ركن الأوتوماتيك على منحدر من غير شد فرامل اليد
السلام عليكم،،
أنا بقالي سنة تقريبًا بسوق أتوماتيك وبعتبر نفسي لسه في مرحلة التعلم، المهم، أنا من عادتي إني بستسهل يعني بعمل الحاجة بأقل مجهود، عشان كده من ساعة ما عرفت إن الأوتوماتيك في وضع الركن p مبتتحركش وأنا بركنها على طول بدون شد فرامل اليد على عكس ما كنت متعود دايمًا في المانيوال، ما دام كده كده مش هتتحرك ليه أعشق فرامل اليد؟ الـ p كفاية!
وبعد فترة ابتديت أروح مشاوير أضطر أركن فيها على منحدر، زي مثلاً بعض الشوارع المنحدرة في مدينة نصر، فكنت بركن العربية على p من غير شد فرامل اليد، المشكلة بقه إني لما آجي أطلع بالعربية وأدور وآجي أدي الغيار d أحس بنتشة جامدة جدًا وأنا بنقل من الـ p، وطبعًا إحساس فظيع لأني عارف أن فيه حاجة غلط وفيه مشكلة وكان عندي شك كبير إني اشتريت العربية وفيها عيب في منظومة الفتيس، وفضلت فترة كبيرة على الحال ده، كل ما أركن على منحدر العربية تنتش جامد وأنا طالع، لغاية في مرة وأنا بركن واحد ابن حلال معرفوش كان واقف لاحظ اللي بعمله وقال لي "شد فرامل اليد عشان متحملش على التروس"، الله يباركله، بعد ما قال لي على المعلومة دي، من ساعتها كل ما آجي أركن، خصوصا على منحدر، بشد فرامل اليد "قبل ما اشيل رجلي من على فرامل الرجل" عشان مديش أي فرصة العربية تحمل على التروس بدل الفرامل، وبعد كده أجيب الـ p، والحمد لله النتشة اختفت تمامًا، وأدينا بنتعلم.