أول تقرير تفصيلي للـ a7 هاي لاين ( وكيل + خليجي ) من أرض الواقع

**inspiron** · 25-10-2013 02:56 AM

السلام عليكم جميعاً

النهاردة كنت قاعد علي قهوة في العجوزة جنبها معرض برستيج للسيارات..ولقيت عنده حوالي 6 عربيات a7 الفئتين..مكدبتش خبر وجريت علي الهاي لاين أبص عليها وأدقق في كل تفاصيلها..العربية روعة في الجمال بجد..بإختصار علشان مطولش علي حضراتكم..

1- 1400 سي سي 140 حصان عزم 250 نيوتن
2- فتيس dsg
3- led في الفوانيس الأمامية والخلفية شكلهم وهم فعلاً.والفوانيس لونها إسود
4- الزينون بتاع العربية جبار أول ما تشغله العدسة تفضل تلف في جميع الإتجاهات لحد ما تظبط إتجاه الإضاءة المناسب.ولما تلف الطارة العدسة تلف مع إتجاهها.
5- لما تعدي عربية قصادها النور بينزل بسرعة لتحت مستوي نظر المقابل أوتوماتيكياً..ولما تقابلها عربية من إحدي الجانبين العدسة اللي في الجهة المقابلة بس هي اللي بتنزل وتم إختبار الأوبشن ده.
6- الزينون بتاعها عالي وواطي مش واطي بس.
7- فيها daytime light led وفيها corner light .
8- فتحة السقف بانوراما ( أيوة بانوراما مش عادية ) واللي مش مصدق يروح هناك يشوف بعينه.
9- طارة مالتي.
10- العربية فيها حساسات ركن وpark pilot ولما بيشتغل يظهر علي شاشة الكاسيت شكل العربية وحواليها مجال الركن وتقدر تتحكم في صوت الجرس بتاع السينسور وتختار أكتر من نغمة.
11- العربية نازلة 2 إيرباج فقط.
12- شاشة الـ iso fix اللي في العدادات خرافية والجرافيك بتاعها جميل.
13- التكييف بتاعها climatronic quad zone ومحتاج موضوع لوحده عشان شرح إمكانياته الجبارة اللي مكنتش متوقعها.يعني علي سبيل المثال بيرسم صالون العربية علي شاشة الكاسيت وتتحكم في قوة إندفاع الهواء من كل فتحة تهوية لوحدها.وتتحكم في درجة حرارة كل فتحة لوحدها.والمفاجأة إن داخل الفتحتين اللي في المنتصف في swing الهواء يطلع لفوق وينزل لتحت لوحده.ودرجة التبريد لحد 15 مش 18.والتبريد بتاعه الجدع اللي يستحمله.
14- النظام الصوتي لا يوصف من حيث النقاء وضخامة الصوت والكاسيت فيه DSP effects للصوت.
15- مفتاح smart key والسنتر بتاع العربية بيقفل touch علي كالون الباب مش تدوس علي زرار..مجرد تحسس علي الأوكرة من برة.
16- فرش جلد مع جلد مقلوب في المنتصف.
17- وحدة مالتي ميديا في الطابلوه تشمل Cd changer 6 إسطوانات ومكان للميموري كارت.
18- aux و usb و bluetooth
19- كرسي السائق كهربة وفيه lumber support
20- طابلوه وأبواب مطعمة أبانوس ( في اللون الموكا والأسود فقط )
21- كمبيوتر كامل متكامل للعربية في شاشة الكاسيت التاتش بيعرض جميع وظائف العربية وحالتها وفي إفتكاسات جميلة علي سبيل المثال لما التانك يكون فاضي بيرسم العربية وظاهر التانك بلون أحمر ويديك جرس تنبيه جميل.
22- إمكانية التحكم في حساس إنذار ضغط الكاوتش من 1-4 psi حسب رغبتك.
23- نظام الثبات الإلكتروني esp
24- حساس مطر و light assist للفوانيس الأمامية وإمكانية التحكم في قوة الإضاءة الأمامية وكمان الخلفية ( جديدة دي ).
25- مرايات جانبية كهربة وضم كهربة مع سخانات وكلهم فيهم تعتيم ذاتي.
26- لما تجيب الفتيس علي الـ R المرايا اليمين بتقلب لتحت عشان تشوف الرصيف.
27 - بخاخات فوانيس أمامية.
28 - فتحات تكييف خلفية.
29- 3 مخارج 12 فولت لأغراض الكهربة.
30- الطارة وفرامل اليد جلد طبيعي ومخدتش بالي الطابلوه زيهم ولا لا بس الجلد بتاعه طري زي الفانتازيا.
31- العربية وهي دايرة وقافل الزجاج ومشغل التكييف إبقي تعالي قولي إنت مبتفهمش لو سمعت حاجة برة أو حسيت إنها دايرة أساساً...فعلاً العزل جبار.
32- العربية نازلة بكاوتش ميشلان والإستبن ميشلان والجنط 16
33- الطابلوه لونين إسود X بيج أو إسود X رمادي فاتح حسب لون العربية.
34- أنظمة الفراملABS, ASR, ESP, EPC, MBA, EDL
35- العفشة الخلفية تورشن بيم ونزلت تحت العربية شوفتها.....

