللى فوق فى الكشاف و لا اللى بتقع على الانتريه و اللى ربكنى اكتر ان ابنى اتفزع و فضل يعيط و يمسك فى رجلى و انا كنت لوحدى فى الشقه
و من ربكتى بقيت ادخل الحمام اعبى ميه فى بوقى و ابخها على اللوحه فوق - طبعا لما الموضوع خلص قولت الحمد لله ان الميه اللى استخدمتها دى ماكهربتنيش انا او مهاب
و الحمد لله برضه ان الموقف ده حصل و انا فى الشقه لأنه لو كان اتأخر ربع ساعه بس كنت حبقى بره الشقه و كانت الشقه اتحرقت

حمد الله على سلامتك وسلامة مهاب
الحوادث دي ممكن تحصل في أي لمبة ومش في اللمض بس دي في السلوك نفسها والمفاتيح والبرايز وكل حاجة متعلقة بالكهربا وربك هو اللي بيستر
مش عارف الترانس اللي عمل كده الترانس القديم الضخم ده ولا إيه السبب بالضبط ؟ عموما أكيد حضرتك عارف إن حاليا لغوا موضوع الترانس ده وأصبح الموضوع عبارة عن دواية صغيرة في كل جانب وانتهى الموضوع ولا ترانس ولا استارتر ولا يحزنون
مع العلم إن أخطار لمض الفلورسنت متجيش حاجة جنب أخطار اللمض الموفرة اللي زي ما أحد الإخوة قال إنهم منعوها في أوروبا بسبب خطورتها وتسببها في بعض الأمراض كالسرطان وأنا فعلا قرأت قبل كده عن إن اللمبة الموفرة لو فرقعت فخطر جدا إن المادة اللي جواها تلمس حد علشان المادة دي مسرطنة وخطرة جدا وربنا يسترها علينا جميعا