الموضوع: كان هيتعمل عليا احلى شغل وحبيت انبهكم

السلام عليكم ورحمه الله
من شهرين اشتريت بى ام 320i مو 2011 عامله 60 الف ك وبحاله الزيرو
المهم حبيت اشيك عليها عشان اطمن وسئلت صديق معاه بى ام من فتره عن مركز موثوق فيه
قالى فيه واحد اسمه نور فى ش احمد عرابى فى المهندسين وشكر فيه كتير
سمعت كلامه وروحت لعمنا نور قولتله لسه شاريها وانا مش بعرف غير انى اسوق وعاوز اشيك عليها والعفشه بالتحديد
رفعو العربيه ونزل تحت ولف وبعد شويه قالى هكتبلك اللى هيتغير
لقيته كاتب ايه بقى خد عندك
2 مساعدين امامى ومقصين امامى وحاجتين بردو جنبهم مش فاكر اسمهم ايه شدادات او مش فاكر وبارات دريكسيون وقاعدتين ماتور وجلب عمود اتزان وقاعدتين فتيس
طبعا انا اتصدمت من اللى سمعته دى العربيه لسه جديده ؟؟؟؟؟؟ غير بقى المفاجأه
فى اخر الفاتوره الاجمالى 12750 جنيه ومصنعيه 1000 جنيه واكراميات وبتاع يعنى 14 الف جنيه
سكت شويه واتهبلت وقولتله طيب اشتغل او يمكن اتكسفت اقول حاجه واديته عربون 3000 جنيه ومشيت
اخدت تاكسى ورايح فيصل وطول الطريق بفكر وحاسس انى اتعمل شغل كبير اوى عليا
اتصلت على ممدوح بتاع قطع الغيار وسئلته على اسعار بعض الحاجات دى فلقيت فرق سعر كبير
ففوقت ومصدقت لقيت سبب واتصلت عليه بعد ماوصلت الرمايه وقولتله متعملش حاجه فى العربيه لحد ما اجى
وقولت لسواق التاكسى لف وارجع
المهم روحت اخدت العربيه وقالى عاوزين 100 جنيه كشف
قولت مش هعمل مشكله وبسيطه ودفعتها ومشيت
اتصلت بشيكو حبيبى اللى معانا هنا فى المنتدى قالى اروح لميدو فى الحرفيين وهو هيوصلنى لحد
روحت من يومين ليه وودانى لولد بتاع بى ام الله يباركله
كشف على العربيه بالتفصيل وقالى العفشه زى الفل ولسه جديده ومش محتاج غير جلبتين شدادات ب 400 جنيه وممكن كمان ميتغيروش دلوقتى
عدت الكلام عليه وقولتله ياعم بص كويس فاستغرب من اصرارى وبص تانى بنفسه وقالى والله مافيها حاجه فقولتله اللى حصل بدون ذكر اسماء
قالى بياخدو الحاجات اللى بيطلعوها ويبعوها تانى وبيحطلك حاجات طلعت بردو من عربيه زيك كده
ومهما كان اللى هيركبهولك مش هيكون زى اللى نازل فيها
المهم غيرت جلب الشدادات وروحت اظبط زوايا والولد بتاع الزوايا كان فاهم اوى
قولتله بص عالعفشه تانى محتاجه حاجه ؟؟ قالى زى الفل العربيه لسه جديده

وال 14 الف اللى كنت هدفعهم والله اعلم كان هيركبلى ايه كمان دفعت 700 جنيه اول عن اخر فى كل حاجه

خلاصه الموضوع حبيت اشاركم تجربتى واحذركم من البنى ادم ده وحسبى الله ونعم الوكيل فى النصابين