ولكن

- العربية من تحت صحيح تورشن بيم..لكن مش زي التورشن بيم اللي شوفته في السيراتو واللانسر والإلنترا مثلاً...في شغل جامد معمول فيه ومش هيفهم كلامي غير اللي يشوف بعينه.

36- درج الطابلوه والكنسول فيهم تلاجة وفي الأمام بها 2 حامل أكواب والكنبة الخلفية فيها مسند في المنتصف وبه 2 حامل أكواب.

37- شاشة الكاسيت لما يكون مش شغال بيقلب ساعة ANALOG شكلها تحفة.

38- لما الجو يمطر أو يقلب تراب يكتب علي شاشة الكاسيت Please close windows أو تظبطها إنهم يقفلوا لوحدهم.

السعر من المعرض تسليم فوري 280 ألف جنيه
----------------------------------------------------

الإختلافات اللي هتنزل في الخليجي :-

- نظام صوتي مختلف بيتكون من شاشة أكبر ( columbus ) وسماعات canton
- فرش جلد بالكامل أو بجلد مقلوب زي الوكيل.
- فئة بـ 4 إيرباج وفئة بـ 7 إيرباج
- العفشة الخلفية مالتي لينك والجنط 17 والعربية إرتفاعها هيقل عن الوكيل.

السعر لم يحدد بعد.

إسم المعرض برستيج أوتو..المدير المسئول اسمه / عمر ناصر

ورقم تليفونهم 33463337

تم بحمد الله

**amgomaa** · 25-10-2013 04:11 AM

روعه بالفعل ومشكور علي التقرير بس بامانه انا لو معايا المبلغ ده ونيت اشتري يبقي من غير زعل ٣١٦ bmw ده مجرد راي وشكرا

**mo7a_mo7a** · 25-10-2013 04:31 AM

شكرا يا باش مهندس أحمد علي مجهودك وتعبك
دايما سباق للخير ان شاء الله

انا تصورت من العنوان ان الخليجي نزلت
لكن عل العموم ادينا قاعدين مش يمكن سكودا تغير الوكيل (ارتوك اوتو)؟

خالص شكري وتحياتي

**Mamoud salah H** · 25-10-2013 07:39 AM

كل الي في العربييييييييييية جميييل جدا ورائع وتحفة بسسسسس موجود في منافسينها بردة وباسعاار اققلل ومكان من وجهة نظري ن شكلها مشش حلو يعني انا شايف انها يدوب فيس ليفت وبكرر دة من وجهة نظري انا فقط لا غييير

وكلوا كووم وحكاية 2 ايرباج دي غريبة جدا جدا دة اققل منافس ليها علي ما اظن مش اقل من 4 ايرباج

وحاكاية الغفشة التورشن دي بصراح انا مفهمش فيها بس بلاحظ ان الناس بتسب وتلعن في السيراتو والانترا عشان العفشة بس علي حسب كلام حضرتك بتقوول في شغل زيادة في العفشة الله واعلم هو ايه ياريت لو حضرتك تحددلنا الفرق بين التورشن بيم بتاع الاوكتافيا وبتاع الكوري واايه اللي مخليه افض في الاوكتافيا عشان تبقي اللصورة اوضح

**Khaled Lanos** · 25-10-2013 08:23 AM

تسلم على التقرير ياباشا
هي العربية ماشاء الله روعة بس اللي قفلني منها بجد الفتيس الـ dsg للأسف
280 الف مبلغ كبير بردو الواحد مش مستعد يغامر هههه

**Moratoz** · 25-10-2013 09:54 AM

والله يا باشا كعادتك دائماً متميز في السرد بس كان لازم كلم صوره للحاجات محل الخلاف زي سقف البنوراما مثلا وكلمه آتوك اوتو علي الشنطه
تحياتي لمجهودكم الوافر

**inspiron** · 25-10-2013 05:02 PM

المشاركة الأصلية كتبت بواسطة aminyassien

بسم الله ما شاء الله
ايه ده كلة دا الواحد راكب جرار على كدة
طيب سابت ايه العربيات التانية
الله يبارك للى حيشتريها.

ده الواحد مركب دنقل بسكاكين و حاسس انه عمل اللى متعملش

ألف شكر على التقرير يا كبير

يا باشا ربنا يباركلك ولازم تعرف إن الـ a4 دي من أفضل الموديلات المتينة اللي نزلت في سكودا وربنا يديك خيرها.

المشاركة الأصلية كتبت بواسطة amgomaa

روعه بالفعل ومشكور علي التقرير بس بامانه انا لو معايا المبلغ ده ونيت اشتري يبقي من غير زعل ٣١٦ bmw ده مجرد راي وشكرا

طبعاً الـ 316 لا غبار عليها..لكن في مثل بيقولك الغاوي ينقط بطاقيته.لما أقارن بين أسعار قطع الغيار في العربيتين علي الـ long run أعتقد في كلام.ولما أقارن بين الـ 316 الفاضية بسعرها ده مع الـ 316 الكاملة هتلاقي نفسك في نفس وجهة النظر....بغض النظر عن كونها بي إم..أتمني يكون وصلك قصدي صح :) متشكر لرد حضرتك يا فندم

المشاركة الأصلية كتبت بواسطة mo7a_mo7a

شكرا يا باش مهندس أحمد علي مجهودك وتعبك
دايما سباق للخير ان شاء الله

انا تصورت من العنوان ان الخليجي نزلت
لكن عل العموم ادينا قاعدين مش يمكن سكودا تغير الوكيل (ارتوك اوتو)؟

خالص شكري وتحياتي

ربنا يخليك يا زعيم ويكرمك..والله العبد لله من عاشقين السكودا..لكن لا أخفيك سراً زعلت لما سمعت الفرق بينها وبين الخليجي اللي مكانش أرتوك هيخسر حاجة لو نزله في العربية الفرق الملموس ده
تحياتي لشخصك الكريم

المشاركة الأصلية كتبت بواسطة zangry

280 الف و2 ايرباج ؟! والله مش عارف اقول اية ! يافرحتي بالزينون اللى بيتحرك والشاشة اللى بترسملي العربية ! ولما اخبط في اي حاجة ولا واحد طاير ودخل فيا من الجنب !! ساعتها اعمل اية؟ والاوبشنات الكتيرة دى هتفدني بأية !! طبعا ربنا هو الستار في كل الاحوال بس حرام ادفع 280 الف ! وفي الاخر 2 ايرباج وعفشة تورشن بيم ! واكيد برضه مش زي بتاعة الكوري الكحيان ده .. كل الكماليات دي متسواش حاجة في نظري ادام الامان يا جماعة ده الفلوانس اللى بـ180 فيها 6 ايرباج ! شوفوا كده اغلب العربية اللى بالسعر ده قليل اوي العربيات اللى فيها 2 ايرباج بس ! مش هقول بـ250 الف كمان .. اللى عايز يركب عربية محترمة يدفع 20 الف كمان ويركب الـ316 دي العربية المحترمة فعلا شوفوا نظام التعليق بتاعها وشوفوا اللى في الـa7 واحكموا بنفسكم

بإختصار شديد..كل ما هو في العربية دي واللي شوفته بعيني..يغنيني عن نقطة الإيرباج..أنا واحد من الناس مش هروح أشتري عربية فاجرة زي دي وعامل حسابي إن هعمل بيها حادثة موت لا قدر الله.أتمني تكون فهمت قصدي.الحق يقال بدون تحيز..العربية دي نمرة واحد في كل شئ لو جنبنا الزعل من عدد الإيرباج.واللي عاوز العربية دي مش ناقصها حاجة..يجيب الخليجي وأمره لله في الضمان.

المشاركة الأصلية كتبت بواسطة Mamoud salah H

كل الي في العربييييييييييية جميييل جدا ورائع وتحفة بسسسسس موجود في منافسينها بردة وباسعاار اققلل ومكان من وجهة نظري ن شكلها مشش حلو يعني انا شايف انها يدوب فيس ليفت وبكرر دة من وجهة نظري انا فقط لا غييير

وكلوا كووم وحكاية 2 ايرباج دي غريبة جدا جدا دة اققل منافس ليها علي ما اظن مش اقل من 4 ايرباج

وحاكاية الغفشة التورشن دي بصراح انا مفهمش فيها بس بلاحظ ان الناس بتسب وتلعن في السيراتو والانترا عشان العفشة بس علي حسب كلام حضرتك بتقوول في شغل زيادة في العفشة الله واعلم هو ايه ياريت لو حضرتك تحددلنا الفرق بين التورشن بيم بتاع الاوكتافيا وبتاع الكوري واايه اللي مخليه افض في الاوكتافيا عشان تبقي اللصورة اوضح

متشكر لحضرتك أولاً..بالنسبة لمنافسيها يا ريت حضرتك تحدد مين هما..لأن كل منافسيها فيهم drop بردو..يعني الكرولا هاي لاين من غير فتحة سقف وضيف علي ذلك إنها تركي.
وتكويلها أقذر وكيل في مصر وحصل معايا موقف منه عرفت مدي إنحطاطه.غيرها من المنافسين مفيش حاجة منهم بالموتور العفي دي مثلاً.ومفيش في منافسيها الكماليات الموجودة في كمبيوتر العربية دي وحساساته.
بالنسبة للعفشة أنا شوفت عفشة اللانسر والسيراتو والإلنترا..عبارة عن مساعد في كل جنب وسوستة بتاعته ومقص عمود صلب بيربط بين الجانبين في المنتصف..يعني منتهي الفقر.لما نزلت تحت دي لقيت فيها الكلام ده والعمود الصلب دي في بارين تانيين علي شكل حرف X علي العمود ده نفسه وكمان حساسات الـ esp وشكل جلب المقصات فيها غريب عبارة عن حديدة إسطوانية كده وراكب فيها جلبة فوق وجلبة تحت وسمك الجلبة كبير غير اللي شوفته في العربيات اللي ذكرتهم.
وتاني بقول..اللي عاوز مالتي لينك و7 إيرباج أو 4 إيرباج يستني الخليجي :)
بشكر حضرتك مرة أخري :)

المشاركة الأصلية كتبت بواسطة Khaled Lanos

تسلم على التقرير ياباشا
هي العربية ماشاء الله روعة بس اللي قفلني منها بجد الفتيس الـ dsg للأسف

280 الف مبلغ كبير بردو الواحد مش مستعد يغامر هههه

هو ده مربط الفرس..كلنا مستنيين تأكيد علي موضوع الفتيس.أنا متفائل خير يكون إتحل ياااااا رب.وحالياً أنا بشمشم علي أي عربية فانتازيا 1400 اللي نزلت بـ DSG وأعرف حصلتلها مشاكل ولا لا..مع العلم إن كل موزع لسكودا له حصة 25 عربية..وحالياً مفيش ولا موزع واحد عنده منها كله إتباع.

المشاركة الأصلية كتبت بواسطة Moratoz

والله يا باشا كعادتك دائماً متميز في السرد بس كان لازم كلم صوره للحاجات محل الخلاف زي سقف البنوراما مثلا وكلمه آتوك اوتو علي الشنطه
تحياتي لمجهودكم الوافر

عمرو باشا واحشني جدي..ربنا يباركلك يا كبير..بالنسبة للصور فاتت عليا دي..وإن شاء الله بكرة وأنا راجع من الشغل في النهار هعدي عليهم وأصورها.
تحياتي

-

الموضوع: أول تقرير تفصيلي للـ a7 هاي لاين ( وكيل + خليجي ) من أرض الواقع

LinkBack

أدوات الموضوع

عرض

-

-

المواضيع المتشابهه

تقرير : ريو 2013 هاى لاين وكيل

جيتا هاي لاين خليجي ولا باسات بيز لاين وكيل

الحمد لله أستلمت كيا سول هاى لاين وكيل و رخصتها (تقرير سريع)

ياجماعه محتار بين الكيا سيراتو العاديه الهاي لاين وكيل - والكيا سيراتو كوبيه خليجي

لانسر شارك خليجي هاف سبورت Vs نيو سيراتو خليجي هاي لاين

الكلمات الدلالية لهذا الموضوع

المفضلات

المفضلات

ضوابط المشاركة